—— पूर्वार्ध ——

भक्त भक्ति भगवंत गुरु चतुर नाम बपु एक ।
इनके पद बंदन किए नासहिं बिघ्न अनेक ॥१॥

मंगल आदि बिचारि रह बस्तु न और अनूप ।
हरिजन के जस गावते हरिजन मंगलरूप ॥२॥

संतन निर्नय कियो मथि श्रुति पुरान इतिहास ।
भजिबे को दोई सुघर कै हरि कै हरिदास ॥३॥

(श्री)अग्रदेव आज्ञा दई भक्तन के जस गाउ ।
भवसागर के तरन को नाहिन और उपाउ ॥४॥

चौबीस रूप लीला रुचिर (श्री)अग्रदास उर पद धरौ ॥
जय जय मीन बराह कमठ नरहरि बलि बावन ।
परशुराम रघुबीर कृष्ण कीरति जगपावन ॥
बुद्ध कलक्की ब्यास पृथू हरि हँस मन्वंतर ।
जग्य ऋषभ हयग्रीव ध्रुव बरदेन धन्वन्तर ॥
बदरीपति दत कपिलदेव सनकादिक करुणा करौ ।
चौबीस रूप लीला रुचिर (श्री)अग्रदास उर पद धरौ ॥५॥

चरन चिन्ह रघुबीर के संतन सदा सहायका ॥
अंकुश अंबर कुलिश कमल जव ध्वजा धेनुपद ।
शंख चक्र स्वस्तीक जम्बुफल कलस सुधाह्रद ॥
अर्धचंद्र षटकोन मीन बिँदु ऊरधरेषा ।
अष्टकोन त्रयकोन इंद्र धनु पुरुष बिशेषा ॥
सीतापतिपद नित बसत एते मंगलदायका ।
चरन चिन्ह रघुबीर के संतन सदा सहायका ॥६॥

इनकी कृपा और पुनि समुझे द्वादस भक्त प्रधान ॥
बिधि नारद शंकर सनकादिक कपिलदेव मनु भूप ।
नरहरिदास जनक भीषम बलि शुकमुनि धर्मस्वरूप ॥
अन्तरंग अनुचर हरिजू के जो इनको जस गावै ।
आदि अंतलौं मंगल तिनको श्रोता बक्ता पावै ॥
अजामेल परसंग यह निर्णय परम धर्म के जान ।
इनकी कृपा और पुनि समुझे द्वादस भक्त प्रधान ॥७॥

मो चित्तबृत्ति नित तहँ रहो जहँ नारायण पारषद ॥
बिष्वक्सेन जय बिजय प्रबल बल मंगलकारी ।
नंद सुनंद सुभद्र भद्र जग आमयहारी ॥
चंड प्रचंड बिनीत कुमुद कुमुदाच्छ करुणालय ।
शील सुशील सुषेण भाव भक्तन प्रतिपालय ॥
लक्ष्मीपति प्रीणन प्रबीन भजनानँद भक्तन सुहृद ।
मो चित्तबृत्ति नित तहँ रहो जहँ नारायण पारषद ॥८॥

हरिबल्लभ सब प्रारथों (जिन) चरनरेनु आशा धरी ॥
कमला गरुड सुनंद आदि षोडस प्रभुपदरति ।
(हनुमंत) जामवंत सुग्रीव विभीषण शबरी खगपति ॥
ध्रुव उद्धव अँबरीष बिदुर अक्रूर सुदामा ।
चंद्रहास चित्रकेतु ग्राह गज पांडव नामा ॥
कौषारव कुंतीबधू पट ऐंचत लज्जाहरी ।
हरिबल्लभ सब प्रारथों (जिन) चरनरेनु आशा धरी ॥९॥

पदपंकज बाँछौं सदा जिनके हरि उर नित बसैं ॥
योगेश्वर श्रुतदेव अंग मुचु(कुंद) प्रियब्रत जेता ।
पृथू परीक्षित शेष सूत शौनक परचेता ॥
शतरूपा त्रय सुता सुनीति सति सबहि मँदालस ।
जग्यपत्नि ब्रजनारि किये केशव अपने बस ॥
ऐसे नर नारी जिते तिनही के गाऊँ जसैं ।
पदपंकज बाँछौं सदा जिनके हरि उर नित बसैं ॥१०॥

अंघ्री अम्बुज पांसु को जन्म जन्म हौं जाचिहौं ॥
प्राचीनबर्हि सत्यब्रत रहूगण सगर भगीरथ ।
बाल्मीकि मिथिलेस गए जे जे गोबिँद पथ ॥
रुक्मांगद हरिचंद भरत दधीचि उदारा ।
सुरथ सुधन्वा शिबिर सुमति अति बलिकी दारा ॥
नील मोरध्वज ताम्रध्वज अलरक कीरति राचिहौं ।
अंघ्री अम्बुज पांसु को जन्म जन्म हौं जाचिहौं ॥११॥

तिन चरन धूरी मो भूरि सिर जे जे हरिमाया तरे ॥
रिभु इक्ष्वाकु अरु ऐल गाधि रघु रै गै सुचि शतधन्वा ।
अमूरति अरु रन्ति उतंक भूरि देवल वैवस्वतमन्वा ॥
नहुष जजाति दिलीप पुरु जदु गुह मान्धाता ।
पिप्पल निमि भरद्वाज दच्छ सरभंग सँघाता ॥
संजय समीक उत्तानपाद जाग्यबल्क्य जस जग भरे ।
तिन चरन धूरी मो भूरि सिर जे जे हरिमाया तरे ॥१२॥

निमि अरु नव योगेश्वरा पादत्रान की हौं सरन ॥
कबि हरि करभाजन भक्तिरत्नाकर भारी ।
अन्तरिच्छ अरु चमस अनन्यता पधति उधारी ॥
प्रबुध प्रेम की रासि भूरिदा आबिरहोता ।
पिप्पल द्रुमिल प्रसिद्ध भवाब्धि पार के पोता ॥
जयंतीनंदन जगत के त्रिबिध ताप आमयहरन ।
निमि अरु नव योगेश्वरा पादत्रान की हौं सरन ॥१३॥

पदपराग करुना करौ जे नेता नवधा भक्ति के ॥
श्रवन परीच्छित सुमति व्याससावक कीरंतन ।
सुठि सुमिरन प्रहलाद पृथु पूजा कमला चरननि मन ॥
बंदन सुफलक सुबन दास दीपत्ति कपीश्वर ।
सख्यत्वे पारथ समर्पन आतम बलिधर ॥
उपजीवी इन नाम के एते त्राता अगतिके ।
पदपराग करुना करौ जे नेता नवधा भक्ति के ॥१४॥

हरिप्रसाद रस स्वाद के भक्त इते परमान ॥
शंकर शुक सनकादि कपिल नारद हनुमाना ।
बिष्वक्सेन प्रह्लाद बली भीषम जग जाना ॥
अर्जुन ध्रुव अँबरीष विभीषण महिमा भारी ।
अनुरागी अक्रूर सदा उद्धव अधिकारी ॥
भगवंत भुक्त अवशिष्ट की कीरति कहत सुजान ।
हरिप्रसाद रस स्वाद के भक्त इते परमान ॥१५॥

ध्यान चतुर्भुज चित धर्यो तिनहिं सरन हौं अनुसरौं ॥
अगस्त्य पुलस्त्य पुलह च्यबन बसिष्ठ सौभरि ऋषि ।
कर्दम अत्रि ऋचीक गर्ग गौतम ब्यासशिषि ॥
लोमस भृगु दालभ्य अंगिरा श‍ृंगि प्रकासी ।
मांडव्य बिश्वामित्र दुर्बासा सहस अठासी ॥
जाबालि जमदग्नि मायादर्श कश्यप परबत पाराशर पदरज धरौं ।
ध्यान चतुर्भुज चित धर्यो तिनहिं सरन हौं अनुसरौं ॥१६॥

साधन साध्य सत्रह पुराण फलरूपी श्रीभागवत ॥
ब्रह्म विष्णु शिव लिंग पदम अस्कँद बिस्तारा ।
बामन मीन बराह अग्नि कूरम ऊदारा ॥
गरुड नारदी भविष्य ब्रह्मबैबर्त श्रवण शुचि ।
मार्कंडेय ब्रह्मांड कथा नाना उपजे रुचि ॥
परम धर्म श्रीमुखकथित चतुःश्लोकी निगम शत ।
साधन साध्य सत्रह पुराण फलरूपी श्रीभागवत ॥१७॥

दस आठ स्मृति जिन उच्चरी तिन पद सरसिज भाल मो ॥
मनुस्मृति आत्रेय वैष्णवी हारीतक जामी ।
जाग्यबल्क्य अंगिरा शनैश्चर सांवर्तक नामी ॥
कात्यायनि शांडिल्य गौतमी बासिष्ठी दाषी ।
सुरगुरु शातातापि पराशर क्रतु मुनि भाषी ॥
आशा पास उदारधी परलोक लोक साधन सो ।
दस आठ स्मृति जिन उच्चरी तिन पद सरसिज भाल मो ॥१८॥

पावैं भक्ति अनपायिनी जे रामसचिव सुमिरन करैं ॥
धृष्टी बिजय जयंत नीतिपर सुचि सुबिनीता ।
राष्टरबर्धन निपुण सुराष्टर परम पुनीता ॥
अशोक सदा आनंद धर्मपालक तत्त्ववेता ।
मंत्रीवर्य सुमंत्र चतुर्जुग मंत्री जेता ॥
अनायास रघुपति प्रसन्न भवसागर दुस्तर तरैं ।
पावैं भक्ति अनपायिनी जे रामसचिव सुमिरन करैं ॥१९॥

शुभ दृष्टि वृष्टि मोपर करौ जे सहचर रघुवीर के ॥
दिनकरसुत हरिराज बालिबछ केसरि औरस ।
दधिमुख द्विबिद मयंद रीछपति सम को पौरस ॥
उल्कासुभट सुषेन दरीमुख कुमुद नील नल ।
शरभर गवय गवाच्छ पनस गँधमादन अतिबल ॥
पद्म अठारह यूथपति रामकाज भट भीर के ।
शुभ दृष्टि वृष्टि मोपर करौ जे सहचर रघुवीर के ॥२०॥

ब्रज बड़ए गोप पर्जन्य के सुत नीके नव नंद ॥
धरानंद ध्रुवनंद तृतिय उपनंद सुनागर ।
चतुर्थ तहाँ अभिनंद नंद सुखसिंधु उजागर ॥
सुठि सुनंद पशुपाल निर्मल निश्चय अभिनंदन ।
कर्मा धर्मानंद अनुज बल्लभ जगबंदन ॥
आसपास वा बगर के जहँ बिहरत पसुप स्वछंद ।
ब्रज बड़ए गोप पर्जन्य के सुत नीके नव नंद ॥२१॥

बाल बृद्ध नर नारि गोप हौं अर्थी उन पाद रज ॥
नंदगोप उपनंद ध्रुव धरानंद महरि जसोदा ।
कीरतिदा वृषभानु कुँवरि सहचरि मन मोदा ॥
मधुमंगल सुबल सुबाहु भोज अर्जुन श्रीदामा ।
मंडलि ग्वाल अनेक श्याम संगी बहु नामा ॥
घोष निवासिनि की कृपा सुर नर बाँछित आदि अज ।
बाल बृद्ध नर नारि गोप हौं अर्थी उन पाद रज ॥२२॥

ब्रजराजसुवन सँग सदन मन अनुग सदा तत्पर रहैं ॥
रक्तक पत्रक और पत्रि सबही मन भावैं ।
मधुकंठी मधुवर्त रसाल बिसाल सुहावैं ॥
प्रेमकंद मकरंद सदा आनँद चँदहासा ।
पयद बकुल रसदान सारदा बुद्धि प्रकासा ॥
सेवा समय बिचारिकै चारु चतुर चित की लहैं ।
ब्रजराजसुवन सँग सदन मन अनुग सदा तत्पर रहैं ॥२३॥

सप्त द्वीप में दास जे ते मेरे सिरताज ॥
जम्बुद्वीप अरु प्लच्छ सालमलि बहुत राजरिषि ।
कुस पबित्र पुनि क्रौंच कौन महिमा जाने लिखि ॥
साक बिपुल बिस्तार प्रसिद्ध नामी अति पुहकर ।
पर्बत लोकालोक ओक टापू कंचनघर ॥
हरिभृत्य बसत जे जे जहाँ तिन सन नित प्रति काज ।
सप्त द्वीप में दास जे ते मेरे सिरताज ॥२४॥

मध्यदीप नवखंड में भक्त जिते मम भूप ॥
इलाबर्त आधीस संकरषन अनुग सदाशिव ।
रमनक मछ मनु दास हिरन्य कूर्म अर्जम इव ॥
कुरु बराह भूभृत्य बर्ष हरिसिंह प्रहलादा ।
किंपुरुष राम कपि भरत नरायन बीनानादा ॥
भद्राश्व ग्रीवहय भद्रश्रव केतु काम कमला अनूप ।
मध्यदीप नवखंड में भक्त जिते मम भूप ॥२५॥

श्वेतद्वीप के दास जे श्रवन सुनो तिनकी कथा ॥
श्रीनारायन बदन निरंतर ताही देखैं ।
पलक परै जो बीच कोटि जमजातन लेखैं ॥
तिनके दरसन काज गए तहँ बीनाधारी ।
श्याम दई कर सैन उलटि अब नहिं अधिकारी ॥
नारायन आख्यान दृढ़ तहँ प्रसंग नाहिन तथा ।
श्वेतद्वीप के दास जे श्रवन सुनो तिनकी कथा ॥२६॥

उरग अष्टकुल द्वारपति सावधान हरिधाम थिति ॥
इलापत्र मुख अनँत अनँत कीरति बिस्तारत ।
पद्म संकु पन प्रगट ध्यान उरते नहीं टारत ॥
अँशुकंबल बासुकी अजित आग्या अनुबरती ।
करकोटक तच्छक सुभट्ट सेवा सिर धरती ॥
आगमोक्त शिवसंहिता अगर एकरस भजन रति ।
उरग अष्टकुल द्वारपति सावधान हरिधाम थिति ॥२७॥

—— उत्तरार्ध ——

रामानन्द उदार, सुधानिधि अवनि कल्पतरु ।
विष्णुस्वामी बोहित्थ सिन्धु संसार पार करु ॥
मध्वाचारज मेघ भक्ति सर ऊसर भरिया ।
निम्बादिति आदित्य, कुहर अज्ञान जु हरिया ॥
जनम करम भागवत धरम संप्रदाय थापी अघट ।
चौबीस प्रथम हरि बपु धरे त्यों चतुर्व्यूह कलिजुग प्रगट ॥२८॥

रामानन्द श्रीपद्धति, विष्णु स्वामि त्रिपुरारि ।
निम्बादित्य सनकादिक, मधुकर गुरु मुख चारि ॥२९॥

सँप्रदाय सिरोमनि सिंधुजा रच्यो भक्ति बित्तान ॥
बिष्वकसेन मुनिवर्य सुपुनि शठकोप प्रनीता ।
बोपदेव भागवत लुप्त उधर्यो नवनीता ॥
मंगल मुनि श्रीनाथ पुंडरीकाच्छ परमजस ।
राममिश्र रसरासि प्रगट परताप परांकुस ॥
यामुन मुनि रामानुज तिमिरहरन उदय भान ।
सँप्रदाय सिरोमनि सिंधुजा रच्यो भक्ति बित्तान ॥३०॥

सहस आस्य उपदेस करि जगत उद्धरन जतन कियो ॥
गोपुर ह्वै आरूढ़ उच्च स्वर मंत्र उचार्यो ।
सूते नर परे जागि बहत्तरि श्रवननि धार्यो ॥
तितनेई गुरुदेव पधति भई न्यारी न्यारी ।
कुर तारक सिष प्रथम भक्ति बपु मंगलकारी ॥
कृपनपाल करुणा समुद्र रामानुज सम नहीं बियो ।
सहस आस्य उपदेस करि जगत उद्धरन जतन कियो ॥३१॥

चतुर महंत दिग्गज चतुर भक्ति भूमि दाबे रहैं ॥
श्रुतिप्रज्ञा श्रुतिदेव ऋषभ पुहकर इभ ऐसे ।
श्रुतिधामा श्रुतिउदधि पराजित बामन जैसे ॥
रामानुज गुरुबंधु बिदित जग मंगलकारी ।
शिवसंहिता प्रनीत ग्यान सनकादिक सारी ॥
इँदिरा पधति उदारधी सभा साखि सारँग कहैं ।
चतुर महंत दिग्गज चतुर भक्ति भूमि दाबे रहैं ॥३२॥

आचारज जामात की कथा सुनत हरि होइ रति ॥
मालाधारी मृतक बह्यो सरिता में आयो ।
दाहकृत्य ज्यों बंधु न्यौति सब कुटुँब बुलायो ॥
नाक सँकोचहिं बिप्र तबहिं हरिपुर जन आए ।
जेंवत देखे सबनि जात काहू नहिं पाए ॥
लालाचारज लक्षधा प्रचुर भई महिमा जगति ।
आचारज जामात की कथा सुनत हरि होइ रति ॥३३॥

श्रीमारग उपदेश कृत श्रवन सुनौ आख्यान सुचि ॥
गुरू गमन (कियो) परदेश सिष्य सुरधुनी दृढ़िआई ।
एक मज्जन एक पान हृदय बंदना कराई ॥
गुरु गंगा में प्रबिसि सिष्य को बेगि बुलायो ।
विष्णुपदी भय मानि कमलपत्रन पर धायो ॥
पादपद्म ता दिन प्रगट सब प्रसन्न मुनि परम रुचि ।
श्रीमारग उपदेश कृत श्रवन सुनौ आख्यान सुचि ॥३४॥

(श्री)रामानन्द पद्धति प्रताप अवनि अमृत ह्वै अवतर्यो ॥
देवाचारज दुतिय महामहिमा हरियानँद ।
तस्य राघवानंद भये भक्तन को मानद ॥
पृथ्वी पत्रावलम्ब करी कासी अस्थायी ।
चारि बरन आश्रम सबही को भक्ति दृढ़िआई ॥
तिन के रामानन्द प्रगट बिश्वमंगल जिन बपु धर्यो ।
(श्री)रामानन्द पद्धति प्रताप अवनि अमृत ह्वै अवतर्यो ॥३५॥

(श्री)रामानन्द रघुनाथ ज्यों दुतिय सेतु जगतरन कियो ॥
अनंतानंद कबीर सुखा सुरसुरा पद्मावती नरहरी ।
पीपा भावानंद रैदास धना सेन सुरसुर की घरहरी ॥
औरो सिष्य प्रसिष्य एक ते एक उजागर ।
जगमंगल आधार भक्ति दसधा के आगर ॥
बहुत काल बपु धारी के प्रनत जनन को पार दियो ।
(श्री)रामानन्द रघुनाथ ज्यों दुतिय सेतु जगतरन कियो ॥३६॥

अनंतानंद पद परसि कै लोकपाल से ते भये ॥
जोगानंद गयेस करमचँद अल्ह पैहारी ।
सारिरामदास श्रीरंग अवधि गुन महिमा भारी ॥
तिनके नरहरि उदित मुदित मेघा मंगलतन ।
रघुबर जदुबर गाइ विमल कीरति संच्यो धन ॥
हरिभक्ति सिन्धुबेला रचे पानि पद्मजा सिर दये ।
अनंतानंद पद परसि कै लोकपाल से ते भये ॥३७॥

निर्वेद अवधि कलि कृष्णदास अन परिहरि पय पान कियो ॥
जाके सिर कर धर्यो तासु कर तर नहीं आड्यो ।
अर्प्यो पद निर्बान सोक निर्भय करि छाड्यो ॥
तेजपुंज बल भजन महामुनि ऊरधरेता ।
सेवत चरनसरोज राय राना भुवि जेता ॥
दाहिमा बंस दिनकर उदय संत कमल हिय सुख दियो ।
निर्वेद अवधि कलि कृष्णदास अन परिहरी पय पान कियो ॥३८॥

पैहारी परसाद तें सिष्य सबै भए पारकर ॥
कील्ह अगर केवल्ल चरनब्रत हठी नरायन ।
सूरज पुरुषा पृथू त्रिपुर हरिभक्ति परायन ॥
पद्मनाभ गोपाल टेक टीला गदाधारी ।
देवा हेम कल्यान गंग गंगासम नारी ॥
विष्णुदास कन्हर रँगा चाँदन सबिरी गोबिँद पर ।
पैहारी परसाद तें सिष्य सबै भए पारकर ॥३९॥

