नत्त्वा रामं च श्रीरामानन्दं भाष्यकृतं गुरुम्।
हितावहं मुमुक्षूणां करोमि भावनात्रयम् ॥१॥

निजं कारागृहे बद्धं पतितं च महार्णवे।
भुजङ्गविषमूढं च मुमुक्षुर्भावयेत् सदा ॥२॥

तत्र कारागृहं देहस्तथा देहानुबन्धिनः ।
सम्बन्धिश्च विज्ञेया भार्यापुत्रादयः खलु ॥३॥

तत्रस्था अवगन्तव्या अहन्ताममतादयः ।
आवरणं तथा चाशाऽविवेको निगड़ो मतः ॥४॥

दशेन्द्रियाणि बोध्यानि तत्रस्था अधिकारिणः।
आलम्बनं मनो ज्ञेयं बद्धोऽहं स्वेन कर्मणा॥५॥

मोचको मम तस्माद्धि श्रीरामः सकलेश्वरः ।
मुमुक्षुर्भावयेदेवं काराबद्धं निजं सदा ॥६॥

इति जगद्गुरु श्रीभावान्दाचार्यकृते भावनात्रये
काराबद्धभावनात्मकः प्रथमः परिच्छेदः॥१॥

आशामहाम्बुभि: पूर्ण: संसारश्च महार्णवः ।
वायुक्षोभो मतस्तत्र विकारो मानसश्च हि ॥१॥

रागः खलु महावर्त्तो यादांसि ममतादयः ।
परम्परा बोध्यास्तत्र चाध्यात्मिकादयः ॥२॥

तनुर्भग्नः प्लवो वेद्यो भारास्तद्रक्षणादयः ।
महार्णवे तस्मिन् पतितः स्वेन कर्मणा ॥३॥

तारको मम तस्माद्वि श्रीरामः सकलेश्वरः ।
क्षुर्भावयेदेवं महाब्धौ पतितं निजम् ॥४॥

इति जगद्गुरुश्रीभावानन्दाचार्यकृते भावनात्रये
महार्णवपतितभावनात्मको द्वितीयः परिच्छेदः ॥२॥

वल्मीकं च तनुस्तत्र भुजङ्गा इन्द्रियाणि हि।
तद्विषयस्तस्य सन्निधिर्दंशनं मतम्॥१॥

विषयानुभवो व्याप्तिर्मोहो मूर्च्छा प्रकीर्त्तिता ।
भुजङ्गदष्टोऽस्मि स्वेनैव खलु कर्मणा॥२॥

विषघ्नमौषधं चात्र श्रीरामः सकलेश्वरः ।
क्षुर्भावयेदेवं सर्पदष्टं निजं सदा ॥३॥

इति जगद्गुरु श्रीभावानन्दाचार्यकृते भावनात्रये
भुजङ्गविषमूढभावनात्मकर्तृतीयः परिच्छेदः ॥३॥

रामानन्दार्यशिष्यश्रीभावानन्दार्यनिर्मितम्।
मोदावहं मुमुक्षूणां भवताद् भावनात्रयम्॥

nattvā rāmaṁ ca śrīrāmānandaṁ bhāṣyakṛtaṁ gurum।
hitāvahaṁ mumukṣūṇāṁ karōmi bhāvanātrayam ॥1॥

nijaṁ kārāgṛhē baddhaṁ patitaṁ ca mahārṇavē।
bhujaṅgaviṣamūḍhaṁ ca mumukṣurbhāvayēt sadā ॥2॥

tatra kārāgṛhaṁ dēhastathā dēhānubandhinaḥ ।
sambandhiśca vijñēyā bhāryāputrādayaḥ khalu ॥3॥

tatrasthā avagantavyā ahantāmamatādayaḥ ।
āvaraṇaṁ tathā cāśā'vivēkō nigaḍa़ō mataḥ ॥4॥

daśēndriyāṇi bōdhyāni tatrasthā adhikāriṇaḥ।
ālambanaṁ manō jñēyaṁ baddhō'haṁ svēna karmaṇā॥5॥

mōcakō mama tasmāddhi śrīrāmaḥ sakalēśvaraḥ ।
mumukṣurbhāvayēdēvaṁ kārābaddhaṁ nijaṁ sadā ॥6॥

iti jagadguru śrībhāvāndācāryakṛtē bhāvanātrayē
kārābaddhabhāvanātmakaḥ prathamaḥ paricchēdaḥ॥1॥

āśāmahāmbubhi: pūrṇa: saṁsāraśca mahārṇavaḥ ।
vāyukṣōbhō matastatra vikārō mānasaśca hi ॥1॥

rāgaḥ khalu mahāvarttō yādāṁsi mamatādayaḥ ।
paramparā bōdhyāstatra cādhyātmikādayaḥ ॥2॥

tanurbhagnaḥ plavō vēdyō bhārāstadrakṣaṇādayaḥ ।
mahārṇavē tasmin patitaḥ svēna karmaṇā ॥3॥

tārakō mama tasmādvi śrīrāmaḥ sakalēśvaraḥ ।
kṣurbhāvayēdēvaṁ mahābdhau patitaṁ nijam ॥4॥

iti jagadguruśrībhāvānandācāryakṛtē bhāvanātrayē
mahārṇavapatitabhāvanātmakō dvitīyaḥ paricchēdaḥ ॥2॥

valmīkaṁ ca tanustatra bhujaṅgā indriyāṇi hi।
tadviṣayastasya sannidhirdaṁśanaṁ matam॥1॥

viṣayānubhavō vyāptirmōhō mūrcchā prakīrttitā ।
bhujaṅgadaṣṭō'smi svēnaiva khalu karmaṇā॥2॥

viṣaghnamauṣadhaṁ cātra śrīrāmaḥ sakalēśvaraḥ ।
kṣurbhāvayēdēvaṁ sarpadaṣṭaṁ nijaṁ sadā ॥3॥

iti jagadguru śrībhāvānandācāryakṛtē bhāvanātrayē
bhujaṅgaviṣamūḍhabhāvanātmakartṛtīyaḥ paricchēdaḥ ॥3॥

rāmānandāryaśiṣyaśrībhāvānandāryanirmitam।
mōdāvahaṁ mumukṣūṇāṁ bhavatād bhāvanātrayam॥