गांगेय मृत्यु गंज्यो नहीं त्यों कील्ह करन नहिं काल बस ॥
राम चरन चिंतवनि रहति निसि दिन लौ लागी ।
सर्वभूत सिर नमित सूर भजनानँद भागी ॥
सांख्य जोग मत सुदृढ़ कियो अनुभव हस्तामल ।
ब्रह्मरंध्र करि गमन भए हरितन करनी बल ॥
सुमेरदेवसुत जगबिदित भू बिस्तार्यो बिमल जस ।
गांगेय मृत्यु गंज्यो नहीं त्यों कील्ह करन नहिं काल बस ॥४०॥

(श्री)अग्रदास हरिभजन बिन काल बृथा नहिं बित्तयो ॥
सदाचार ज्यों संत प्राप्त जैसे करि आये ।
सेवा सुमिरन सावधान (चरन) राघव चित लाये ॥
प्रसिध बाग सों प्रीति स्वहथ कृत करत निरंतर ।
रसना निर्मल नाम मनहु बरषत धाराधर ।
(श्री)कृष्णदास कृपा करि भक्ति दत मन बच क्रम करि अटल दयो ।
(श्री)अग्रदास हरिभजन बिन काल वृथा नहिं बित्तयो ॥४१॥

कलिजुग धर्मपालक प्रगट आचारज शंकर सुभट ॥
उच्छृंखल अग्यान जिते अनईश्वरवादी ।
बौद्ध कुतर्की जैन और पाखंडहि आदि ॥
बिमुखन को दियो दंड ऐंचि सन्मारग आने ।
सदाचार की सींव बिश्व कीरतिहिं बखाने ॥
ईश्वरांस अवतार महि मर्यादा माँडी अघट ।
कलिजुग धर्मपालक प्रगट आचारज शंकर सुभट ॥४२॥

नामदेव प्रतिग्या निर्बही (ज्यों) त्रेता नरहरिदास की ॥
बालदसा बिट्ठल पानि जाके पय पीयो ।
मृतक गऊ जिवाय परचौ असुरन को दीयो ॥
सेज सलिल ते काढ़ै पहिले जैसी ही होती ।
देवल उल्ट्यो देखि सकुचि रहे सबही सोती ॥
पँडुरनाथ कृत अनुग ज्यों छानि स्वकर छै घास की ।
नामदेव प्रतिग्या निर्बही (ज्यों) त्रेता नरहरिदास की ॥४३॥

जयदेव कबी नृपचक्कवै खँडमँडलेश्वर आन कबि ॥
प्रचुर भयो तिहुँ लोक गीतगोविन्द उजागर ।
कोक काव्य नवरस सरस श‍ृंगार को सागर ॥
अष्टपदी अभ्यास करै तेहि बुद्धि बढ़आवै ।
राधारमन प्रसन्न सुनत तहँ निश्चय आवै ॥
संत सरोरुह खंड को पद्मापति सुखजनक रबि ।
जयदेव कबी नृपचक्कवै खँडमँडलेश्वर आन कबि ॥४४॥

श्रीधर श्रीभागवत में परम धरम निरनय कियो ॥
तीनि कांड एकत्व सानि कोउ अग्य बखानत ।
कर्मठ ज्ञानी ऐंचि अर्थ को अनरथ बानत ॥
परमहंस संहिता बिदित टीका बिस्तार्यो ।
षट सास्त्र अविरुद्ध वेद संमत हि बिचार्यो ॥
परमानन्द प्रसाद ते माधो स्वकर सुधार दियो ।
श्रीधर श्रीभागवत में परम धरम निरनय कियो ॥४५॥

कृष्ण कृपा कोपर प्रगट बिल्वमंगल मंगलस्वरूप ॥
करुनामृत सुकबित्त जुक्ति अनुछिष्ट उचारी ।
रसिक जनन जीवन जु हृदय हारावलि धारी ॥
हरि पकरायो हाथ बहुरि तहँ लियो छुटाई ।
कहा भयो कर छुटैं बदौं जो हियतें जाई ॥
चिंतामनि सँग पाइ कै ब्रजबधु केली बरनि अनूप ।
कृष्ण कृपा कोपर प्रगट बिल्वमंगल मंगलस्वरूप ॥४६॥

कलिजीव जँजाली कारने विष्णुपुरी बड़इ निधि सची ॥
भगवत धर्म उतंग आन धर्म आन न देखा ।
पीतर पटतर बिगत निकष ज्यों कुंदनरेखा ॥
कृष्णकृपा कहि बेलि फलित सत्संग दिखायो ।
कोटि ग्रंथ को अर्थ तेरह बिरचन में गायो ॥
महासमुद्र भागवत तें भक्ति रत्न राजी रची ।
कलिजीव जँजाली कारने विष्णुपुरी बड़इ निधि सची ॥४७॥

विष्णुस्वामि सँप्रदाय दृढ़ ज्ञानदेव गंभीरमति ॥
नाम त्रिलोचन सिष्य सूर ससि सदृस उजागर ।
गिरा गंग उन्हारि काब्य रचना प्रेमाकर ॥
आचारज हरिदास अतुल बल आनँददायन ।
तेहिं मारग बल्लभ बिदित पृथु पधति परायन ॥
नवधा प्रधान सेवा सुदृढ़ मन बच क्रम हरिचरन रति ।
विष्णुस्वामि सँप्रदाय दृढ़ ज्ञानदेव गंभीरमति ॥४८॥

संतसाखि जानत सबै प्रगट प्रेम कलिजुग प्रधान ॥
भक्तदास इक भूप श्रवन सीता हर कीनो ।
मार मार करि खड्ग बाजि सागर मँह दीनो ॥
नरसिँह को अनुकरन होइ हिरनाकुस मार्यो ।
वहै भयो दसरथहि राम बिछुरत तन छार्यो ॥
कृष्ण दाम बांधे सुने तेहि छन दीयो प्रान ।
संतसाखि जानत सबै प्रगट प्रेम कलिजुग प्रधान ॥४९॥

प्रसाद अवग्या जानि कै पानि तज्यो एकै नृपति ॥
हौं का कहौं बनाइ बात सबही जग जाने ।
करते दौना भयो स्याम सौरभ सुख माने ॥
छपन भोगतें पहिल खीच करमा की भावे ।
सिलपिल्ले के कहत कुँअरि पै हरि चलि आवे ॥
भक्तन हित सुत विष दियो भूपनारि प्रभु राखि पति ।
प्रसाद अवग्या जानि कै पानि तज्यो एकै नृपति ॥५०॥

आसय अगाध दुहुँ भक्त को हरितोषन अतिसय कियो ॥
रंगनाथ को सदन करन बहु बुद्धि बिचारी ।
कपट धर्म रचि जैन द्रव्य हित देह बिसारी ॥
हंस पकरने काज बधिक बानौं धरि आए ।
तिलक दाम की सकुच जानि तिहिं आप बँधाए ॥
सुतबध हरिजन देखि कै दै कन्या आदर दियो ।
आसय अगाध दुहुँ भक्त को हरितोषन अतिसय कियो ॥५१॥

चारों जुग चतुर्भुज सदा भक्त गिरा साँची करन ॥
दारुमयी तरवार सारमय रची भुवन की ।
देवा हित सित केस प्रतिग्या राखी जन की ॥
कमधुज के कपि चारु चिता पर काष्ठ जु ल्याए ।
जैमल के जुध माहिं अश्व चढ़ै आपुन धाए ॥
घृत सहित भैंस चौगुनी श्रीधर सँग सायक धरन ।
चारों जुग चतुर्भुज सदा भक्तगिरा साँची करन ॥५२॥

भक्तन सँग भगवान नित ज्यों गौ बछ गोहन फिरैं ॥
निहिकिंचन इक दास तासु के हरिजन आये ।
बिदित बटोही रूप भये हरि आप लुटाये ॥
साखि देन को स्याम खुरदहा प्रभुहि पधारे ।
रामदास के सदन राय रनछोर सिधारे ॥
आयुध छत तन अनुग के बलि बंधन अपबपु धरैं ।
भक्तन सँग भगवान नित ज्यों गौ बछ गोहन फिरैं ॥५३॥

बच्छहरन पाछें बिदित सुनो संत अचरज भयो ॥
जसू स्वामि के वृषभ चोरि ब्रजबासी ल्याये ।
तैसेई दिए स्याम बरष दिन खेत जुताये ॥
नामा ज्यों नँददास मुई इक बच्छि जिवाई ।
अंब अल्ह को नये प्रसिध जग गाथा गाई ॥
बारमुखी के मुकुट को रंगनाथ को सिर नयो ।
बच्छहरन पाछें बिदित सुनो संत अचरज भयो ॥५४॥

और जुगन ते कमलनयन कलिजुग बहुत कृपा करी ॥
बीच दिए रघुनाथ भक्त सँग ठगिया लागे ।
निर्जन बन में जाय दुष्ट क्रम किये अभागे ॥
बीच दियो सो कहाँ राम कहि नारि पुकारी ।
आए सारँगपानि सोकसागर ते तारी ॥
दुष्ट किये निर्जीव सब दासप्रान संज्ञा धरी ।
और जुगन ते कमलनयन कलिजुग बहुत कृपा करी ॥५५॥

एक भूप भागवत की कथा सुनत हरि होय रति ॥
तिलक दाम धरि कोइ ताहि गुरु गोबिँद जानै ।
षटदर्शनी अभाव सर्वथा घटि करि मानै ॥
भाँड भक्त को भेष हाँसि हित भँडकुट ल्याये ।
नरपति के दृढ़ि नेम ताहि ये पाँव धुवाये ॥
भाँड भेष गाढ़ो गह्यो दरस परस उपजी भगति ।
एक भूप भागवत की कथा सुनत हरि होय रति ॥५६॥

अंतरनिष्ठ नृपाल इक परम धरम नाहिन धुजी ॥
हरि सुमिरन हरि ध्यान आन काहू न जनावै ।
अलग न इहि बिधि रहै अंगना मरम न पावै ॥
निद्राबस सो भूप बदन तें नाम उचार्यो ।
रानी पति पै रीझि बहुत बसु तापर वार्यो ॥
ऋषिराज सोचि कह्यो नारि सों आजु भगति मोरी कुजी ।
अंतरनिष्ठ नृपाल इक परम धरम नाहिन धुजी ॥५७॥

गुरु गदित बचन सिष सत्य अति दृढ़ि प्रतीति गाढ़ो गह्यो ॥
अनुचर आग्या माँगि कह्यो कारज को जैहों ।
आचारज इक बात तोहिं आए ते कहिहौं ॥
स्वामी रह्यो समाय दास दरसन को आयो ।
गुरु गिरा मान बिस्वास फेरि सब घर को ल्यायो ॥
सिषपन साँचो करन हित बिभु सबै सुनत सोई कह्यो ।
गुरु गदित बचन सिष सत्य अति दृढ़ि प्रतीति गाढ़ो गह्यो ॥५८॥

संदेह ग्रंथि खंडन निपुन बानि बिमल रैदास की ॥
सदाचार श्रुति सास्त्र बचन अविरुद्ध उचार्यो ।
नीर क्षीर बिबरन परमहंसनि उर धार्यो ॥
भगवत कृपा प्रसाद परम गति इहि तन पाई ।
राजसिंहासन बैठि ग्याति परतीति दिखाई ॥
बरनाश्रम अभिमान तजि पद रज बंदहिं जास की ।
संदेह ग्रंथि खंडन निपुन बानि बिमल रैदास की ॥५९॥

कबीर कानि राखी नहीं बरनाश्रम षटदरसनी ॥
भक्ति बिमुख जो धर्म सोइ अधरम करि गायो ।
जोग जग्य ब्रत दान भजन बिन तुच्छ दिखायो ॥
हिन्दू तुरुक प्रमान रमैनी सबदी साखी ।
पच्छपात नहिं बचन सबन के हित की भाखी ॥
आरूढ़ दसा ह्वै जगत पर मुखदेखी नाहिंन भनी ।
कबीर कानि राखी नहीं बरनाश्रम षटदरसनी ॥६०॥

पीपा प्रताप जग बासना नाहर को उपदेस दियो ॥
प्रथम भवानी भगत मुक्ति माँगन को धायो ।
सत्य कह्यो तिहिं सक्ति सुदृढ़ि हरि सरन बतायो ॥
(श्री)रामानँद पद पाइ भयो अति भक्ति की सीवाँ ।
गुन असंख्य निर्मोल संत राखत धरि ग्रीवाँ ॥
परस प्रनाली सरस भै सकल बिस्व मंगल कियो ।
पीपा प्रताप जग बासना नाहर को उपदेस दियो ॥६१॥

धन्य धना के भजन को बिनहि बीज अंकुर भयो ॥
घर आये हरिदास तिनहिं गोधूम खवाए ।
तात मात डर खेत थोथ लांगलहिं चलाए ॥
आस पास कृषिकार खेत की करत बड़ाई ।
भक्त भजे की रीति प्रगट परतीति जु पाई ॥
अचरज मानत जगत में कहुँ निपज्यो कहुँ वै बयो ।
धन्य धना के भजन को बिनहि बीज अंकुर भयो ॥६२॥

बिदित बात जन जानिये हरि भए सहायक सेन के ॥
प्रभू दास के काज रूप नापित को कीनो ।
छिप्र छुरहरी गही पानि दर्पन तहँ लीनो ॥
तादृस ह्वै तिहिं काल भूप के तेल लगायो ।
उलटि राव भयो सिष्य प्रगट परचो जब पायो ।
स्याम रहत सनमुख सदा ज्यों बच्छा हित धेन के ।
बिदित बात जग जानिये हरि भए सहायक सेन के ॥६३॥

भक्ति दान भय हरन भुज सुखानंद पारस परस ॥
सुखसागर की छाप राग गौरी रुचि न्यारी ।
पद रचना गुरु मंत्र गिरा आगम अनुहारी ॥
निसि दिन प्रेम प्रवाह द्रवत भूधर ज्यों निर्झर ।
हरि गुन कथा अगाध भाल राजत लीला भर ॥
संत कंज पोषन बिमल अति पियूष सरसी सरस ।
भक्ति दान भय हरन भुज सुखानंद पारस परस ॥६४॥

महिमा महाप्रसाद की सुरसुरानंद साँची करी ॥
एक समै अध्वा चलत वाक छल बरा सुपाये ।
देखा देखी सिष्य तिनहूँ पीछे ते खाये ॥
तिन पर स्वामी खिजे बमन करि बिन बिस्वासी ।
तिन तैसे प्रत्यच्छ भूमि पर कीनी रासी ॥
सुरसुरी सुबर पुनि उदगले पुहुप रेनु तुलसी हरी ।
महिमा महाप्रसाद की सुरसुरानंद साँची करी ॥६५॥

महासती सत ऊपमा त्यों सत सुरसरि को रह्यो ॥
अति उदार दंपती त्यागि गृह बन को गवने ।
अचरज भयो तहँ एक संत सुन जिन हो बिमने ॥
बैठे हुते एकांत आय असुरनि दुख दीयो ।
सुमिरे सारँगपानि रूप नरहरि को कीयो ॥
सुरसुरानंद की घरनि को सत राख्यो नरसिंह जह्यो ।
महासती सत ऊपमा त्यों सत सुरसरि को रह्यो ॥६६॥

निपट नरहरियानन्द को कर दाता दुर्गा भई ॥
झर घर लकरी नाहिं सक्ति को सदन बिदारैं ।
सक्ति भक्त सों बोलि दिनहिं प्रति बरही डारैं ॥
लगी परोसिन हौंस भवानी भ्वै सो मारैं ।
बदले की बेगारि मूँड़ वाके सिर डारैं ॥
भरत प्रसँग ज्यों कालिका लडू देखि तन में तई ।
निपट नरहरियानन्द को कर दाता दुर्गा भई ॥६७॥

कबीर कृपा तें परमतत्त्व पद्मनाभ परचै लह्यो ॥
नाम महा निधि मंत्र नाम ही सेवा पूजा ।
जप तप तीरथ नाम नाम बिन और न दूजा ॥
नाम प्रीति नाम बैर नाम कहि नामी बोले ।
नाम अजामिल साखि नाम बंधन तें खोले ॥
नाम अधिक रघुनाथ तें राम निकट हनुमत कह्यो ।
कबीर कृपा तें परमतत्त्व पद्मनाभ परचै लह्यो ॥६८॥

तत्त्वा जीवा दच्छिन देस बंसोद्धर राजत बिदित ॥
भक्ति सुधा जल समुद भए बेलावलि गाढ़ई ।
पूरबजा ज्यों रीति प्रीति उतरोतर बाढ़ई ॥
रघुकुल सदृस स्वभाव सिष्ट गुन सदा धर्मरत ।
सूर धीर ऊदार दयापर दच्छ अननिब्रत ॥
पद्मखंड पद्मा पधति प्रफुलित कर सबिता उदित ।
तत्त्वा जीवा दच्छिन देस बंसोद्धर राजत बिदित ॥६९॥

बिनय ब्यास मनो प्रगट ह्वै जग को हित माधव कियो ॥
पहिले बेद बिभाग कथित पूरान अष्टदस ।
भारतादि भागवत मथित उद्धार्यो हरिजस ॥
अब सोधे सब ग्रंथ अर्थ भाषा बिस्तार्यो ।
लीला जय जय जयति गाय भवपार उतार्यो ॥
जगन्नाथ इष्ट वैराग्य सींव करुनारस भीज्यो हियो ।
बिनय ब्यास मनो प्रगट ह्वै जग को हित माधव कियो ॥७०॥

रघुनाथ गुसाईं गरुड ज्यों सिंहपौरि ठाढ़े रहैं ॥
सीत लगत सकलात बिदित पुरुषोत्तम दीनी ।
सौच गए हरि संग कृत्य सेवक की कीनी ॥
जगन्नाथ पद प्रीति निरंतर करत खवासी ।
भगवत धर्म प्रधान प्रसन नीलाचल वासी ॥
उत्कल देस उड़ईसा नगर बैनतेय सब कोउ कहै ।
रघुनाथ गुसाईं गरुड़ ज्यों सिंहपौरि ठाढ़े रहैं ॥७१॥

नित्यानन्द कृष्ण­चैतन्य की भक्ति दसों दिसि बिस्तरी ॥
गौडदेस पाखंड मेटि कियो भजन परायन ।
करुनासिंधु कृतग्य भये अगतिन गति दायन ॥
दसधा रस आक्रांत महत जन चरन उपासे ।
नाम लेत निष्पाप दुरित तिहि नर के नासे ॥
अवतार बिदित पूरब मही उभय महत देही धरी ।
नित्यानन्द कृष्ण­चैतन्य की भक्ति दसों दिसि बिस्तरी ॥७२॥

सूर कबित सुनि कौन कबि जो नहिं सिरचालन करैं ॥
उक्ति चोज अनुप्रास बरन अस्थिति अति भारी ।
बचन प्रीति निर्बाह अर्थ अद्भुत तुक धारी ॥
प्रतिबिंबित दिवि दृष्टि हृदय हरिलीला भासी ।
जनम करम गुन रूप सबै रसना परकासी ॥
बिमल बुद्धि गुन और की जो यह गुन श्रवननि धरैं ।
सूर कबित सुनि कौन कबि जो नहिं सिरचालन करैं ॥७३॥

ब्रजबधू रीति कलिजुग बिषे परमानँद भयो प्रेम केत ॥
पौगंड बाल कैसोर गोपलीला सब गाई ।
अचरज कह यह बात हुतौ पहिले जु सखाई ॥
नयनन नीर प्रवाह रहत रोमांच रैन दिन ।
गदगद गिरा उदार स्याम सोभा भीज्यो तन ॥
सारंग छाप ताकी भई श्रवन सुनत आबेस देत ।
ब्रजबधू रीति कलिजुग बिषे परमानँद भयो प्रेम केत ॥७४॥

केसवभट नर मुकुटमनि जिनकी प्रभुता बिस्तरी ॥
कासमीर की छाप पाप तापन जग मंडन ।
दृढ़ि हरिभगति कुठार आन धर्म बिटप बिहंडन ॥
मथुरा मध्य मलेच्छ बाद करि बरबट जीते ।
काजी अजित अनेक देखि परचै भयभीते ॥
बिदित बात संसार सब संत साखि नाहिंन दुरी ।
केसवभट नर मुकुटमनि जिनकी प्रभुता बिस्तरी ॥७५॥

श्रीभट्ट सुभट प्रगटे अघट रस रसिकन मनमोद घन ॥
मधुरभाव संबलित ललित लीला सुबलित छबि ।
निरखत हरषत हृदय प्रेम बरषत सुकलित कबि ॥
भव निस्तारन हेतु देत दृढ़ि भक्ति सबनि नित ।
जासु सुजस ससि उदय हरत अति तम भ्रम श्रम चित ॥
आनंदकंद श्रीनंदसुत श्रीवृषभानुसुता भजन ।
श्रीभट्ट सुभट प्रगटे अघट रस रसिकन मनमोद घन ॥७६॥

हरिब्यास तेज हरिभजन बल देवी को दीच्छा दई ॥
खेचरि नर की सिष्य निपट अचरज यह आवै ।
बिदित बात संसार संत मुख कीरति गावै ॥
बैरागिन के बृंद रहत सँग स्याम सनेही ।
नव योगेश्वर मध्य मनहुँ सोभित बैदेही ॥
श्रीभट्ट चरन रज परस तें सकल सृष्टि जाको नई ।
हरिब्यास तेज हरिभजन बल देवी को दीच्छा दई ॥७७॥

अज्ञानध्वांत अंतःकरन दुतिय दिवाकर अवतर्यो ॥
उपदेसे नृप सिंह रहत नित आज्ञाकारी ।
पक्व बृच्छ ज्यों नाय संत पोषक उपकारी ॥
बानी भोलाराम सुहृद सबहिन पर छाया ।
भक्त चरनरज जाँचि बिसद राघव गुन गाया ॥
करमचंद कश्यप सदन बहुरि आय मनो बपु धर्यो ।
अज्ञानध्वांत अंतःकरन दुतिय दिवाकर अवतर्यो ॥७८॥

बिट्ठलनाथ ब्रजराज ज्यों लाड़ लड़ाय कै सुख लियो ॥
राग भोग नित बिबिध रहत परिचर्या तत्पर ।
सय्या भूषन बसन रचित रचना अपने कर ॥
वह गोकुल वह नंदसदन दीच्छित को सोहै ।
प्रगट बिभव जहँ घोष देखि सुरपति मन मोहै ॥
बल्लभसुत बल भजन के कलिजुग में द्वापर कियो ।
बिट्ठलनाथ ब्रजराज ज्यों लाड़ लड़ाय कै सुख लियो ॥७९॥

(श्री)बिट्ठलेससुत सुहृद श्रीगोबर्धनधर ध्याइये ॥
श्रीगिरिधरजू सरस सील गोबिंदजु साथहिं ।
बालकृष्ण जस बीर धीर श्रीगोकुलनाथहिं ॥
श्रीरघुनाथजु महाराज श्रीजदुनाथहिं भजि ।
श्रीघनश्यामजु पगे प्रभू अनुरागी सुधि सजि ॥
ए सात प्रगट बिभु भजन जग तारन तस जस गाइये ।
(श्री)बिट्ठलेससुत सुहृद श्रीगोबर्धनधर ध्याइये ॥८०॥

गिरिधरन रीझि कृष्णदास को नाम माँझ साझो दियो ॥
श्रीबल्लभ गुरुदत्त भजनसागर गुन आगर ।
कबित नोख निर्दोष नाथसेवा में नागर ॥
बानी बंदित बिदुष सुजस गोपाल अलंकृत ।
ब्रजरज अति आराध्य वहै धारी सर्बसु चित ॥
सान्निध्य सदा हरिदासबर गौरश्याम दृढ़ि ब्रत लियो ।
गिरिधरन रीझि कृष्णदास को नाम माँझ साझो दियो ॥८१॥

बर्धमान गंगल गँभीर उभय थंभ हरिभक्ति के ॥
श्रीभागवत बखानि अमृतमय नदी बहाई ।
अमल करी सब अवनि तापहारक सुखदाई ॥
भक्तन सों अनुराग दीन सों परम दयाकर ।
भजन जसोदानंद संत संघट के आगर ॥
भीषम भट अंगज उदार कलियुग दाता सुगति के ।
बर्धमान गंगल गँभीर उभय थंभ हरिभक्ति के ॥८२॥

रामदास परताप तें खेम गुसाईं खेमकर ॥
रघुनंदन को दास प्रगट भूमंडल जानै ।
सर्बस सीताराम और कछु उर नहिं आनै ॥
धनुष बान सों प्रीति स्वामि के आयुध प्यारे ।
निकट निरंतर रहत होत कबहूँ नहिं न्यारे ॥
शूरवीर हनुमत सदृस परम उपासक प्रेमभर ।
रामदास परताप तें खेम गुसाईं खेमकर ॥८३॥

बिट्ठलदास माथुर मुकुट भये अमानी मानदा ॥
तिलक दाम सों प्रीति गुनहिं गुन अंतर धार्यो ।
भक्तन को उत्कर्ष जनम भरि रसन उचार्यो ॥
सरल हृदय संतोष जहाँ तहँ पर उपकारी ।
उत्सव में सुत दान कियो क्रम दुष्कर भारी ॥
हरि गोबिँद जय जय गुबिँद गिरा सदा आनंददा ।
बिट्ठलदास माथुर मुकुट भये अमानी मानदा ॥८४॥

हरिराम हठीले भजन बल राना को उत्तर दियो ॥
उग्र तेज ऊदार सुघर सुथराई सींवाँ ।
प्रेमपुंज रसरासि महा गदगद स्वर ग्रीवाँ ॥
भक्तन को अपराध करै ताको फल गायो ।
हिरनकसिपु प्रह्लाद परम दृष्टांत दिखायो ॥
सस्फुट वक्ता जगत में राजसभा निधरक हियो ।
हरिराम हठीले भजन बल राना को उत्तर दियो ॥८५॥

कमलाकर भट जगत में तत्त्वबाद रोपी धुजा ॥
पंडित कला प्रबीन अधिक आदर दें आरज ।
संप्रदाय सिर छत्र द्वितिय मनों मध्वाचारज ॥
जेतिक हरि अवतार सबै पूरन करि जानै ।
परिपाटी ध्वज बिजै सदृस भागवत बखानै ॥
श्रुति स्मृती संमत पुरान तप्तमुद्राधारी भुजा ।
कमलाकर भट जगत में तत्त्वबाद रोपी धुजा ॥८६॥

ब्रजभूमि उपासक भट्ट सो रचि पचि हरि एकै कियो ॥
गोप्य स्थल मथुरामंडल जिते बाराह बखाने ।
ते किये नारायन प्रगट प्रसिध पृथ्वी में जाने ॥
भक्तिसुधा को सिंधु सदा सत्संग सभाजन परम रसग्य अनन्य कृष्णलीला को भाजन ॥
ग्यान समारत पच्छ को नाहिन कोउ खण्डन बियो ।
ब्रजभूमि उपासक भट्ट सो रचि पचि हरि एकै कियो ॥८७॥

ब्रजबल्लभ बल्लभ परम दुर्लभ सुख नयनन दिये ॥
नृत्य गान गुन निपुन रास में रस बरषावत ।
अब लीला ललितादि बलित दंपतिहि रिझावत ॥
अति उदार निस्तार सुजस ब्रजमंडल राजत ।
महा महोत्सव करत बहुत सबही सुख साजत ॥
श्रीनारायनभट्ट प्रभु परम प्रीति रस बस किये ।
ब्रजबल्लभ बल्लभ परम दुर्लभ सुख नयनन दिये ॥८८॥

संसार स्वाद सुख बांत ज्यों दुहुँ रूप सनातन तजि दियो ॥
गौड़देस बंगाल हुते सबही अधिकारी ।
हय गय भवन भँडार बिभव भूभुज अनुहारी ॥ ।
यह सुख अनित बिचारि बास बृंदावन कीनो ।
यथालाभ संतोष कुंज करवा मन दीनो ॥
ब्रजभूमि रहस्य राधाकृष्ण भक्त तोष उद्धार कियो ।
संसार स्वाद सुख बांत ज्यों दुहुँ रूप सनातन तजि दियो ॥८९॥

हरिबंसगुसाईं भजन की रीति सुकृत कोउ जानिहै ॥
राधाचरन प्रधान हृदय अति सुदृढ़ि उपासी ।
कुंज केलि दंपती तहाँ की करत खवासी ॥
सर्बस महाप्रसाद प्रसिध ताके अधिकारी ।
बिधि निषेध नहिं दास अननि उत्कट ब्रतधारी ॥
ब्याससुवन पथ अनुसरे सोई भले पहिचानिहै ।
हरिबंसगुसाईं भजन की रीति सुकृत कोउ जानिहै ॥९०॥

आसुधीर उद्योत कर रसिक छाप हरिदासकी ॥
जुगल नाम सों नेम जपत नित कुंजबिहारी ।
अवलोकत रहें केलि सखी सुख के अधिकारी ॥
गान कला गंधर्ब स्याम स्यामा को तोषैं ।
उत्तम भोग लगाय मोर मर्कट तिमि पोषैं ॥
नृपति द्वार ठाढ़े रहें दरसन आसा जास की ।
आसुधीर उद्योत कर रसिक छाप हरिदास की ॥९१॥

उत्कर्ष तिलक अरु दाम को भक्त इष्ट अति ब्यास के ॥
काहू के आराध्य मच्छ कछ सूकर नरहरि ।
बामन फरसाधरन सेतुबंधन जु सैलकरी ॥
एकन के यह रीति नेम नवधा सों लाये ।
सुकुल सुमोखन सुवन अच्युत गोत्री जु लड़ाये ॥
नौगुन तोरि नुपुर गुह्यो महँत सभा मधि रास के ।
उत्कर्ष तिलक अरु दाम को भक्त इष्ट अति ब्यास के ॥९२॥

(श्री)रूपसनातन भक्तिजल श्रीजीव गुसाईं सर गँभीर ॥
बेला भजन सुपक्व कषाय न कबहूँ लागी ।
बृंदाबन दृढ़ि बास जुगल चरननि अनुरागी ॥
पोथी लेखन पान अघट अच्छर चित दीनो ।
सद्ग्रन्थन को सार सबै हस्तामल कीनो ॥
संदेह ग्रन्थि छेदन समर्थ रस रास उपासक परम धीर ।
(श्री)रूपसनातन भक्तिजल श्रीजीव गुसाईं सर गँभीर ॥९३॥

बृंदावनकी माधुरी इन मिलि आस्वादन कियो ॥
सर्बस राधारमन भट्ट गोपाल उजागर ।
हृषीकेस भगवान बिपुल बिट्ठल रससागर ॥
थानेश्वरी जग(न्नाथ) लोकनाथ महामुनि मधु श्रीरंग ।
कृष्णदास पंडित उभय अधिकारी हरि अंग ॥
घमंडी जुगलकिसोर भृत्य भूगर्भ जीव दृढ़िव्रत लियो ।
बृंदावनकी माधुरी इन मिलि आस्वादन कियो ॥९४॥

रसिकमुरारि उदार अति मत्त गजहिं उपदेसु दियौ ॥
तन मन धन परिवार सहित सेवत संतन कहँ ।
दिब्य भोग आरती अधिक हरिहू ते हिय महँ ॥
श्रीवृन्दाबनचंद्र श्याम श्यामा रँग भीनो ।
मग्न प्रेमपीयूष पयधि परचै बहु दीनो ॥
हरिप्रिय श्यामानंदवर भजन भूमि उद्धार कियौ ॥
रसिकमुरारि उदार अति मत्त गजहिं उपदेसु दियौ ॥९५॥

भवप्रबाह निसतार हित अवलंबन ये जन भए ॥
सोझा सीवँ अधार धीर हरिनाभ त्रिलोचन ।
आसाधर द्यौराज नीर सधना दुखमोचन ॥
कासीश्वर अवधूत कृष्ण किंकर कटहरिया ।
सोभू उदाराम नामडुंगर व्रत धरिया ॥
पदम पदारथ रामदास बिमलानँद अमृत स्रए ।
भवप्रबाह निस्तार हित अवलंबन ये जन भए ॥९६॥

करुना छाया भक्तिफल ए कलिजुग पादप रचे ॥
जती रामरावल श्याम खोजी सँत सीहा ।
दल्हा पदम मनोरथ राका बाँका द्यौगू जप जीहा ॥
जाड़ा चाचा गुरू सवाई चाँदा नापा ।
पुरुषोत्तम सों साँच चतुर कीता मन (को जेहि) मेट्यो आपा ॥
मतिसुंदर धीङ् धाङ् श्रम संसारनाच नाहिन नचे ।
करुना छाया भक्तिफल ए कलिजुग पादप रचे ॥९७॥

पर अर्थ परायन भक्त ये कामधेनु कलिजुग्ग के ॥
लक्ष्मन लफरा लडू संत जोधापुर त्यागी ।
सूरज कुंभनदास बिमानी खेम बिरागी ॥
भावन बिरही भरत नफर हरिकेस लटेरा ।
हरिदास अयोध्या चक्रपाणी सरयूतट डेरा ॥
तिलोक पुखरदी बीजुरी उद्धव वनचर बंस के ।
पर अर्थ परायन भक्त ये कामधेनु कलिजुग्ग के ॥९८॥

अभिलाष अधिक पूरन करन ये चिंतामणि चतुरदास ॥
सोम भीम सोमनाथ बिको बिसाखा लमध्याना ।
महदा मुकुंद गनेस त्रिबिक्रम रघु जग जाना ॥
बाल्मीक बृधब्यास जगन झाँझू बिट्ठल आचारज ।
हरिभू लाला हरिदास बाहुबल राघव आरज ॥
लाखा छीतर उद्धव कपूर घाटम घूरी कियो प्रकास ।
अभिलाष अधिक पूरन करन ये चिंतामणि चतुरदास ॥९९॥

भक्तपाल दिग्गज भगत ए थानाइत शूर धीर ॥
देवानंद नरहरियानंद मुकुंद महीपति संतराम तम्मोरी ।
खेम श्रीरंग नंद विष्णु बीदा बाजू सुत जोरी ॥
छीतम द्वारिकादास माधव मांडन रूपा दामोदर ।
भक्त नरहरि भगवान बाल कान्हर केसव सोहैं घर ॥
दास प्रयाग लोहँग गुपाल नागू सुत गृह भक्त भीर ।
भक्तपाल दिग्गज भगत ए थानाइत शूर धीर ॥१००॥

बदरीनाथ उड़ईसे द्वारिका सेवक सब हरिभजन पर ॥
केसव पुनि हरिनाथ भीम खेता गोबिँद ब्रह्मचारी ।
बालकृष्ण बड़भरत अच्युत अपया ब्रतधारी ॥
पंडा गोपीनाथ मुकुँद गजपती महाजस ।
गुननिधि जसगोपाल दियो भक्तन को सरबस ॥
श्रीअंग सदा सानिधि रहैं कृत पुन्यपुंज भल भाग भर ।
बदरीनाथ उड़ईसे द्वारिका सेवक सब हरिभजन पर ॥१०१॥

हरि सुजस प्रचुर कर जगतमें ये कबिजन अतिसय उदार ॥
बिद्यापति ब्रह्मदास बहोरन चतुर बिहारी ।
गोबिन्द गंगाराम लाल बरसनियाँ मंगलकारी ॥
प्रियदयाल परसराम भक्त भाई खाटीको ।
नंदसुवन की छाप कबित्त केसव को नीको ॥
आसकरन पूरन नृपति भीषम जनदयाल गुन नाहिन पार ।
हरि सुजस प्रचुर कर जगतमें ये कबिजन अतिसय उदार ॥१०२॥

जे बसे बसत मथुरा मंडल ते दया दृष्टि मोपर करो ॥
रघुनाथ गोपीनाथ रामभद्र दासू स्वामी ।
गुंजामाली चित उत्तम बिट्ठल मरहठ निष्कामी ॥
यदुनंदन रघुनाथ रामानन्द गोविंद मुरली सोती ।
हरिदास मिश्र भगवान मुकुन्द केसव दंडौती ॥
चतुर्भुज चरित्र विष्णुदास बेनी पद मो सिर धरो ।
जे बसे बसत मथुरा मंडल ते दया दृष्टि मोपर करो ॥१०३॥

कलिजुग जुवतीजन भक्तराज महिमा सब जानै जगत ॥
सीता झाली सुमति सोभा प्रभुता उमा भटियानी ।
गंगा गौरी कुँवरि उबीठा गोपाली गनेसुदे रानी ॥
कला लखा कृतगढ़ौ मानमति सुचि सतभामा ।
यमुना कोली रामा मृगा देवादे भक्तन बिश्रामा ।
जुग जीवा कीकी कमला देवकी हीरा हरिचेरी पोषै भगत ।
कलिजुग जुवतीजन भक्तराज महिमा सब जानै जगत ॥१०४॥

हरि के संमत जे भगत तिन दासन के दास ॥
नरबाहन बाहन बरीस जापू जैमल बीदावत ।
जयंत धारा रूपा अनुभई उदा रावत ॥
गंभीरे अर्जुन जनार्दन गोबिँद जीता ।
दामोदर साँपिले गदा ईश्वर हेम बिनीता ॥
मयानंद महिमा अनंत गुढ़ईले तुलसीदास ।
हरि के संमत जे भगत तिन दासन के दास ॥१०५॥

श्रीमुख पूजा संत की आपुन तें अधिकी कही ॥
यहै बचन परमान दास गाँवरी जटियाने भाऊ ।
बूँदी बनियाराम मँडौते मोहनबारी दाऊ ॥
माडौठी जगदीसदास लछिमन चटुथावल भारी ।
सुनपथ में भगवान सबै सलखान गुपाल उधारी ॥
जोबनेर गोपाल के भक्त इष्टता निरबही ।
श्रीमुख पूजा संत की आपुन तें अधिकी कही ॥१०६॥

परमहंस बंसनि में भयो बिभागी बानरो ॥
मुरधर खंड निवास भूप सब आज्ञाकारी ।
राम नाम बिश्वास भक्तपदरजब्रतधारी ॥
जगन्नाथ के द्वार दंडोतनि प्रभु पै धायो ।
दई दास की दादि हुँडी करि फेरि पठायो ॥
सुरधुनी ओघ संसर्ग तें नाम बदल कुच्छित नरो ।
परमहंस बंसनि में भयो बिभागी बानरो ॥१०७॥

जगत बिदित नरसी भगत (जिन) गुज्जर धर पावन करी ॥
महा समारत लोग भक्ति लौलेश न जानें ।
माला मुद्रा देखि तासु की निंदा ठानें ॥
ऐसे कुल उत्पन्न भयो भागवत शिरोमनि ।
ऊसर तें सर कियो खंड दोषहि खोयो जिनि ॥
बहुत ठौर परचो दियो रसरीति भगति हिरदै धरी ।
जगत बिदित नरसी भगत (जिन) गुज्जर धर पावन करी ॥१०८॥

दिवदासबंस यशोधर सदन भई भक्ति अनपायिनी ॥
सुत कलत्र संमत सबै गोबिंद परायन ।
सेवत हरि हरिदास द्रवत मुख राम रसायन ॥
सीतापति को सुजस प्रथम ही गमन बखान्यो ।
द्वै सुत दीजै मोहि कबित्त सब ही जग जान्यो ॥
गिरागदित लीला मधुर संतनि आनँददायिनी ।
दिवदास बंस यशोधर सदन भई भक्ति अनपायिनी ॥१०९॥

नंददास आनंदनिधि रसिक सु प्रभु हित रँगमगे ॥
लीला पद रस रीति ग्रंथ रचना में नागर ।
सरस उक्ति जुत जुक्ति भक्ति रस गान उजागर ॥
प्रचुर पयोधि लौं सुजस रामपुर ग्राम निवासी ।
सकल सुकुल संबलित भक्तपदरेणु उपासी ॥
चंद्रहास अग्रज सुहृद परम प्रेम पय में पगे ।
नंददास आनंदनिधि रसिक सु प्रभु हित रँगमगे ॥११०॥

संसार सकल ब्यापक भई जकरी जनगोपाल की ॥
भक्ति तेज अति भाल संत मंडल को मंडन ।
बुधि प्रवेश भागवत ग्रंथ संसय को खंडन ॥
नरहड़ ग्राम निवास देश बागड़ निस्तार्यो ।
नवधा भजन प्रबोध अननि दासन ब्रत धार्यो ॥
भक्त कृपा बांछी सदा पदरज राधालाल की ।
संसार सकल ब्यापक भई जकरी जनगोपाल की ॥१११॥

माधव दृढ़ि महि ऊपरै प्रचुर करी लोटा भगति ॥
प्रसिध प्रेम की बात गढ़ागढ़ परचै दीयो ।
ऊँचे तें भयो पात श्याम साँचौ पन कीयो ॥
सुत नाती पुनि सदृश चलत ऊही परिपाटी ।
भक्तन सों अति प्रेम नेम नहिं किहुँ अँग घाटी ॥
नृत्य करत नहिं तन सँभार समसर जनकन की सकति ।
माधव दृढ़ि महि ऊपरै प्रचुर करी लोटा भगति ॥११२॥

अभिलाष भक्त अंगद को पुरुषोत्तम पूरन कर्यो ॥
नग अमोल इक ताहि सबै भूपति मिलि जाचैं ।
साम दाम बहु करैं दास नाहिंन मत काचैं ॥
एक समै संकट लै वह पानी महिं डार्यो ।
प्रभू तिहारी बस्तु बदन तें बचन उचार्यो ॥
पाँच दोय सत कोस तें हरि हीरा लै उर धर्यो ।
अभिलाष भक्त अंगद को पुरुषोत्तम पूरन कर्यो ॥११३॥

चतुर्भुज नृपति की भक्ति को कौन भूप सरवर करैं ॥
भक्त आगमन सुनत सन्मुख जोजन एक जाई ।
सदन आनि सतकार सदृश गोविंद बड़ाई ॥
पाद प्रछालन सुहथ राय रानी मन साँचे ।
धूप दीप नैवेद्य बहुरि तिन आगे नाचे ॥
यह रीति करौलीधीश की तन मन धन आगे धरैं ।
चतुर्भुज नृपति की भक्ति को कौन भूप सरवर करैं ॥११४॥

लोकलाज कुलश‍ृंखला तजि मीराँ गिरिधर भजी ॥
सदृश गोपिका प्रेम प्रगट कलिजुगहिं दिखायो ।
निरांकुश अति निडर रसिक जस रसना गायो ॥
दुष्टन दोष विचार मृत्यु को उद्यम कीयो ।
बार न बाँको भयो गरल अमृत ज्यों पीयो ॥
भक्ति निशान बजाय कै काहू ते नाहिन लजी ।
लोकलाज कुलश‍ृंखला तजि मीराँ गिरिधर भजी ॥११५॥

आमेर अछत कूरम को द्वारकानाथ दर्शन दियो ॥
कृष्णदास उपदेश परम तत्त्व परिचै पायो ।
निर्गुण सगुण निरूपि तिमिर अग्यान नशायो ॥
काछ बाच निकलंक मनो गांगेय युधिष्ठिर ।
हरिपूजा प्रह्लाद धर्मध्वजधारी जग पर ॥
पृथीराज परचो प्रगट तन शंख चक्र मंडित कियो ।
आमेर अछत कूरम को द्वारकानाथ दर्शन दियो ॥११६॥

भक्तन को आदर अधिक राजबंस में इन कियो ॥
लघु मथुरा मेड़ता भक्त अति जैमल पोषे ।
टोड़ए भजन निधान रामचँद हरिजन तोषै ॥
अभयराम एक रसहिं नेम नीवाँ के भारी ।
करमसील सुरतान बीरम भूपति ब्रतधारी ॥
ईश्वर अखैराज रायमल कन्हर मधुकर नृप सर्वसु दियो ।
भक्तन को आदर अधिक राजबंस में इन कियो ॥११७॥

खेमाल रतन राठौर के अटल भक्ति आई सदन ॥
रैना पर गुन राम भजन भागवत उजागर ।
प्रेमी प्रेम किशोर उदर राजा रतनाकर ॥
हरिदासन के दास दसा ऊँची धुजधारी ।
निर्भय अननि उदार रसिक जस रसना भारी ॥
दशधा संपति संत बल सदा रहत प्रफुलित बदन ।
खेमाल रतन राठौर के अटल भक्ति आई सदन ॥११८॥

कलिजुग भक्ति कररी कमान रामरैन कैं रिजु करी ॥
अजर धर्म आचर्यो लोकहित मनो नीलकँठ ।
निंदक जग अनिराय कहा (महिमा) जानैगो भूसठ ॥
बिदित गँधर्बी ब्याह कियो दुष्यंत प्रमानै ।
भरत पुत्र भागवत स्वमुख सुकदेव बखानै ॥
और भूप कोउ छ्वै सकै दृष्टि जाय नाहिंन धरी ।
कलिजुग भक्ति कररी कमान रामरैन कैं रिजु करी ॥११९॥

हरि गुरु हरिदासन सों रामघरनि साँची रही ॥
आरज को उपदेश सुतो उर नीके धार्यो ।
नवधा दशधा प्रीति आन धर्म सबै बिसार्यो ॥
अच्युत कुल अनुराग प्रगट पुरुषारथ जान्यो ।
सारासार बिबेक बात तीनो मन मान्यो ॥
दासत्व अननि उदारता संतन मुख राजा कही ।
हरि गुरु हरिदासन सों रामघरनि साँची रही ॥१२०॥

अभिलाष उभै खेमाल का ते किसोर पूरा किया ॥
पाँयनि नूपुर बाँधि नृत्य नगधर हित नाच्यो ।
रामकलस मन रली सीस ताते नहिं बाँच्यो ॥
बानी बिमल उदार भक्ति महिमा बिस्तारी ।
प्रेमपुंज सुठि सील बिनय संतन रुचिकारी ॥
सृष्टि सराहै रामसुवन लघु बैस लछन आरज लिया ।
अभिलाष उभै खेमाल का ते किसोर पूरा किया ॥१२१॥

खेमाल रतन राठौड़ के सुफल बेलि मीठी फली ॥
हरीदास हरिभक्त भक्ति मंदिर को कलसो ।
भजनभाव परिपक्व हृदय भागीरथि जल सो ॥
त्रिधा भाँति अति अननि राम की रीति निबाही ।
हरि गुरु हरि बल भाँति तिनहिं सेवा दृढ़ि साही ॥
पूरन इंदु प्रमुदित उदधि त्यों दास देखि बाढ़े रली ।
खेमाल रतन राठौड़ के सुफल बेलि मीठी फली ॥१२२॥

हरिबंसचरण बल चतुर्भुज गौडदेश तीरथ कियो ॥
गायो भक्ति प्रताप सबहि दासत्व दृढ़िआयो ।
राधावल्लभ भजन अननिता वरग बढ़ायो ॥
मुरलीधर की छाप कबित अति ही निर्दूषण ।
भक्तन की अँघ्रिरेणु वहै धारी सिरभूषण ॥
सतसंग महा आनन्द में प्रेम रहत भीज्यो हियो ।
हरिबंसचरण बल चतुर्भुज गौडदेश तीरथ कियो ॥१२३॥

चालक की चरचरी चहूँ दिसि उदधि अंत लों अनुसरी ॥
सक्र कोप सुठि चरित प्रसिध पुनि पंचाध्याई ।
कृष्न रुक्मिनी केलि रुचिर भोजन बिधि गाई ॥
गिरिराजधरन की छाप गिरा जलधर ज्यों गाजै ।
संत सिखंडी खंड हृदय आनँद के काजै ॥
जाड़ा हरन जग जाड़ता कृष्णदास देही धरी ।
चालक की चरचरी चहूँ दिसि उदधि अंत लों अनुसरी ॥१२४॥

बिमलानन्द प्रबोध बंस संतदास सीवाँ धरम ॥
गोपीनाथ पदराग भोग छप्पन भुंजाए ।
पृथु पधति अनुसार देव दंपति दुलराए ॥
भगवत भक्त समान ठौर द्वै को बल गायो ।
कबित सूर सों मिलत भेद कछु जात न पायो ॥
जन्म कर्म लीला जुगति रहसि भक्ति भेदी मरम ।
बिमलानन्द प्रबोध बंस संतदास सीवाँ धरम ॥१२५॥

मदनमोहन सूरदास की नाम सृंखला जुरि अटल ॥
गान काब्य गुन रासि सुहृद सहचरि अवतारी ।
राधाकृष्ण उपास्य रहसि सुख के अधिकारी ॥
नव रस मुख्य सिँगार बिबिध भाँतिन करि गायो ।
बदन उचारत बेर सहस पाँयनि ह्वै धायो ॥
अँगीकार की अवधि यह ज्यों आख्या भ्राता जमल ।
मदनमोहन सूरदास की नाम सृंखला जुरि अटल ॥१२६॥

कात्यायनि के प्रेम की बात जात कापै कही ॥
मारग जात अकेल गान रसना जु उचारै ।
ताल मृदंगी बृच्छ रीझि अंबर तहँ डारै ॥
गोप नारि अनुसारि गिरा गद्गद आवेसी ।
जग प्रपंच तें दूरि अजा परसे नहिं लेसी ॥
भगवान रीति अनुराग की संतसाखि मेली सही ।
कात्यायनि के प्रेम की बात जात कापै कही ॥१२७॥

कृष्णबिरह कुंती सरीर त्यों मुरारि तन त्यागियो ॥
बिदित बिलौंदा गाँव देश मुरधर सब जानै ।
महामहोच्छो मध्य संत परिषद परवानै ॥
पगनि घूँघुरू बाँधि राम को चरित दिखायो ।
देसी सारँगपाणि हंस ता संग पठायो ॥
उपमा और न जगत में पृथा विना नाहिंन बियो ।
कृष्णबिरह कुंती सरीर त्यों मुरारि तन त्यागियो ॥१२८॥

कलि कुटिल जीव निस्तारहित बाल्मीकि तुलसी भये ॥
त्रेता काब्य निबंध कियो सत कोटि रमायन ।
इक अच्छर उद्धरे ब्रह्महत्यादि परायन ॥
अब भक्तन सुख देन बहुरि लीला बिस्तारी ।
रामचरन रसमत्त रहत अहनिसि ब्रतधारी ॥
संसार अपार के पार को सुगम रूप नौका लये ।
कलि कुटिल जीव निस्तारहित बाल्मीकि तुलसी भये ॥१२९॥

गोप्यकेलि रघुनाथ की मानदास परगट करी ॥
करुणा वीर सिँगार आदि उज्ज्वल रस गायो ।
पर उपकारक धीर कवित कविजन मन भायो ॥
कोशलेश पदकमल अननि दासन ब्रत लीनो ।
जानकिजीवन सुजस रहत निशि दिन रँग भीनो ॥
रामायन नाटक्क की रहसि उक्ति भाषा धरी ।
गोप्यकेलि रघुनाथ की मानदास परगट करी ॥१३०॥

(श्री)बल्लभजूके बंस में सुरतरु गिरिधर भ्राजमान ॥
अर्थ धर्म काम मोक्ष भक्ति अनपायनि दाता ।
हस्तामल श्रुति ज्ञान सबही शास्त्रन को ज्ञाता ॥
परिचर्या ब्रजराज कुँवर के मन को कर्षे ।
दर्शन परम पुनीत सभा तन अमृतवर्षे ॥
बिट्ठलेशनंदन सुभाव जग कोऊ नहिं ता समान ।
(श्री)बल्लभजूके बंस में सुरतरु गिरिधर भ्राजमान ॥१३१॥

(श्री)बल्लभ जू के बंस में गुणनिधि गोकुलनाथ अति ॥
उदधि सदा अच्छोभ सहज सुंदर मितभाषी ।
गुरु वर तन गिरिराज भलप्पन सब जग साखी ॥
बिट्ठलेश की भक्ति भयो बेला दृढ़ि ताके ।
भगवत तेज प्रताप नमित नरबर पद जाके ॥
निर्ब्यलीक आशय उदार भजन पुंज गिरिधरन रति ।
(श्री)बल्लभ जू के बंस में गुणनिधि गोकुलनाथ अति ॥१३२॥

रसिक रँगीलो भजन पुंज सुठि बनवारी स्याम को ॥
बात कबित बड़ चतुर चोख चौकस अति जाने ।
सारासार बिबेक परमहंसनि परवाने ॥
सदाचार संतोष भूत सब को हितकारी ।
आरज गुन तन अमित भक्ति दसधा ब्रतधारी ॥
दर्शन पुनीत आशय उदार आलाप रुचिर सुखधाम को ।
रसिक रँगीलो भजन पुंज सुठि बनवारी स्याम को ॥१३३॥

भागवत भली बिधि कथन को धनि जननी एकै जन्यो ॥
नाम नरायन मिश्र बंस नवला जु उजागर ।
भक्तन की अति भीर भक्ति दसधा को आगर ॥
आगम निगम पुरान सार सास्त्रन सब देखे ।
सुरगुरु सुक सनकादि ब्यास नारद जु विशेषे ॥
सुधा बोध मुख सुरधुनी जस बितान जग में तन्यो ।
भागवत भली बिधि कथन को धनि जननी एकै जन्यो ॥१३४॥

कलिकाल कठिन जग जीति यों राघव की पूरी परी ॥
काम क्रोध मद मोह लोभ की लहर न लागी ।
सूरज ज्यों जल ग्रहै बहुरी ताही ज्यों त्यागी ॥
सुंदर सील स्वभाव सदा संतन सेवाब्रत ।
गुरु धर्म निकष निर्बह्यो विश्व में बिदित बड़ओ भृत ॥
अल्हराम रावल कृपा आदि अंत धुकती धरी ।
कलिकाल कठिन जग जीति यों राघव की पूरी परी ॥१३५॥

हरिदास भलप्पन भजन बल बावन ज्यों बढ़यो बावनो ॥
अच्युतकुल सों दोष सपनेहुँ उर नहिं आनै ।
तिलक दाम अनुराग सबन गुरुजन करि मानै ॥
सदन माँहि बैराग्य बिदेहन की सी भाँती ।
रामचरन मकरंद रहत मनसा मदमाती ॥
जोगानंद उजागर बंस करि निसिदिन हरिगुन गावनो ।
हरिदास भलप्पन भजनबल बावन ज्यों बढ़यो बावनो ॥१३६॥

जंगली देश के लोग सब परसुराम किए पारषद ॥
ज्यों चंदन को पवन निंब पुनि चंदन करई ।
बहुत काल तम निब्ड़ि उदय दीपक जिमि हरई ॥
श्रीभट पुनि हरिब्यास संत मारग अनुसरई ।
कथा कीरतन नेम रसन हरिगुन उच्चरई ॥
गोबिंद भक्ति गद रोग गति तिलक दाम सद्वैद्य हद ।
जंगली देश के लोग सब परसुराम किए पारषद ॥१३७॥

गुननिकर गदाधर भट्ट अति सबही को लागे सुखद ॥
सज्जन सुहृद सुसील बचन आरज प्रतिपालय ।
निर्मत्सर निहकाम कृपा करुना को आलय ॥
अननि भजन दृढ़ि करन धर्यो बपु भक्तन काजै ।
परम धरम को सेतु बिदित बृंदावन गाजै ॥
भागवत सुधा बरषै बदन काहू को नाहिंन दुखद ।
गुननिकर गदाधर भट्ट अति सबही को लागे सुखद ॥१३८॥

चरन सरन चारन भगत हरिगायक एता हुआ ॥
चौमुख चौरा चंड जगत ईश्वर गुन जाने ।
कर्मानँद औ कोल्ह अल्ह अच्छर परवाने ॥
माधव मथुरा मध्य साधु जीवानँद सींवा ।
उदा नरायनदास नाम माँडन नत ग्रीवा ॥
चौरासी रूपक चतुर बरनत बानी जूजुवा ।
चरन सरन चारन भगत हरिगायक एता हुआ ॥१३९॥

नरदेव उभय भाषा निपुन पृथ्वीराज कबिराज हुव ॥
सवैया गीत श्लोक बेलि दोहा गुन नवरस ।
पिंगल काब्य प्रमान बिबिध बिधि गायो हरिजस ॥
परदुख बिदुष शलाघ्य बचन रचना जु बिचारै ।
अर्थ बित्त निर्मोल सबै सारँग उर धारै ॥
रुक्मिनी लता बरनन अनूप बागीश बदन कल्यान सुव ।
नरदेव उभय भाषा निपुन पृथ्वीराज कबिराज हुव ॥१४०॥

द्वारका देखि पालंटती अचढ़ सींवै कीधी अटल ॥
असुर अजीज अनीति अगिनि में हरिपुर कीधो ।
साँगन सुत नयसाद राय रनछोरै दीधो ॥
धरा धाम धन काज मरन बीजाहूँ माँड़ाइ ।
कमधुज कुटको हुवौ चौक चतुरभुजनी चाँड़ाइ ॥
बाढ़ेल बाढ़ कीवी कटक चाँद नाम चाँड़ाइ सबल ।
द्वारका देखि पालंटती अचढ़ सींवै कीधी अटल ॥१४१॥

पृथ्वीराज नृप कुलबधू भक्त भूप रतनावती ॥
कथा कीरतन प्रीति भीर भक्तन की भावै ।
महा महोछो मुदित नित्य नँदलाल लडावै ॥
मुकुँदचरन चिंतवन भक्ति महिमा ध्वज धारी ।
पति पर लोभ न कियो टेक अपनी नहिं टारी ॥
भलपन सबै बिशेषही आमेर सदन सुनखा जिती ।
पृथ्वीराज नृप कुलबधू भक्त भूप रतनावती ॥१४२॥

पारीष प्रसिध कुल काँथड़या जगन्नाथ सीवाँ धरम ॥
रामानुज की रीति प्रीति पन हिरदै धार्यो ।
संसकार सम तत्त्व हंस ज्यो बुद्धि विचार्यो ॥
सदाचार मुनि बृत्ति इंदिरा पधति उजागर ।
रामदास सुत संत अननि दसधा को आगर ॥
पुरुषोत्तम परसाद तें उभै अंग पहिर्यो बरम ।
पारीष प्रसिध कुल काँथड़या जगन्नाथ सीवाँ धरम ॥१४३॥

कीरतन करत कर सपनेहूँ मथुरादास न मंड्यो ॥
सदाचार संतोष सुहृद सुठि सील सुभासै ।
हस्तक दीपक उदय मेटि तम बस्तु प्रकासै ॥
हरि को हिय बिश्वास नंदनंदन बल भारी ।
कृष्णकलस सों नेम जगत जाने सिर धारी ॥
बर्धमान गुरुबचन रति सो संग्रह नहिं छंड्यो ।
कीरतन करत कर सपनेहूँ मथुरादास न मंड्यो ॥१४४॥

नृतक नरायनदास को प्रेमपुंज आगे बढ़यो ॥
पद लीनो परसिद्ध प्रीति जामें दृढ़ि नातो ।
अच्छर तनमय भयो मदनमोहन रँग रातो ॥
नाचत सब कोउ आहि काहि पै यह बनि आवै ।
चित्रलिखित सो रह्यो त्रिभँग देसी जु दिखावै ॥
हँड़ैया सराय देखत दुनी हरिपुर पदवीको कढ़यो ।
नृतक नरायनदास को प्रेमपुंज आगे बढ़यो ॥१४५॥

गुनगन बिशद गोपाल के एते जन भए भूरिदा ॥
बोहित रामगुपाल कुँवरबर गोबिँद माँडिल ।
छीतस्वामी जसवंत गदाधर अनँतानँद भल ॥
हरिनाभमिश्र दीनदास बछपाल कन्हर जस गायन ।
गोसू रामदास नारद स्याम पुनि हरिनारायन ॥
कृष्णजीवन भगवानजन स्यामदास बिहारी अमृतदा ।
गुनगन बिशद गोपाल के एते जन भए भूरिदा ॥१४६॥

निरबर्त्त भए संसार तें ते मेरे जजमान सब ॥
उद्धव रामरेनु परसराम गंगा ध्रूखेतनिवासी ।
अच्युतकुल ब्रह्मदास बिश्राम सेषसाइ के बासी ॥
किंकर कुंडा कृष्णदास खेम सोठा गोपानँद ।
जयदेव राघव बिदुर दयाल दामोदर मोहन परमानँद ॥
उद्धव रघुनाथी चतुरोनगन कुंज ओक जे बसत अब ।
निरबर्त्त भए संसार तें ते मेरे जजमान सब ॥१४७॥

श्रीस्वामी चतुरोनगन मगन रैनदिन भजन हित ॥
सदा जुक्त अनुरक्त भक्तमंडल को पोषत ।
पुर मथुरा ब्रजभूमि रमत सबही को तोषत ॥
परम धरम दृढ़ि करन देव श्रीगुरु आराध्यो ।
मधुर बैन सुठि ठौर ठौर हरिजन सुख साध्यो ॥
संत महंत अनंत जन जस बिस्तारत जासु नित ।
श्रीस्वामी चतुरोनगन मगन रैनदिन भजनहित ॥१४८॥

मधुकरी माँगि सेवैं भगत तिनपर हौं बलिहार कियो ॥
गोमा परमानँद प्रधान द्वारिका मथुरा खोरा ।
कालुष साँगानेर भलो भगवान को जोरा ॥
बिट्ठल टोड़ए खेम पँडा गूनोरै गाजैं ।
स्याम सेन के बंस चीधर पीपार बिराजैं ॥
जैतारन गोपाल को केवल कूबै मोल लियो ।
मधुकरी माँगि सेवैं भगत तिनपर हौं बलिहार कियो ॥१४९॥

(श्री)अग्र अनुग्रह तें भए सिष्य सबै धर्म की ध्वजा ॥
जंगी प्रसिध प्रयाग बिनोदि पूरन बनवारी ।
नरसिंह भक्त भगवान दिवाकर दृढ़ि ब्रतधारी ॥
कोमल हृदय किसोर जगत जगनाथ सलूधौ ।
औरौ अनुग उदार खेम खीची धर्मधीर लघु ऊधौ ॥
त्रिबिध तापमोचन सबै सौरभ प्रभु जिन सिर भुजा ।
(श्री)अग्र अनुग्रह तें भए सिष्य सबै धर्म की ध्वजा ॥१५०॥

भरतखंड भूधर सुमेरु टीला लाहा(की) पद्धति प्रगट ॥
अंगज परमानंददास जोगी जग जागै ।
खरतर खेम उदार ध्यान केसो हरिजन अनुरागै ॥
सस्फुट त्योला शब्द लोहकर बंस उजागर ।
हरीदास कपिप्रेम सबै नवधा के आगर ॥
अच्युत कुल सेवैं सदा दासन तन दसधा अघट ।
भरतखंड भूधर सुमेरु टीला लाहा(की) पद्धति प्रगट ॥१५१॥

मधुपुरी महोछौ मंगलरूप कान्हर कैसौ को करै ॥
चारि बरन आश्रम रंक राजा अन पावै ।
भक्तन को बहुमान बिमुख कोऊ नहिं जावै ॥
बीरी चंदन बसन कृष्ण कीरंतन बरषै ।
प्रभु के भूषन देय महामन अतिसय हरषै ॥
बिट्ठलसुत बिमल्यो फिरै दास चरनरज सिर धरै ।
मधुपुरी महोछौ मंगलरूप कान्हर कैसौ को करै ॥१५२॥

भक्तन सों कलिजुग भले निबही नीवा खेतसी ॥
आवहिं दास अनेक ऊठि आदर करि लीजै ।
चरन धोय दंडवत सदन में डेरा दीजै ॥
ठौर ठौर हरिकथा हृदय अति हरिजन भावैं ।
मधुर बचन मुँह लाय बिबिध भाँतिन जु लड़ावैं ॥
सावधान सेवा करै निर्दूषण रति चेतसी ।
भक्तन सों कलिजुग भले निबही नीवा खेतसी ॥१५३॥

बसन बढ़यो कुंतीबधू त्यों तूँबर भगवान के ॥
यह अचरज भयो एक खाँड घृत मैदा बरषै ।
रजत रुक्म की रेल सृष्टि सबही मन हरषै ॥
भोजन रास बिलास कृष्ण कीरंतन कीनो ।
भक्तन को बहुमान दान सबही को दीनो ॥
कीरति कीनी भीमसुत सुनि भूप मनोरथ आन के ।
बसन बढ़यो कुंतीबधू त्यों तूँबर भगवान के ॥१५४॥

जसवंत भक्त जैमाल की रूड़ा राखी राठवड़ ॥
भक्तन सों अतिभाव निरंतर अंतर नाहीं ।
कर जोरे इक पाँय मुदित मन आज्ञा माहीं ॥
श्रीबृंदाबन बास कुंज क्रीडा रुचि भावै ।
राधाबल्लभ लाल नित्य प्रति ताहि लड़ावै ॥
परम धर्म नवधा प्रधान सदन साँचनिधि प्रेम जड़ ।
जसवंत भक्त जैमाल की रूड़ा राखी राठवड़ ॥१५५॥

हरीदास भक्तनि हित धनि जननी एकै जन्यो ॥
अमित महागुन गोप्य सारवित सोई जानै ।
देखत को तुलाधार दूर आसै उनमानै ॥
देय दमामौ पैज बिदित बृंदाबन पायो ।
राधाबल्लभ भजन प्रगट परताप दिखायो ॥
परम धर्म साधन सुदृढ़ि कामधेनु कलिजुग(में) गन्यो ।
हरीदास भक्तनि हित धनि जननी एकै जन्यो ॥१५६॥

भक्ति भाव जूड़ाइं जुगल धर्मधुरंधर जग बिदित ॥
बाँबोली गोपाल गुननि गंभीर गुनारट ।
दच्छिन दिसि विष्णुदास गाँव कासीर भजन भट ॥
भक्तनि सों यह भाव भजै गुरु गोबिँद जैसे ।
तिलक दाम आधीन सुबर संतनि प्रति तैसे ॥
अच्युत कुल पन एक रस निबह्यो ज्यौं श्रीमुखगदित ।
भक्ति भाव जूड़ाइं जुगल धर्मधुरंधर जग बिदित ॥१५७॥

कील्ह कृपा कीरति बिसद परम पारषद शिष प्रगट ॥
आसकरन रिषिराज रूप भगवान भक्ति गुर ।
चतुरदास जग अभै छाप छीतर जु चतुर बर ॥
लाखै अद्भुत रायमल खेम मनसा क्रम बाचा ।
रसिक रायमल गौर देवा दामोदर हरि रँग राचा ॥
सबै सुमंगल दास दृढ़ि धर्मधुरंधर भजन भट ।
कील्ह कृपा कीरति बिसद परम पारषद शिष प्रगट ॥१५८॥

रस रास उपासक भक्तराज नाथ भट्ट निर्मल बयन ॥
आगम निगम पुरान सार सास्त्रन जु बिचार्यो ।
ज्यों पारो दै पुटहिं सबनि को सार उधार्यो ॥
रूप सनातन जीव भट्ट नारायन भाख्यो ।
सो सर्वस उर साँच जतन करि नीके राख्यो ॥
फनी बंस गोपाल सुव रागा अनुगा को अयन ।
रस रास उपासक भक्तराज नाथ भट्ट निर्मल बयन ॥१५९॥

कठिन काल कलिजुग्ग में करमैती निकलँक रही ॥
नश्वरपति रति त्यागि कृष्णपद सों रति जोरी ।
सबै जगत की फाँसि तरकि तिनुका ज्यों तोरी ॥
निर्मल कुल काँथड़या धन्य परसा जिहिं जाई ।
बिदित बृँदाबन बास संत मुख करत बड़ाई ॥
संसार स्वाद सुख बांत करि फेर नहीं तिन तन चही ।
कठिन काल कलिजुग्ग में करमैती निकलँक रही ॥१६०॥

गोबिंदचंद्र गुन ग्रथन को खड्गसेन बानी बिसद ॥
गोऽपि ग्वाल पितु मातु नाम निरनय किय भारी ।
दान केलि दीपक प्रचुर अति बुद्धि बिचारी ॥
सखा सखी गोपाल काल लीला में बितयो ।
कायथ कुल उद्धार भक्ति दृढ़ि अनत न चितयो ॥
गौतमी तंत्र उर ध्यान धरि तन त्याग्यो मंडल सरद ।
गोबिंदचंद्र गुन ग्रथन को खड्गसेन बानी बिसद ॥१६१॥

सखा स्याम मन भावतो गंग ग्वाल गंभीरमति ॥
स्यामाजू की सखी नाम आगम बिधि पायो ।
ग्वाल गाय ब्रज गाँव पृथक नीके करि गायो ॥
कृष्णकेलि सुख सिंधु अघट उर अंतर धरई ।
ता रसमें नित मगन असद आलाप न करई ॥
ब्रज बास आस ब्रजनाथ गुरु भक्तचरन अति अननि गति ।
सखा स्याम मन भावतो गंग ग्वाल गंभीरमति ॥१६२॥

सोति श्लाघ्य संतनि सभा द्वितिय दिवाकर जानियो ॥
परम भक्ति परताप धरमध्वज नेजाधारी ।
सीतापति को सुजस बदन सोभित अति भारी ॥
जानकिजीवन चरन सरन थाती थिर पाई ।
नरहरि गुरु परसाद पूत पोते चलि आई ॥
राम उपासक छाप दृढ़ि और न कछु उर आनियो ।
सोति श्लाघ्य संतनि सभा द्वितिय दिवाकर जानियो ॥१६३॥

जीवत जस पुनि परमपद लालदास दोनों लही ॥
हृदय हरीगुन खान सदा सतसँग अनुरागी ।
पद्मपत्र ज्यों रह्यो लोभ की लहर न लागी ॥
विष्णुरात सम रीति बघेरे त्यों तन त्याज्यो ।
भक्त बराती बृंद मध्य दूलह ज्यों राज्यो ॥
खरी भक्ति हरिषाँपुरै गुरु प्रताप गाढ़ई रही ।
जीवत जस पुनि परमपद लालदास दोनों लही ॥१६४॥

भक्तन हित भगवत रची देही माधव ग्वाल की ॥
निसिदिन यहै विचार दास जेहिं बिधि सुख पावैं ।
तिलक दाम सों प्रीति हृदय अति हरिजन भावैं ॥
परमारथ सों काज हिए स्वारथ नहिं जानै ।
दसधा मत्त मराल सदा लीला गुन गानै ॥
आरत हरिगुन सील सम प्रीति रीति प्रतिपाल की ।
भक्तन हित भगवत रची देही माधव ग्वाल की ॥१६५॥

श्रीअगर सुगुरु परताप तें पूरी परी प्रयाग की ॥
मानस बाचक काय रामचरनन चित दीनो ।
भक्तन सों अति प्रेम भावना करि सिर लीनो ॥
रास मध्य निर्जान देह दुति दसा दिखाई ।
आड़ओ बलियो अंक महोछो पूरी पाई ॥
क्यारे कलस औली ध्वजा बिदुषश्लाघा भाग की ।
श्रीअगर सुगुरु परताप तें पूरी परी प्रयाग की ॥१६६॥

प्रगट अमित गुन प्रेमनिधि धन्य बिप्र जेहिं नाम धर्यो ॥
सुंदर सील स्वभाव मधुर बानी मंगलकरु ।
भक्तन को सुख देन फल्यो बहुधा दसधा तरु ॥
सदन बसत निर्बेद सारभुक जगत असंगी ।
सदाचार ऊदार नेम हरिकथा प्रसंगी ॥
दयादृष्टि बसि आगरे कथा लोक पाबन कर्यो ।
प्रगट अमित गुन प्रेमनिधि धन्य बिप्र जेहिं नाम धर्यो ॥१६७॥

दूबरो जाहि दुनियाँ कहै सो भक्त भजन मोटो महंत ॥
सदाचार गुरु सिष्य त्यागबिधि प्रगट दिखाई ।
बाहिर भीतर बिसद लगी नहिं कलिजुग काई ॥
राघव रुचिर स्वभाव असद आलाप न भावै ।
कथा कीरतन नेम मिले संतन गुन गावै ॥
ताप तोलि पूरो निकष ज्यों घन अहरनि हीरो सहंत ।
दूबरो जाहि दुनियाँ कहै सो भक्त भजन मोटो महंत ॥१६८॥

दासन के दासत्व को चौकस चौकी ए मड़ई ॥
हरिनारायन नृपति पदम बेरछै बिराजै ।
गाँव हुसंगाबाद अटल उद्धव भल छाजै ॥
भेलै तुलसीदास ख्यात भट देव कल्यानो ।
बोहिथ बीरा रामदास सुहेलै परम सुजानो ॥
औली परमानंद के सबल धर्म कि ध्वजा गड़ई ।
दासन के दासत्व को चौकस चौकी ए मड़ई ॥१६९॥

अबला सरीर साधन सबल ए बाई हरिभजनबल ॥
दमा प्रगट सब दुनी रामबाई (बीरा) हीरामनि ।
लाली नीरा लच्छि जुगल पार्बती जगत धनि ॥
खीचनि केसी धना गोमती भक्त उपासिनि ।
बादररानी बिदित गंग जमुना रैदासिनि ॥
जेवा हरिषा जोइसिनि कुवँरिराय कीरति अमल ।
अबला सरीर साधन सबल ए बाई हरिभजनबल ॥१७०॥

कान्हरदास संतनि कृपा हरि हिरदै लाहो लह्यो ॥
श्रीगुरु सरनै आय भक्ति मारग सत जान्यो ।
संसारी धर्महि छाँड़ै झूँठ अरु साँच पिछान्यो ॥
ज्यों साखाद्रुम चंद्र जगत सों यहि बिधि न्यारो ।
सर्वभूत समदृष्टि गुननि गँभीर अति भारो ॥
भक्त भलाई बदत नित कुबचन कबहूँ नहिं कह्यो ।
कान्हरदास संतनि कृपा हरि हिरदै लाहो लह्यो ॥१७१॥

लट्यो लटेरा आन बिधि परम धरम अति पीन तन ॥
कहनी रहनी एक एक हरिपद अनुरागी ।
जस बितान जग तन्यो संतसम्मत बड़भागी ॥
तैसोइ पूत सपूत नूत फल जैसोइ परसा ।
हरि हरिदासनि टहल कवित रचना पुनि सरसा ॥
सुरसुरानँद संप्रदाय दृढ़ि केसव अधिक उदार मन ।
लट्यो लटेरा आन बिधि परम धरम अति पीन तन ॥१७२॥

केवलराम कलिजुग के पतित जीव पावन किया ॥
भक्ति भागवत बिमुख जगत गुरु नाम न जानैं ।
ऐसे लोग अनेक ऐंचि सन्मारग आने ॥
निर्मल रति निहकाम अजा तें सहज उदासी ।
तत्त्वदरसि तमहरन सील करुना की रासी ॥
तिलक दाम नवधा रतन कृष्ण कृपा करि दृढ़ि दिया ।
केवलराम कलिजुग के पतित जीव पावन किया ॥१७३॥

मोहन मिश्रित पदकमल आसकरन जस बिस्तर्यो ॥
धर्म सील गुनसींव महाभागवत राजरिषि ।
पृथीराज कुलदीप भीमसुत बिदित कील्ह सिषि ॥
सदाचार अति चतुर बिमल बानी रचनापद ।
सूर धीर उद्दार बिनय भलपन भक्तनि हद ॥
सीतापति राधासुबर भजन नेम कूरम धर्यो ।
मोहन मिश्रित पदकमल आसकरन जस बिस्तर्यो ॥१७४॥

निष्किंचन भक्तनि भजै हरि प्रतीति हरिबंस के ॥
कथा कीरतन प्रीति संतसेवा अनुरागी ।
खरिया खुरपा रीति ताहि ज्यों सर्बसु त्यागी ॥
संतोषी सुठि सील असद आलाप न भावै ।
काल बृथा नहिं जाय निरंतर गोबिँद गावै ॥
सिष सपूत श्रीरंग को उदित पारषद अंस के ।
निष्किंचन भक्तनि भजै हरि प्रतीति हरिबंस के ॥१७५॥

हरिभक्ति भलाइ गुन गँभीर बाँटे परी कल्यान के ॥
नवकिसोर दृढ़ि ब्रत अननि मारग इक धारा ।
मधुर बचन मनहरन सुखद जानै संसारा ॥
पर उपकार बिचार सदा करुना की रासी ।
मन बच सर्बस रूप भक्त पदरेनु उपासी ॥
धर्मदाससुत सील सुठि मन मान्यो कृष्ण सुजान के ।
हरिभक्ति भलाइ गुन गँभीर बाँटे परी कल्यान के ॥१७६॥

बिठलदास हरिभक्ति के दुहूँ हाथ लाडू लिया ॥
आदि अंत निर्बाह भक्तपदरजब्रतधारी ।
रह्यो जगत सों ऐंड़ तुच्छ जाने संसारी ॥
प्रभुता पति की पधति प्रगट कुलदीप प्रकासी ।
महत सभा में मान जगत जानै रैदासी ॥
पद पढ़त भई परलोक गति गुरु गोबिँद जुग फल दिया ।
बिठलदास हरिभक्ति के दुहूँ हाथ लाडू लिया ॥१७७॥

भगवंत रचे भारी भगत भक्तनि के सन्मान को ॥
क्वाहब श्रीरँग सुमति सदानँद सर्बस त्यागी ।
स्यामदास लघुलंब अननि लाखै अनुरागी ॥
मारु मुदित कल्यान परस बंसी नारायन ।
चेता ग्वाल गुपाल सँकर लीला पारायन ॥
संत सेय कारज किया तोषत स्याम सुजान को ।
भगवंत रचे भारी भगत भक्तनि के सन्मान को ॥१७८॥

तिलक दाम परकास को हरीदास हरि निर्मयो ॥
सरनागत को शिबिर दान दधीच टेक बलि ।
परम धर्म प्रह्लाद सीस जगदेव देन कलि ॥
बीकावत बानैत भक्तिपन धर्मधुरंधर ।
तूँवर कुल दीपक्क संतसेवा नित अनुसर ॥
पार्थपीठ अचरज कौन सकल जगत में जस लयो ।
तिलक दाम परकास को हरीदास हरि निर्मयो ॥१७९॥

नंदकुँवर कृष्णदास को निज पग तें नूपुर दियो ॥
तान मान सुर ताल सुलय सुंदर सुठि सोहै ।
सुधा अंग भ्रूभंग गान उपमा को को है ॥
रत्नाकर संगीत रागमाला रँगरासी ।
रिझये राधालाल भक्तपदरेनु उपासी ॥
स्वर्नकार खरगू सुवन भक्त भजन दृढ़ि ब्रत लियो ।
नंदकुँवर कृष्णदास को निज पग तें नूपुर दियो ॥१८०॥

परमधर्म प्रतिपोष को संन्यासी ए मुकुटमनि ॥
चित्सुख टीकाकार भक्ति सर्बोपरि राखी ।
श्रीदामोदरतीर्थ राम अर्चन बिधि भाखी ॥
चंद्रोदय हरिभक्ति नरसिंहारन्य कीन्ही ।
माधव मधुसूदन (सरस्वती) परमहँस कीरति लीन्ही ॥
प्रबोधानंद रामभद्र जगदानंद कलिजुग धनि ।
परमधर्म प्रतिपोष को संन्यासी ए मुकुटमनि ॥१८१॥

अष्टांग जोग तन त्यागियो द्वारिकादास जाने दुनी ॥
सरिता कूकस गाँव सलिल में ध्यान धर्यो मन ।
रामचरन अनुराग सुदृढ़ जाके साँचो पन ॥
सुत कलत्र धन धाम ताहि सों सदा उदासी ।
कठिन मोह को फंद तरकि तोरी कुल फाँसी ॥
कील्ह कृपा बल भजन के ग्यानखड्ग माया हनी ।
अष्टांग जोग तन त्यागियो द्वारिकादास जाने दुनी ॥१८२॥

पूरन प्रगट महिमा अनँत करिहै कौन बखान ॥
उदय अस्त परबत्त गहिर मधि सरिता भारी ।
जोग जुगति बिश्वास तहाँ दृढ़ि आसन धारी ॥
ब्याघ्र सिंह गुंजै खरा कछु संक न मानै ।
अर्द्ध न जाते पवन उलटि ऊरध को आनै ॥
साखि सब्द निर्मल कहा कथिया पद निर्बान ।
पूरन प्रगट महिमा अनँत करिहै कौन बखान ॥१८३॥

(श्री)रामानुज पद्धति प्रताप भट्ट लच्छमन अनुसर्यो ॥
सदाचार मुनिबृत्ति भजन भागवत उजागर ।
भक्तन सों अतिप्रीति भक्ति दसधा को आगर ॥
संतोषी सुठि सील हृदय स्वारथ नहिं लेसी ।
परमधर्म प्रतिपाल संत मारग उपदेसी ॥
श्रीभागवत बखानि कै नीर क्षीर बिबरन कर्यो ।
(श्री)रामानुज पद्धति प्रताप भट्ट लच्छमन अनुसर्यो ॥१८४॥

दधीचि पाछे दूजी करी कृष्णदास कलि जीति ॥
कृष्णदास कलि जीति न्योति नाहर पल दीयो ।
अतिथिधर्म प्रतिपाल प्रगट जस जग में लीयो ॥
उदासीनता अवधि कनक कामिनि नहिं रातो ।
रामचरनमकरंद रहत निसिदिन मदमातो ।
गलते गलित अमित गुन सदाचार सुठि नीति ।
दधीचि पाछे दूजी करी कृष्णदास कलि जीति ॥१८५॥

भली भाँति निबही भगति सदा गदाधरदास की ॥
लालबिहारी जपत रहत निसिबासर फूल्यो ।
सेवा सहज सनेह सदा आनँदरस झूल्यो ॥
भक्तन सों अति प्रीति रीति सबही मन भाई ।
आसय अधिक उदार रसन हरि कीरति गाई ॥
हरि बिश्वास हिय आनि कै सपनेहुँ अन्य न आस की ।
भली भाँति निबही भगति सदा गदाधरदास की ॥१८६॥

हरिभजन सींव स्वामी सरस श्रीनारायनदास अति ॥
भक्ति जोग जुत सुदृढ़ि देह निजबल करि राखी ।
हिये सरूपानंद लाल जस रसना भाखी ॥
परिचै प्रचुर प्रताप जानमनि रहस सहायक ।
श्रीनारायन प्रगट मनो लोगनि सुखदायक ॥
नित सेवत संतनि सहित दाता उत्तरदेस गति ।
हरिभजन सींव स्वामी सरस श्रीनारायनदास अति ॥१८७॥

भगवानदास श्रीसहित नित सुहृद सील सज्जन सरस ॥
भजनभाव आरूढ़ गूढ़ गुन बलित ललित जस ।
श्रोता श्रीभागवत रहसि ग्याता अच्छर रस ॥
मथुरापुरी निवास आस पद संतनि इकचित ।
श्रीजुत खोजी स्याम धाम सुखकर अनुचरहित ॥
अति गंभीर सुधीर मति हुलसत मन जाके दरस ।
भगवानदास श्रीसहित नित सुहृद सील सज्जन सरस ॥१८८॥

भक्तपच्छ ऊदारता यह निबही कल्यान की ॥
जगन्नाथ को दास निपुन अति प्रभु मन भायो ।
परम पारषद समुझि जानि प्रिय निकट बुलायो ॥
प्रान पयानो करत नेह रघुपति सों जोर्यो ।
सुत दारा धन धाम मोह तिनका ज्यों तोर्यो ॥
कौंधनी ध्यान उर में लस्यो रामनाम मुख जानकी ।
भक्तपच्छ ऊदारता यह निबही कल्यान की ॥१८९॥

सोदर सोभूराम के सुनौ संत तिनकी कथा ॥
संतदास सदबृत्ति जगत छोई करि डार्यो ।
महिमा महा प्रबीन भक्तिवित धर्म विचार्यो ॥
बहुर्यो माधवदास भजनबल परिचै दीनो ।
करि जोगिनि सों बाद बसन पावक प्रति लीनो ॥
परमधर्म बिस्तार हित प्रगट भए नाहिंन तथा ।
सोदर सोभूराम के सुनौ संत तिनकी कथा ॥१९०॥

बूड़ैये बिदित कान्हर कृपालु आत्माराम आगमदरसी ॥
कृष्णभक्ति को थंभ ब्रह्मकुल परम उजागर ।
छमासील गंभीर सबै लच्छन को आगर ॥
सर्बसु हरिजन जानि हृदय अनुराग प्रकासै ।
असन बसन सन्मान करत अति उज्ज्वल आसै ॥
सोभूराम प्रसाद तें कृपादृष्टि सबपर बसी ।
बूड़ैये बिदित कान्हर कृपालु आत्माराम आगमदरसी ॥१९१॥

भक्तरतनमाला सुधन गोबिँद कंठ बिकास किय ॥
रुचिरसील घननील लील रुचि सुमति सरितपति ।
बिबिध भक्त अनुरक्त ब्यक्त बहु चरित चतुर अति ॥
लघु दीरघ स्वर सुद्ध बचन अबिरुद्ध उचारन ।
बिश्वबास बिश्वास दास परिचय बिस्तारन ॥
जानि जगतहित सब गुननि सुसम नरायनदास दिय ।
भक्तरतनमाला सुधन गोबिँद कंठ बिकास किय ॥१९२॥

भक्तेस भक्त भव तोषकर संत नृपति बासो कुँवर ॥
श्रीजुत नृपमनि जगतसिंह दृढ़ि भक्ति परायन ।
परमप्रीति किए सुबस सील लक्ष्मीनारायन ॥
जासु सुजस सहजहीं कुटिल कलि कल्प जु घायक ।
आज्ञा अटल सुप्रगट सुभट कटकनि सुखदायक ॥
अति प्रचंड मार्तंड सम तमखंडन दोर्दंड बर ।
भक्तेस भक्त भव तोषकर संत नृपति बासो कुँवर ॥१९३॥

गिरिधरन ग्वाल गोपाल को सखा साँच लौ संगको ॥
प्रेमी भक्त प्रसिद्ध गान अति गद्गद बानी ।
अंतर प्रभु सों प्रीति प्रगट रह नाहिंन छानी ॥
नित्य करत आमोद बिपिन तन बसन बिसारै ।
हाटक पट हित दान रीझि तत्काल उतारै ॥
मालपुरै मंगलकरन रास रच्यो रस रंगको ।
गिरिधरन ग्वाल गोपाल को सखा साँच लौ संगको ॥१९४॥

गोपाली जनपोष को जगत जसोदा अवतरी ॥
प्रगट अंग में प्रेम नेम सों मोहन सेवा ।
कलिजुग कलुष न लग्यो दास तें कबहुँ न छेवा ॥
बानी सीतल सुखद सहज गोबिँदधुनि लागी ।
लच्छन कला गँभीर धीर संतनि अनुरागी ॥
अंतर सुद्ध सदा रहै रसिक भक्ति निज उर धरी ।
गोपाली जनपोष को जगत जसोदा अवतरी ॥१९५॥

श्रीरामदास रस रीति सों भली भाँति सेवत भगत ॥
सीतल परम सुसील बचन कोमल मुख निकसै ।
भक्त उदित रबि देखि हृदय बारिज जिमि बिकसै ॥
अति आनँद मन उमगि संत परिचर्या करई ।
चरन धोइ दंडवत बिबिध भोजन बिस्तरई ॥
बछवन निबास बिश्वास हरि जुगल चरन उर जगमगत ।
श्रीरामदास रस रीति सों भली भाँति सेवत भगत ॥१९६॥

बिप्र सारसुत घर जनम रामराय हरि रति करी ॥
भक्ति ग्यान बैराग्य जोग अंतर गति पाग्यो ।
काम क्रोध मद लोभ मोह मत्सर सब त्याग्यो ॥
कथा कीरतन मगन सदा आनँद रस झूल्यो ।
संत निरखि मन मुदित उदित रबि पंकज फूल्यो ॥
वैर भाव जिन द्रोह किय तासु पाग खसि भ्वैं परि ।
बिप्र सारसुत घर जनम रामराय हरि रति करी ॥१९७॥

भगवँत मुदित उदार जस रस रसना आस्वाद किय ॥
कुंजबिहारी केलि सदा अभ्यंतर भासै ।
दंपति सहज सनेह प्रीति परिमिति परकासै ॥
अननि भजन रसरीति पुष्टिमारग करि देखी ।
बिधि निषेध बल त्यागि पागि रति हृदय विशेषी ॥
माधव सुत संमत रसिक तिलक दाम धरि सेव लिय ।
भगवँत मुदित उदार जस रस रसना आस्वाद किय ॥१९८॥

दुर्लभ मानुषदेह को लालमती लाहो लियो ॥
गौरस्याम सों प्रीति प्रीति जमुनाकुंजन सों ।
बंसीबट सों प्रीति प्रीति ब्रजरजपुंजन सों ॥
गोकुल गुरुजन प्रीति प्रीति घन बारह बन सों ।
पुर मथुरा सों प्रीति प्रीति गिरि गोबर्धन सों ॥
बास अटल बृंदा बिपिन दृढ़ि करि सो नागरि कियो ।
दुर्लभ मानुषदेह को लालमती लाहो लियो ॥१९९॥

अग्र कहैं त्रैलोक में हरि उर धरैं तेई बड़ए ॥
कबिजन करत बिचार बड़ओ को ताहि भनिज्जै ।
कोउ कह अवनी बड़ई जगत आधार फनिज्जै ॥
सो धारी सिर शेष ताहि सिव भूषन कीनो ।
सिव आसन कैलास भुजा भरि रावन लीनो ॥
रावन जीत्यो बालि बालि राघव इक सायक दँड़ए ।
अग्र कहैं त्रैलोक में हरि उर धरैं तेई बड़ए ॥२००॥

हरि सुजस प्रीति हरिदास कै त्यों भावै हरिदास जस ॥
नेह परसपर अघट निबहि चारों जुग आयो ।
अनुचर को उत्कर्ष स्याम अपने मुख गायो ॥
ओतप्रोत अनुराग प्रीति सबही जग जानै ।
पुर प्रवेस रघुवीर भृत्य कीरति जु बखानै ॥
अग्र अनुग गुन बरन तें सीतापति नित होत बस ।
हरि सुजस प्रीति हरिदास कै त्यों भावै हरिदास जस ॥२०१॥

उत्कर्ष सुनत संतन को अचरज कोऊ जिन करौ ॥
दुर्वासा प्रति स्याम दासबसता हरि भाखी ।
ध्रुव गज पुनि प्रह्लाद राम सबरी फल साखी ॥
राजसूय जदुनाथ चरन धोय जूँठ उठाई ।
पांडव बिपति निवारि दिए बिष बिषया पाई ॥
कलि बिसेष परचौ प्रगट आस्तिक ह्वै कै चित धरौ ।
उत्कर्ष सुनत संतन को अचरज कोऊ जिन करौ ॥२०२॥

पादप पेड़हिं सींचते पावै अँग अँग पोष ।
पूरबजा ज्यों बरन तें सुनि मानियो सँतोष ॥२०३॥

भक्त जिते भूलोक में कथे कौन पै जाय ।
समुँदपान श्रद्धा करै कहँ चिरि पेट समाय ॥२०४॥

श्रीमूरति सब वैष्णव लघु बड़ गुननि अगाध ।
आगे पीछे बरन तें जिनि मानौ अपराध ॥२०५॥

फल की शोभा लाभ तरु तरु शोभा फल होय ।
गुरू शिष्य की कीर्ति में अचरज नाहीं कोय ॥२०६॥

चारि जुगन में भगत जे तिनके पद की धूरि ।
सर्वसु सिर धरि राखिहौं मेरी जीवन मूरि ॥२०७॥

जग कीरति मंगल उदय तीनों ताप नशाय ।
हरिजन के गुन बरन तें हरि हृदि अटल बसाय ॥२०८॥

हरिजन के गुन बरनते (जो) करै असूया आय ।
इहाँ उदर बाढ़ाइ बिथा अरु परलोक नसाय ॥२०९॥

(जो) हरिप्रापति की आस है तो हरिजन गुन गाव ।
नतरु सुकृत भुँजे बीज लौं जनम जनम पछिताव ॥२१०॥

भक्तदाम संग्रह करैं कथन श्रवन अनुमोद ।
सो प्रभु प्यारो पुत्र ज्यों बैठे हरि की गोद ॥२११॥

अच्युतकुल जस इक बेरहूँ जिनकी मति अनुरागि ।
तिनकी भगति सुकृत में निश्चै होय बिभागि ॥२१२॥

भक्तदाम जिन जिन कहे तिनकी जूँठनि पाय ।
मो मति सार अच्छर द्वै कीनौं सिलौ बनाय ॥२१३॥

काहू के बल जोग जग कुल करनी की आस ।
भक्तनाममाला अगर (उर) बसौ नरायनदास ॥२१४॥

॥ इति श्रीनारायणदासनाभाकृत श्रीभक्तमाल ॥

-- pūrvārdha --

bhakta bhakti bhagavaṅta guru catura nāma bapu ēka ।
inakē pada baṅdana kiē nāsahiṅ bighna anēka ॥1॥

maṅgala ādi bicāri raha bastu na aura anūpa ।
harijana kē jasa gāvatē harijana maṅgalarūpa ॥2॥

saṅtana nirnaya kiyo mathi śruti purāna itihāsa ।
bhajibē ko doī sughara kai hari kai haridāsa ॥3॥

(śrī)agradēva ājñā daī bhaktana kē jasa gāu ।
bhavasāgara kē tarana ko nāhina aura upāu ॥4॥

caubīsa rūpa līlā rucira (śrī)agradāsa ura pada dharau ॥
jaya jaya mīna barāha kamaṭha narahari bali bāvana ।
paraśurāma raghubīra kṛṣṇa kīrati jagapāvana ॥
buddha kalakkī byāsa pṛthū hari ham̐sa manvaṅtara ।
jagya ṛṣabha hayagrīva dhruva baradēna dhanvantara ॥
badarīpati data kapiladēva sanakādika karuṇā karau ।
caubīsa rūpa līlā rucira (śrī)agradāsa ura pada dharau ॥5॥

carana cinha raghubīra kē saṅtana sadā sahāyakā ॥
aṅkuśa aṅbara kuliśa kamala java dhvajā dhēnupada ।
śaṅkha cakra svastīka jambuphala kalasa sudhāhrada ॥
ardhacaṅdra ṣaṭakona mīna bim̐du ūradharēṣā ।
aṣṭakona trayakona iṅdra dhanu puruṣa biśēṣā ॥
sītāpatipada nita basata ētē maṅgaladāyakā ।
carana cinha raghubīra kē saṅtana sadā sahāyakā ॥6॥

inakī kṛpā aura puni samujhē dvādasa bhakta pradhāna ॥
bidhi nārada śaṅkara sanakādika kapiladēva manu bhūpa ।
naraharidāsa janaka bhīṣama bali śukamuni dharmasvarūpa ॥
antaraṅga anucara harijū kē jo inako jasa gāvai ।
ādi aṅtalauṅ maṅgala tinako śrotā baktā pāvai ॥
ajāmēla parasaṅga yaha nirṇaya parama dharma kē jāna ।
inakī kṛpā aura puni samujhē dvādasa bhakta pradhāna ॥7॥

mo cittabṛtti nita taham̐ raho jaham̐ nārāyaṇa pāraṣada ॥
biṣvaksēna jaya bijaya prabala bala maṅgalakārī ।
naṅda sunaṅda subhadra bhadra jaga āmayahārī ॥
caṅḍa pracaṅḍa binīta kumuda kumudāccha karuṇālaya ।
śīla suśīla suṣēṇa bhāva bhaktana pratipālaya ॥
lakṣmīpati prīṇana prabīna bhajanānanda bhaktana suhṛda ।
mo cittabṛtti nita taham̐ raho jaham̐ nārāyaṇa pāraṣada ॥8॥

hariballabha saba prārathoṅ (jina) caranarēnu āśā dharī ॥
kamalā garuḍa sunaṅda ādi ṣoḍasa prabhupadarati ।
(hanumaṅta) jāmavaṅta sugrīva vibhīṣaṇa śabarī khagapati ॥
dhruva uddhava am̐barīṣa bidura akrūra sudāmā ।
caṅdrahāsa citrakētu grāha gaja pāṅḍava nāmā ॥
kauṣārava kuṅtībadhū paṭa aiṅcata lajjāharī ।
hariballabha saba prārathoṅ (jina) caranarēnu āśā dharī ॥9॥

padapaṅkaja bām̐chauṅ sadā jinakē hari ura nita basaiṅ ॥
yogēśvara śrutadēva aṅga mucu(kuṅda) priyabrata jētā ।
pṛthū parīkṣita śēṣa sūta śaunaka paracētā ॥
śatarūpā traya sutā sunīti sati sabahi mam̐dālasa ।
jagyapatni brajanāri kiyē kēśava apanē basa ॥
aisē nara nārī jitē tinahī kē gāūm̐ jasaiṅ ।
padapaṅkaja bām̐chauṅ sadā jinakē hari ura nita basaiṅ ॥10॥

aṅghrī ambuja pāṅsu ko janma janma hauṅ jācihauṅ ॥
prācīnabarhi satyabrata rahūgaṇa sagara bhagīratha ।
bālmīki mithilēsa gaē jē jē gobim̐da patha ॥
rukmāṅgada haricaṅda bharata dadhīci udārā ।
suratha sudhanvā śibira sumati ati balikī dārā ॥
nīla moradhvaja tāmradhvaja alaraka kīrati rācihauṅ ।
aṅghrī ambuja pāṅsu ko janma janma hauṅ jācihauṅ ॥11॥

tina carana dhūrī mo bhūri sira jē jē harimāyā tarē ॥
ribhu ikṣvāku aru aila gādhi raghu rai gai suci śatadhanvā ।
amūrati aru ranti utaṅka bhūri dēvala vaivasvatamanvā ॥
nahuṣa jajāti dilīpa puru jadu guha māndhātā ।
pippala nimi bharadvāja daccha sarabhaṅga sam̐ghātā ॥
saṅjaya samīka uttānapāda jāgyabalkya jasa jaga bharē ।
tina carana dhūrī mo bhūri sira jē jē harimāyā tarē ॥12॥

nimi aru nava yogēśvarā pādatrāna kī hauṅ sarana ॥
kabi hari karabhājana bhaktiratnākara bhārī ।
antariccha aru camasa ananyatā padhati udhārī ॥
prabudha prēma kī rāsi bhūridā ābirahotā ।
pippala drumila prasiddha bhavābdhi pāra kē potā ॥
jayaṅtīnaṅdana jagata kē tribidha tāpa āmayaharana ।
nimi aru nava yogēśvarā pādatrāna kī hauṅ sarana ॥13॥

padaparāga karunā karau jē nētā navadhā bhakti kē ॥
śravana parīcchita sumati vyāsasāvaka kīraṅtana ।
suṭhi sumirana prahalāda pṛthu pūjā kamalā caranani mana ॥
baṅdana suphalaka subana dāsa dīpatti kapīśvara ।
sakhyatvē pāratha samarpana ātama balidhara ॥
upajīvī ina nāma kē ētē trātā agatikē ।
padaparāga karunā karau jē nētā navadhā bhakti kē ॥14॥

hariprasāda rasa svāda kē bhakta itē paramāna ॥
śaṅkara śuka sanakādi kapila nārada hanumānā ।
biṣvaksēna prahlāda balī bhīṣama jaga jānā ॥
arjuna dhruva am̐barīṣa vibhīṣaṇa mahimā bhārī ।
anurāgī akrūra sadā uddhava adhikārī ॥
bhagavaṅta bhukta avaśiṣṭa kī kīrati kahata sujāna ।
hariprasāda rasa svāda kē bhakta itē paramāna ॥15॥

dhyāna caturbhuja cita dharyo tinahiṅ sarana hauṅ anusarauṅ ॥
agastya pulastya pulaha cyabana basiṣṭha saubhari ṛṣi ।
kardama atri ṛcīka garga gautama byāsaśiṣi ॥
lomasa bhṛgu dālabhya aṅgirā śa‍ṛṅgi prakāsī ।
māṅḍavya biśvāmitra durbāsā sahasa aṭhāsī ॥
jābāli jamadagni māyādarśa kaśyapa parabata pārāśara padaraja dharauṅ ।
dhyāna caturbhuja cita dharyo tinahiṅ sarana hauṅ anusarauṅ ॥16॥

sādhana sādhya satraha purāṇa phalarūpī śrībhāgavata ॥
brahma viṣṇu śiva liṅga padama askam̐da bistārā ।
bāmana mīna barāha agni kūrama ūdārā ॥
garuḍa nāradī bhaviṣya brahmabaibarta śravaṇa śuci ।
mārkaṅḍēya brahmāṅḍa kathā nānā upajē ruci ॥
parama dharma śrīmukhakathita catuḥślokī nigama śata ।
sādhana sādhya satraha purāṇa phalarūpī śrībhāgavata ॥17॥

dasa āṭha smṛti jina uccarī tina pada sarasija bhāla mo ॥
manusmṛti ātrēya vaiṣṇavī hārītaka jāmī ।
jāgyabalkya aṅgirā śanaiścara sāṅvartaka nāmī ॥
kātyāyani śāṅḍilya gautamī bāsiṣṭhī dāṣī ।
suraguru śātātāpi parāśara kratu muni bhāṣī ॥
āśā pāsa udāradhī paraloka loka sādhana so ।
dasa āṭha smṛti jina uccarī tina pada sarasija bhāla mo ॥18॥

pāvaiṅ bhakti anapāyinī jē rāmasaciva sumirana karaiṅ ॥
dhṛṣṭī bijaya jayaṅta nītipara suci subinītā ।
rāṣṭarabardhana nipuṇa surāṣṭara parama punītā ॥
aśoka sadā ānaṅda dharmapālaka tattvavētā ।
maṅtrīvarya sumaṅtra caturjuga maṅtrī jētā ॥
anāyāsa raghupati prasanna bhavasāgara dustara taraiṅ ।
pāvaiṅ bhakti anapāyinī jē rāmasaciva sumirana karaiṅ ॥19॥

śubha dṛṣṭi vṛṣṭi mopara karau jē sahacara raghuvīra kē ॥
dinakarasuta harirāja bālibacha kēsari aurasa ।
dadhimukha dvibida mayaṅda rīchapati sama ko paurasa ॥
ulkāsubhaṭa suṣēna darīmukha kumuda nīla nala ।
śarabhara gavaya gavāccha panasa gam̐dhamādana atibala ॥
padma aṭhāraha yūthapati rāmakāja bhaṭa bhīra kē ।
śubha dṛṣṭi vṛṣṭi mopara karau jē sahacara raghuvīra kē ॥20॥

braja baḍa़ē gopa parjanya kē suta nīkē nava naṅda ॥
dharānaṅda dhruvanaṅda tṛtiya upanaṅda sunāgara ।
caturtha tahām̐ abhinaṅda naṅda sukhasiṅdhu ujāgara ॥
suṭhi sunaṅda paśupāla nirmala niścaya abhinaṅdana ।
karmā dharmānaṅda anuja ballabha jagabaṅdana ॥
āsapāsa vā bagara kē jaham̐ biharata pasupa svachaṅda ।
braja baḍa़ē gopa parjanya kē suta nīkē nava naṅda ॥21॥

bāla bṛddha nara nāri gopa hauṅ arthī una pāda raja ॥
naṅdagopa upanaṅda dhruva dharānaṅda mahari jasodā ।
kīratidā vṛṣabhānu kum̐vari sahacari mana modā ॥
madhumaṅgala subala subāhu bhoja arjuna śrīdāmā ।
maṅḍali gvāla anēka śyāma saṅgī bahu nāmā ॥
ghoṣa nivāsini kī kṛpā sura nara bām̐chita ādi aja ।
bāla bṛddha nara nāri gopa hauṅ arthī una pāda raja ॥22॥

brajarājasuvana sam̐ga sadana mana anuga sadā tatpara rahaiṅ ॥
raktaka patraka aura patri sabahī mana bhāvaiṅ ।
madhukaṅṭhī madhuvarta rasāla bisāla suhāvaiṅ ॥
prēmakaṅda makaraṅda sadā ānam̐da cam̐dahāsā ।
payada bakula rasadāna sāradā buddhi prakāsā ॥
sēvā samaya bicārikai cāru catura cita kī lahaiṅ ।
brajarājasuvana sam̐ga sadana mana anuga sadā tatpara rahaiṅ ॥23॥

sapta dvīpa mēṅ dāsa jē tē mērē siratāja ॥
jambudvīpa aru placcha sālamali bahuta rājariṣi ।
kusa pabitra puni krauṅca kauna mahimā jānē likhi ॥
sāka bipula bistāra prasiddha nāmī ati puhakara ।
parbata lokāloka oka ṭāpū kaṅcanaghara ॥
haribhṛtya basata jē jē jahām̐ tina sana nita prati kāja ।
sapta dvīpa mēṅ dāsa jē tē mērē siratāja ॥24॥

madhyadīpa navakhaṅḍa mēṅ bhakta jitē mama bhūpa ॥
ilābarta ādhīsa saṅkaraṣana anuga sadāśiva ।
ramanaka macha manu dāsa hiranya kūrma arjama iva ॥
kuru barāha bhūbhṛtya barṣa harisiṅha prahalādā ।
kiṅpuruṣa rāma kapi bharata narāyana bīnānādā ॥
bhadrāśva grīvahaya bhadraśrava kētu kāma kamalā anūpa ।
madhyadīpa navakhaṅḍa mēṅ bhakta jitē mama bhūpa ॥25॥

śvētadvīpa kē dāsa jē śravana suno tinakī kathā ॥
śrīnārāyana badana niraṅtara tāhī dēkhaiṅ ।
palaka parai jo bīca koṭi jamajātana lēkhaiṅ ॥
tinakē darasana kāja gaē taham̐ bīnādhārī ।
śyāma daī kara saina ulaṭi aba nahiṅ adhikārī ॥
nārāyana ākhyāna dṛḍha़ taham̐ prasaṅga nāhina tathā ।
śvētadvīpa kē dāsa jē śravana suno tinakī kathā ॥26॥

uraga aṣṭakula dvārapati sāvadhāna haridhāma thiti ॥
ilāpatra mukha anam̐ta anam̐ta kīrati bistārata ।
padma saṅku pana pragaṭa dhyāna uratē nahīṅ ṭārata ॥
am̐śukaṅbala bāsukī ajita āgyā anubaratī ।
karakoṭaka tacchaka subhaṭṭa sēvā sira dharatī ॥
āgamokta śivasaṅhitā agara ēkarasa bhajana rati ।
uraga aṣṭakula dvārapati sāvadhāna haridhāma thiti ॥27॥

-- uttarārdha -- rāmānanda udāra, sudhānidhi avani kalpataru ।
viṣṇusvāmī bohittha sindhu saṅsāra pāra karu ॥
madhvācāraja mēgha bhakti sara ūsara bhariyā ।
nimbāditi āditya, kuhara ajñāna ju hariyā ॥
janama karama bhāgavata dharama saṅpradāya thāpī aghaṭa ।
caubīsa prathama hari bapu dharē tyoṅ caturvyūha kalijuga pragaṭa ॥28॥

rāmānanda śrīpaddhati, viṣṇu svāmi tripurāri ।
nimbāditya sanakādika, madhukara guru mukha cāri ॥29॥

sampradāya siromani siṅdhujā racyo bhakti bittāna ॥
biṣvakasēna munivarya supuni śaṭhakopa pranītā ।
bopadēva bhāgavata lupta udharyo navanītā ॥
maṅgala muni śrīnātha puṅḍarīkāccha paramajasa ।
rāmamiśra rasarāsi pragaṭa paratāpa parāṅkusa ॥
yāmuna muni rāmānuja timiraharana udaya bhāna ।
sampradāya siromani siṅdhujā racyo bhakti bittāna ॥30॥

sahasa āsya upadēsa kari jagata uddharana jatana kiyo ॥
gopura hvai ārūḍha़ ucca svara maṅtra ucāryo ।
sūtē nara parē jāgi bahattari śravanani dhāryo ॥
titanēī gurudēva padhati bhaī nyārī nyārī ।
kura tāraka siṣa prathama bhakti bapu maṅgalakārī ॥
kṛpanapāla karuṇā samudra rāmānuja sama nahīṅ biyo ।
sahasa āsya upadēsa kari jagata uddharana jatana kiyo ॥31॥

catura mahaṅta diggaja catura bhakti bhūmi dābē rahaiṅ ॥
śrutiprajñā śrutidēva ṛṣabha puhakara ibha aisē ।
śrutidhāmā śrutiudadhi parājita bāmana jaisē ॥
rāmānuja gurubaṅdhu bidita jaga maṅgalakārī ।
śivasaṅhitā pranīta gyāna sanakādika sārī ॥
im̐dirā padhati udāradhī sabhā sākhi sāram̐ga kahaiṅ ।
catura mahaṅta diggaja catura bhakti bhūmi dābē rahaiṅ ॥32॥

ācāraja jāmāta kī kathā sunata hari hoi rati ॥
mālādhārī mṛtaka bahyo saritā mēṅ āyo ।
dāhakṛtya jyoṅ baṅdhu nyauti saba kuṭum̐ba bulāyo ॥
nāka sam̐kocahiṅ bipra tabahiṅ haripura jana āē ।
jēṅvata dēkhē sabani jāta kāhū nahiṅ pāē ॥
lālācāraja lakṣadhā pracura bhaī mahimā jagati ।
ācāraja jāmāta kī kathā sunata hari hoi rati ॥33॥

śrīmāraga upadēśa kṛta śravana sunau ākhyāna suci ॥
gurū gamana (kiyo) paradēśa siṣya suradhunī dṛḍha़iāī ।
ēka majjana ēka pāna hṛdaya baṅdanā karāī ॥
guru gaṅgā mēṅ prabisi siṣya ko bēgi bulāyo ।
viṣṇupadī bhaya māni kamalapatrana para dhāyo ॥
pādapadma tā dina pragaṭa saba prasanna muni parama ruci ।
śrīmāraga upadēśa kṛta śravana sunau ākhyāna suci ॥34॥

(śrī)rāmānanda paddhati pratāpa avani amṛta hvai avataryo ॥
dēvācāraja dutiya mahāmahimā hariyānam̐da ।
tasya rāghavānaṅda bhayē bhaktana ko mānada ॥
pṛthvī patrāvalamba karī kāsī asthāyī ।
cāri barana āśrama sabahī ko bhakti dṛḍha़iāī ॥
tina kē rāmānanda pragaṭa biśvamaṅgala jina bapu dharyo ।
(śrī)rāmānanda paddhati pratāpa avani amṛta hvai avataryo ॥35॥

(śrī)rāmānanda raghunātha jyoṅ dutiya sētu jagatarana kiyo ॥
anaṅtānaṅda kabīra sukhā surasurā padmāvatī naraharī ।
pīpā bhāvānaṅda raidāsa dhanā sēna surasura kī gharaharī ॥
auro siṣya prasiṣya ēka tē ēka ujāgara ।
jagamaṅgala ādhāra bhakti dasadhā kē āgara ॥
bahuta kāla bapu dhārī kē pranata janana ko pāra diyo ।
(śrī)rāmānanda raghunātha jyoṅ dutiya sētu jagatarana kiyo ॥36॥

anaṅtānaṅda pada parasi kai lokapāla sē tē bhayē ॥
jogānaṅda gayēsa karamacam̐da alha paihārī ।
sārirāmadāsa śrīraṅga avadhi guna mahimā bhārī ॥
tinakē narahari udita mudita mēghā maṅgalatana ।
raghubara jadubara gāi vimala kīrati saṅcyo dhana ॥
haribhakti sindhubēlā racē pāni padmajā sira dayē ।
anaṅtānaṅda pada parasi kai lokapāla sē tē bhayē ॥37॥

nirvēda avadhi kali kṛṣṇadāsa ana parihari paya pāna kiyo ॥
jākē sira kara dharyo tāsu kara tara nahīṅ āḍyo ।
arpyo pada nirbāna soka nirbhaya kari chāḍyo ॥
tējapuṅja bala bhajana mahāmuni ūradharētā ।
sēvata caranasaroja rāya rānā bhuvi jētā ॥
dāhimā baṅsa dinakara udaya saṅta kamala hiya sukha diyo ।
nirvēda avadhi kali kṛṣṇadāsa ana pariharī paya pāna kiyo ॥38॥

paihārī parasāda tēṅ siṣya sabai bhaē pārakara ॥
kīlha agara kēvalla caranabrata haṭhī narāyana ।
sūraja puruṣā pṛthū tripura haribhakti parāyana ॥
padmanābha gopāla ṭēka ṭīlā gadādhārī ।
dēvā hēma kalyāna gaṅga gaṅgāsama nārī ॥
viṣṇudāsa kanhara ram̐gā cām̐dana sabirī gobim̐da para ।
paihārī parasāda tēṅ siṣya sabai bhaē pārakara ॥39॥

gāṅgēya mṛtyu gaṅjyo nahīṅ tyoṅ kīlha karana nahiṅ kāla basa ॥
rāma carana ciṅtavani rahati nisi dina lau lāgī ।
sarvabhūta sira namita sūra bhajanānam̐da bhāgī ॥
sāṅkhya joga mata sudṛḍha़ kiyo anubhava hastāmala ।
brahmaraṅdhra kari gamana bhaē haritana karanī bala ॥
sumēradēvasuta jagabidita bhū bistāryo bimala jasa ।
gāṅgēya mṛtyu gaṅjyo nahīṅ tyoṅ kīlha karana nahiṅ kāla basa ॥40॥

(śrī)agradāsa haribhajana bina kāla bṛthā nahiṅ bittayo ॥
sadācāra jyoṅ saṅta prāpta jaisē kari āyē ।
sēvā sumirana sāvadhāna (carana) rāghava cita lāyē ॥
prasidha bāga soṅ prīti svahatha kṛta karata niraṅtara ।
rasanā nirmala nāma manahu baraṣata dhārādhara ।
(śrī)kṛṣṇadāsa kṛpā kari bhakti data mana baca krama kari aṭala dayo ।
(śrī)agradāsa haribhajana bina kāla vṛthā nahiṅ bittayo ॥41॥

kalijuga dharmapālaka pragaṭa ācāraja śaṅkara subhaṭa ॥
ucchṛṅkhala agyāna jitē anaīśvaravādī ।
bauddha kutarkī jaina aura pākhaṅḍahi ādi ॥
bimukhana ko diyo daṅḍa aiṅci sanmāraga ānē ।
sadācāra kī sīṅva biśva kīratihiṅ bakhānē ॥
īśvarāṅsa avatāra mahi maryādā mām̐ḍī aghaṭa ।
kalijuga dharmapālaka pragaṭa ācāraja śaṅkara subhaṭa ॥42॥

nāmadēva pratigyā nirbahī (jyoṅ) trētā naraharidāsa kī ॥
bāladasā biṭṭhala pāni jākē paya pīyo ।
mṛtaka gaū jivāya paracau asurana ko dīyo ॥
sēja salila tē kāḍha़ai pahilē jaisī hī hotī ।
dēvala ulṭyo dēkhi sakuci rahē sabahī sotī ॥
pam̐ḍuranātha kṛta anuga jyoṅ chāni svakara chai ghāsa kī ।
nāmadēva pratigyā nirbahī (jyoṅ) trētā naraharidāsa kī ॥43॥

jayadēva kabī nṛpacakkavai kham̐ḍamam̐ḍalēśvara āna kabi ॥
pracura bhayo tihum̐ loka gītagovinda ujāgara ।
koka kāvya navarasa sarasa śa‍ṛṅgāra ko sāgara ॥
aṣṭapadī abhyāsa karai tēhi buddhi baḍha़āvai ।
rādhāramana prasanna sunata taham̐ niścaya āvai ॥
saṅta saroruha khaṅḍa ko padmāpati sukhajanaka rabi ।
jayadēva kabī nṛpacakkavai kham̐ḍamam̐ḍalēśvara āna kabi ॥44॥

śrīdhara śrībhāgavata mēṅ parama dharama niranaya kiyo ॥
tīni kāṅḍa ēkatva sāni kou agya bakhānata ।
karmaṭha jñānī aiṅci artha ko anaratha bānata ॥
paramahaṅsa saṅhitā bidita ṭīkā bistāryo ।
ṣaṭa sāstra aviruddha vēda saṅmata hi bicāryo ॥
paramānanda prasāda tē mādho svakara sudhāra diyo ।
śrīdhara śrībhāgavata mēṅ parama dharama niranaya kiyo ॥45॥

kṛṣṇa kṛpā kopara pragaṭa bilvamaṅgala maṅgalasvarūpa ॥
karunāmṛta sukabitta jukti anuchiṣṭa ucārī ।
rasika janana jīvana ju hṛdaya hārāvali dhārī ॥
hari pakarāyo hātha bahuri taham̐ liyo chuṭāī ।
kahā bhayo kara chuṭaiṅ badauṅ jo hiyatēṅ jāī ॥
ciṅtāmani sam̐ga pāi kai brajabadhu kēlī barani anūpa ।
kṛṣṇa kṛpā kopara pragaṭa bilvamaṅgala maṅgalasvarūpa ॥46॥

kalijīva jam̐jālī kāranē viṣṇupurī baḍa़i nidhi sacī ॥
bhagavata dharma utaṅga āna dharma āna na dēkhā ।
pītara paṭatara bigata nikaṣa jyoṅ kuṅdanarēkhā ॥
kṛṣṇakṛpā kahi bēli phalita satsaṅga dikhāyo ।
koṭi graṅtha ko artha tēraha biracana mēṅ gāyo ॥
mahāsamudra bhāgavata tēṅ bhakti ratna rājī racī ।
kalijīva jam̐jālī kāranē viṣṇupurī baḍa़i nidhi sacī ॥47॥

viṣṇusvāmi sampradāya dṛḍha़ jñānadēva gaṅbhīramati ॥
nāma trilocana siṣya sūra sasi sadṛsa ujāgara ।
girā gaṅga unhāri kābya racanā prēmākara ॥
ācāraja haridāsa atula bala ānam̐dadāyana ।
tēhiṅ māraga ballabha bidita pṛthu padhati parāyana ॥
navadhā pradhāna sēvā sudṛḍha़ mana baca krama haricarana rati ।
viṣṇusvāmi sampradāya dṛḍha़ jñānadēva gaṅbhīramati ॥48॥

saṅtasākhi jānata sabai pragaṭa prēma kalijuga pradhāna ॥
bhaktadāsa ika bhūpa śravana sītā hara kīno ।
māra māra kari khaḍga bāji sāgara mam̐ha dīno ॥
narasim̐ha ko anukarana hoi hiranākusa māryo ।
vahai bhayo dasarathahi rāma bichurata tana chāryo ॥
kṛṣṇa dāma bāṅdhē sunē tēhi chana dīyo prāna ।
saṅtasākhi jānata sabai pragaṭa prēma kalijuga pradhāna ॥49॥

prasāda avagyā jāni kai pāni tajyo ēkai nṛpati ॥
hauṅ kā kahauṅ banāi bāta sabahī jaga jānē ।
karatē daunā bhayo syāma saurabha sukha mānē ॥
chapana bhogatēṅ pahila khīca karamā kī bhāvē ।
silapillē kē kahata kum̐ari pai hari cali āvē ॥
bhaktana hita suta viṣa diyo bhūpanāri prabhu rākhi pati ।
prasāda avagyā jāni kai pāni tajyo ēkai nṛpati ॥50॥

āsaya agādha duhum̐ bhakta ko haritoṣana atisaya kiyo ॥
raṅganātha ko sadana karana bahu buddhi bicārī ।
kapaṭa dharma raci jaina dravya hita dēha bisārī ॥
haṅsa pakaranē kāja badhika bānauṅ dhari āē ।
tilaka dāma kī sakuca jāni tihiṅ āpa bam̐dhāē ॥
sutabadha harijana dēkhi kai dai kanyā ādara diyo ।
āsaya agādha duhum̐ bhakta ko haritoṣana atisaya kiyo ॥51॥

cāroṅ juga caturbhuja sadā bhakta girā sām̐cī karana ॥
dārumayī taravāra sāramaya racī bhuvana kī ।
dēvā hita sita kēsa pratigyā rākhī jana kī ॥
kamadhuja kē kapi cāru citā para kāṣṭha ju lyāē ।
jaimala kē judha māhiṅ aśva caḍha़ai āpuna dhāē ॥
ghṛta sahita bhaiṅsa caugunī śrīdhara sam̐ga sāyaka dharana ।
cāroṅ juga caturbhuja sadā bhaktagirā sām̐cī karana ॥52॥

bhaktana sam̐ga bhagavāna nita jyoṅ gau bacha gohana phiraiṅ ॥
nihikiṅcana ika dāsa tāsu kē harijana āyē ।
bidita baṭohī rūpa bhayē hari āpa luṭāyē ॥
sākhi dēna ko syāma khuradahā prabhuhi padhārē ।
rāmadāsa kē sadana rāya ranachora sidhārē ॥
āyudha chata tana anuga kē bali baṅdhana apabapu dharaiṅ ।
bhaktana sam̐ga bhagavāna nita jyoṅ gau bacha gohana phiraiṅ ॥53॥

bacchaharana pāchēṅ bidita suno saṅta acaraja bhayo ॥
jasū svāmi kē vṛṣabha cori brajabāsī lyāyē ।
taisēī diē syāma baraṣa dina khēta jutāyē ॥
nāmā jyoṅ nam̐dadāsa muī ika bacchi jivāī ।
aṅba alha ko nayē prasidha jaga gāthā gāī ॥
bāramukhī kē mukuṭa ko raṅganātha ko sira nayo ।
bacchaharana pāchēṅ bidita suno saṅta acaraja bhayo ॥54॥

aura jugana tē kamalanayana kalijuga bahuta kṛpā karī ॥
bīca diē raghunātha bhakta sam̐ga ṭhagiyā lāgē ।
nirjana bana mēṅ jāya duṣṭa krama kiyē abhāgē ॥
bīca diyo so kahām̐ rāma kahi nāri pukārī ।
āē sāram̐gapāni sokasāgara tē tārī ॥
duṣṭa kiyē nirjīva saba dāsaprāna saṅjñā dharī ।
aura jugana tē kamalanayana kalijuga bahuta kṛpā karī ॥55॥

ēka bhūpa bhāgavata kī kathā sunata hari hoya rati ॥
tilaka dāma dhari koi tāhi guru gobim̐da jānai ।
ṣaṭadarśanī abhāva sarvathā ghaṭi kari mānai ॥
bhām̐ḍa bhakta ko bhēṣa hām̐si hita bham̐ḍakuṭa lyāyē ।
narapati kē dṛḍha़i nēma tāhi yē pām̐va dhuvāyē ॥
bhām̐ḍa bhēṣa gāḍha़o gahyo darasa parasa upajī bhagati ।
ēka bhūpa bhāgavata kī kathā sunata hari hoya rati ॥56॥

aṅtaraniṣṭha nṛpāla ika parama dharama nāhina dhujī ॥
hari sumirana hari dhyāna āna kāhū na janāvai ।
alaga na ihi bidhi rahai aṅganā marama na pāvai ॥
nidrābasa so bhūpa badana tēṅ nāma ucāryo ।
rānī pati pai rījhi bahuta basu tāpara vāryo ॥
ṛṣirāja soci kahyo nāri soṅ āju bhagati morī kujī ।
aṅtaraniṣṭha nṛpāla ika parama dharama nāhina dhujī ॥57॥

guru gadita bacana siṣa satya ati dṛḍha़i pratīti gāḍha़o gahyo ॥
anucara āgyā mām̐gi kahyo kāraja ko jaihoṅ ।
ācāraja ika bāta tohiṅ āē tē kahihauṅ ॥
svāmī rahyo samāya dāsa darasana ko āyo ।
guru girā māna bisvāsa phēri saba ghara ko lyāyo ॥
siṣapana sām̐co karana hita bibhu sabai sunata soī kahyo ।
guru gadita bacana siṣa satya ati dṛḍha़i pratīti gāḍha़o gahyo ॥58॥

saṅdēha graṅthi khaṅḍana nipuna bāni bimala raidāsa kī ॥
sadācāra śruti sāstra bacana aviruddha ucāryo ।
nīra kṣīra bibarana paramahaṅsani ura dhāryo ॥
bhagavata kṛpā prasāda parama gati ihi tana pāī ।
rājasiṅhāsana baiṭhi gyāti paratīti dikhāī ॥
baranāśrama abhimāna taji pada raja baṅdahiṅ jāsa kī ।
saṅdēha graṅthi khaṅḍana nipuna bāni bimala raidāsa kī ॥59॥

kabīra kāni rākhī nahīṅ baranāśrama ṣaṭadarasanī ॥
bhakti bimukha jo dharma soi adharama kari gāyo ।
joga jagya brata dāna bhajana bina tuccha dikhāyo ॥
hindū turuka pramāna ramainī sabadī sākhī ।
pacchapāta nahiṅ bacana sabana kē hita kī bhākhī ॥
ārūḍha़ dasā hvai jagata para mukhadēkhī nāhiṅna bhanī ।
kabīra kāni rākhī nahīṅ baranāśrama ṣaṭadarasanī ॥60॥

pīpā pratāpa jaga bāsanā nāhara ko upadēsa diyo ॥
prathama bhavānī bhagata mukti mām̐gana ko dhāyo ।
satya kahyo tihiṅ sakti sudṛḍha़i hari sarana batāyo ॥
(śrī)rāmānanda pada pāi bhayo ati bhakti kī sīvām̐ ।
guna asaṅkhya nirmola saṅta rākhata dhari grīvām̐ ॥
parasa pranālī sarasa bhai sakala bisva maṅgala kiyo ।
pīpā pratāpa jaga bāsanā nāhara ko upadēsa diyo ॥61॥

dhanya dhanā kē bhajana ko binahi bīja aṅkura bhayo ॥
ghara āyē haridāsa tinahiṅ godhūma khavāē ।
tāta māta ḍara khēta thotha lāṅgalahiṅ calāē ॥
āsa pāsa kṛṣikāra khēta kī karata baḍa़āī ।
bhakta bhajē kī rīti pragaṭa paratīti ju pāī ॥
acaraja mānata jagata mēṅ kahum̐ nipajyo kahum̐ vai bayo ।
dhanya dhanā kē bhajana ko binahi bīja aṅkura bhayo ॥62॥

bidita bāta jana jāniyē hari bhaē sahāyaka sēna kē ॥
prabhū dāsa kē kāja rūpa nāpita ko kīno ।
chipra churaharī gahī pāni darpana taham̐ līno ॥
tādṛsa hvai tihiṅ kāla bhūpa kē tēla lagāyo ।
ulaṭi rāva bhayo siṣya pragaṭa paraco jaba pāyo ।
syāma rahata sanamukha sadā jyoṅ bacchā hita dhēna kē ।
bidita bāta jaga jāniyē hari bhaē sahāyaka sēna kē ॥63॥

bhakti dāna bhaya harana bhuja sukhānaṅda pārasa parasa ॥
sukhasāgara kī chāpa rāga gaurī ruci nyārī ।
pada racanā guru maṅtra girā āgama anuhārī ॥
nisi dina prēma pravāha dravata bhūdhara jyoṅ nirjhara ।
hari guna kathā agādha bhāla rājata līlā bhara ॥
saṅta kaṅja poṣana bimala ati piyūṣa sarasī sarasa ।
bhakti dāna bhaya harana bhuja sukhānaṅda pārasa parasa ॥64॥

mahimā mahāprasāda kī surasurānaṅda sām̐cī karī ॥
ēka samai adhvā calata vāka chala barā supāyē ।
dēkhā dēkhī siṣya tinahūm̐ pīchē tē khāyē ॥
tina para svāmī khijē bamana kari bina bisvāsī ।
tina taisē pratyaccha bhūmi para kīnī rāsī ॥
surasurī subara puni udagalē puhupa rēnu tulasī harī ।
mahimā mahāprasāda kī surasurānaṅda sām̐cī karī ॥65॥

mahāsatī sata ūpamā tyoṅ sata surasari ko rahyo ॥
ati udāra daṅpatī tyāgi gṛha bana ko gavanē ।
acaraja bhayo taham̐ ēka saṅta suna jina ho bimanē ॥
baiṭhē hutē ēkāṅta āya asurani dukha dīyo ।
sumirē sāram̐gapāni rūpa narahari ko kīyo ॥
surasurānaṅda kī gharani ko sata rākhyo narasiṅha jahyo ।
mahāsatī sata ūpamā tyoṅ sata surasari ko rahyo ॥66॥

nipaṭa narahariyānanda ko kara dātā durgā bhaī ॥
jhara ghara lakarī nāhiṅ sakti ko sadana bidāraiṅ ।
sakti bhakta soṅ boli dinahiṅ prati barahī ḍāraiṅ ॥
lagī parosina hauṅsa bhavānī bhvai so māraiṅ ।
badalē kī bēgāri mūm̐ḍa़ vākē sira ḍāraiṅ ॥
bharata prasam̐ga jyoṅ kālikā laḍū dēkhi tana mēṅ taī ।
nipaṭa narahariyānanda ko kara dātā durgā bhaī ॥67॥

kabīra kṛpā tēṅ paramatattva padmanābha paracai lahyo ॥
nāma mahā nidhi maṅtra nāma hī sēvā pūjā ।
japa tapa tīratha nāma nāma bina aura na dūjā ॥
nāma prīti nāma baira nāma kahi nāmī bolē ।
nāma ajāmila sākhi nāma baṅdhana tēṅ kholē ॥
nāma adhika raghunātha tēṅ rāma nikaṭa hanumata kahyo ।
kabīra kṛpā tēṅ paramatattva padmanābha paracai lahyo ॥68॥

tattvā jīvā dacchina dēsa baṅsoddhara rājata bidita ॥
bhakti sudhā jala samuda bhaē bēlāvali gāḍha़ī ।
pūrabajā jyoṅ rīti prīti utarotara bāḍha़ī ॥
raghukula sadṛsa svabhāva siṣṭa guna sadā dharmarata ।
sūra dhīra ūdāra dayāpara daccha ananibrata ॥
padmakhaṅḍa padmā padhati praphulita kara sabitā udita ।
tattvā jīvā dacchina dēsa baṅsoddhara rājata bidita ॥69॥

binaya byāsa mano pragaṭa hvai jaga ko hita mādhava kiyo ॥
pahilē bēda bibhāga kathita pūrāna aṣṭadasa ।
bhāratādi bhāgavata mathita uddhāryo harijasa ॥
aba sodhē saba graṅtha artha bhāṣā bistāryo ।
līlā jaya jaya jayati gāya bhavapāra utāryo ॥
jagannātha iṣṭa vairāgya sīṅva karunārasa bhījyo hiyo ।
binaya byāsa mano pragaṭa hvai jaga ko hita mādhava kiyo ॥70॥

raghunātha gusāīṅ garuḍa jyoṅ siṅhapauri ṭhāḍha़ē rahaiṅ ॥
sīta lagata sakalāta bidita puruṣottama dīnī ।
sauca gaē hari saṅga kṛtya sēvaka kī kīnī ॥
jagannātha pada prīti niraṅtara karata khavāsī ।
bhagavata dharma pradhāna prasana nīlācala vāsī ॥
utkala dēsa uḍa़īsā nagara bainatēya saba kou kahai ।
raghunātha gusāīṅ garuḍa़ jyoṅ siṅhapauri ṭhāḍha़ē rahaiṅ ॥71॥

nityānanda kṛṣṇa­caitanya kī bhakti dasoṅ disi bistarī ॥
gauḍadēsa pākhaṅḍa mēṭi kiyo bhajana parāyana ।
karunāsiṅdhu kṛtagya bhayē agatina gati dāyana ॥
dasadhā rasa ākrāṅta mahata jana carana upāsē ।
nāma lēta niṣpāpa durita tihi nara kē nāsē ॥
avatāra bidita pūraba mahī ubhaya mahata dēhī dharī ।
nityānanda kṛṣṇa­caitanya kī bhakti dasoṅ disi bistarī ॥72॥

sūra kabita suni kauna kabi jo nahiṅ siracālana karaiṅ ॥
ukti coja anuprāsa barana asthiti ati bhārī ।
bacana prīti nirbāha artha adbhuta tuka dhārī ॥
pratibiṅbita divi dṛṣṭi hṛdaya harilīlā bhāsī ।
janama karama guna rūpa sabai rasanā parakāsī ॥
bimala buddhi guna aura kī jo yaha guna śravanani dharaiṅ ।
sūra kabita suni kauna kabi jo nahiṅ siracālana karaiṅ ॥73॥

brajabadhū rīti kalijuga biṣē paramānam̐da bhayo prēma kēta ॥
paugaṅḍa bāla kaisora gopalīlā saba gāī ।
acaraja kaha yaha bāta hutau pahilē ju sakhāī ॥
nayanana nīra pravāha rahata romāṅca raina dina ।
gadagada girā udāra syāma sobhā bhījyo tana ॥
sāraṅga chāpa tākī bhaī śravana sunata ābēsa dēta ।
brajabadhū rīti kalijuga biṣē paramānam̐da bhayo prēma kēta ॥74॥

kēsavabhaṭa nara mukuṭamani jinakī prabhutā bistarī ॥
kāsamīra kī chāpa pāpa tāpana jaga maṅḍana ।
dṛḍha़i haribhagati kuṭhāra āna dharma biṭapa bihaṅḍana ॥
mathurā madhya malēccha bāda kari barabaṭa jītē ।
kājī ajita anēka dēkhi paracai bhayabhītē ॥
bidita bāta saṅsāra saba saṅta sākhi nāhiṅna durī ।
kēsavabhaṭa nara mukuṭamani jinakī prabhutā bistarī ॥75॥

śrībhaṭṭa subhaṭa pragaṭē aghaṭa rasa rasikana manamoda ghana ॥
madhurabhāva saṅbalita lalita līlā subalita chabi ।
nirakhata haraṣata hṛdaya prēma baraṣata sukalita kabi ॥
bhava nistārana hētu dēta dṛḍha़i bhakti sabani nita ।
jāsu sujasa sasi udaya harata ati tama bhrama śrama cita ॥
ānaṅdakaṅda śrīnaṅdasuta śrīvṛṣabhānusutā bhajana ।
śrībhaṭṭa subhaṭa pragaṭē aghaṭa rasa rasikana manamoda ghana ॥76॥

haribyāsa tēja haribhajana bala dēvī ko dīcchā daī ॥
khēcari nara kī siṣya nipaṭa acaraja yaha āvai ।
bidita bāta saṅsāra saṅta mukha kīrati gāvai ॥
bairāgina kē bṛṅda rahata sam̐ga syāma sanēhī ।
nava yogēśvara madhya manahum̐ sobhita baidēhī ॥
śrībhaṭṭa carana raja parasa tēṅ sakala sṛṣṭi jāko naī ।
haribyāsa tēja haribhajana bala dēvī ko dīcchā daī ॥77॥

ajñānadhvāṅta aṅtaḥkarana dutiya divākara avataryo ॥
upadēsē nṛpa siṅha rahata nita ājñākārī ।
pakva bṛccha jyoṅ nāya saṅta poṣaka upakārī ॥
bānī bholārāma suhṛda sabahina para chāyā ।
bhakta caranaraja jām̐ci bisada rāghava guna gāyā ॥
karamacaṅda kaśyapa sadana bahuri āya mano bapu dharyo ।
ajñānadhvāṅta aṅtaḥkarana dutiya divākara avataryo ॥78॥

biṭṭhalanātha brajarāja jyoṅ lāḍa़ laḍa़āya kai sukha liyo ॥
rāga bhoga nita bibidha rahata paricaryā tatpara ।
sayyā bhūṣana basana racita racanā apanē kara ॥
vaha gokula vaha naṅdasadana dīcchita ko sohai ।
pragaṭa bibhava jaham̐ ghoṣa dēkhi surapati mana mohai ॥
ballabhasuta bala bhajana kē kalijuga mēṅ dvāpara kiyo ।
biṭṭhalanātha brajarāja jyoṅ lāḍa़ laḍa़āya kai sukha liyo ॥79॥

(śrī)biṭṭhalēsasuta suhṛda śrīgobardhanadhara dhyāiyē ॥
śrīgiridharajū sarasa sīla gobiṅdaju sāthahiṅ ।
bālakṛṣṇa jasa bīra dhīra śrīgokulanāthahiṅ ॥
śrīraghunāthaju mahārāja śrījadunāthahiṅ bhaji ।
śrīghanaśyāmaju pagē prabhū anurāgī sudhi saji ॥
ē sāta pragaṭa bibhu bhajana jaga tārana tasa jasa gāiyē ।
(śrī)biṭṭhalēsasuta suhṛda śrīgobardhanadhara dhyāiyē ॥80॥

giridharana rījhi kṛṣṇadāsa ko nāma mām̐jha sājho diyo ॥
śrīballabha gurudatta bhajanasāgara guna āgara ।
kabita nokha nirdoṣa nāthasēvā mēṅ nāgara ॥
bānī baṅdita biduṣa sujasa gopāla alaṅkṛta ।
brajaraja ati ārādhya vahai dhārī sarbasu cita ॥
sānnidhya sadā haridāsabara gauraśyāma dṛḍha़i brata liyo ।
giridharana rījhi kṛṣṇadāsa ko nāma mām̐jha sājho diyo ॥81॥

bardhamāna gaṅgala gam̐bhīra ubhaya thaṅbha haribhakti kē ॥
śrībhāgavata bakhāni amṛtamaya nadī bahāī ।
amala karī saba avani tāpahāraka sukhadāī ॥
bhaktana soṅ anurāga dīna soṅ parama dayākara ।
bhajana jasodānaṅda saṅta saṅghaṭa kē āgara ॥
bhīṣama bhaṭa aṅgaja udāra kaliyuga dātā sugati kē ।
bardhamāna gaṅgala gam̐bhīra ubhaya thaṅbha haribhakti kē ॥82॥

rāmadāsa paratāpa tēṅ khēma gusāīṅ khēmakara ॥
raghunaṅdana ko dāsa pragaṭa bhūmaṅḍala jānai ।
sarbasa sītārāma aura kachu ura nahiṅ ānai ॥
dhanuṣa bāna soṅ prīti svāmi kē āyudha pyārē ।
nikaṭa niraṅtara rahata hota kabahūm̐ nahiṅ nyārē ॥
śūravīra hanumata sadṛsa parama upāsaka prēmabhara ।
rāmadāsa paratāpa tēṅ khēma gusāīṅ khēmakara ॥83॥

biṭṭhaladāsa māthura mukuṭa bhayē amānī mānadā ॥
tilaka dāma soṅ prīti gunahiṅ guna aṅtara dhāryo ।
bhaktana ko utkarṣa janama bhari rasana ucāryo ॥
sarala hṛdaya saṅtoṣa jahām̐ taham̐ para upakārī ।
utsava mēṅ suta dāna kiyo krama duṣkara bhārī ॥
hari gobim̐da jaya jaya gubim̐da girā sadā ānaṅdadā ।
biṭṭhaladāsa māthura mukuṭa bhayē amānī mānadā ॥84॥

harirāma haṭhīlē bhajana bala rānā ko uttara diyo ॥
ugra tēja ūdāra sughara sutharāī sīṅvām̐ ।
prēmapuṅja rasarāsi mahā gadagada svara grīvām̐ ॥
bhaktana ko aparādha karai tāko phala gāyo ।
hiranakasipu prahlāda parama dṛṣṭāṅta dikhāyo ॥
sasphuṭa vaktā jagata mēṅ rājasabhā nidharaka hiyo ।
harirāma haṭhīlē bhajana bala rānā ko uttara diyo ॥85॥

kamalākara bhaṭa jagata mēṅ tattvabāda ropī dhujā ॥
paṅḍita kalā prabīna adhika ādara dēṅ āraja ।
saṅpradāya sira chatra dvitiya manoṅ madhvācāraja ॥
jētika hari avatāra sabai pūrana kari jānai ।
paripāṭī dhvaja bijai sadṛsa bhāgavata bakhānai ॥
śruti smṛtī saṅmata purāna taptamudrādhārī bhujā ।
kamalākara bhaṭa jagata mēṅ tattvabāda ropī dhujā ॥86॥

brajabhūmi upāsaka bhaṭṭa so raci paci hari ēkai kiyo ॥
gopya sthala mathurāmaṅḍala jitē bārāha bakhānē ।
tē kiyē nārāyana pragaṭa prasidha pṛthvī mēṅ jānē ॥
bhaktisudhā ko siṅdhu sadā satsaṅga sabhājana parama rasagya ananya kṛṣṇalīlā ko bhājana ॥
gyāna samārata paccha ko nāhina kou khaṇḍana biyo ।
brajabhūmi upāsaka bhaṭṭa so raci paci hari ēkai kiyo ॥87॥

brajaballabha ballabha parama durlabha sukha nayanana diyē ॥
nṛtya gāna guna nipuna rāsa mēṅ rasa baraṣāvata ।
aba līlā lalitādi balita daṅpatihi rijhāvata ॥
ati udāra nistāra sujasa brajamaṅḍala rājata ।
mahā mahotsava karata bahuta sabahī sukha sājata ॥
śrīnārāyanabhaṭṭa prabhu parama prīti rasa basa kiyē ।
brajaballabha ballabha parama durlabha sukha nayanana diyē ॥88॥

saṅsāra svāda sukha bāṅta jyoṅ duhum̐ rūpa sanātana taji diyo ॥
gauḍa़dēsa baṅgāla hutē sabahī adhikārī ।
haya gaya bhavana bham̐ḍāra bibhava bhūbhuja anuhārī ॥ ।
yaha sukha anita bicāri bāsa bṛṅdāvana kīno ।
yathālābha saṅtoṣa kuṅja karavā mana dīno ॥
brajabhūmi rahasya rādhākṛṣṇa bhakta toṣa uddhāra kiyo ।
saṅsāra svāda sukha bāṅta jyoṅ duhum̐ rūpa sanātana taji diyo ॥89॥

haribaṅsagusāīṅ bhajana kī rīti sukṛta kou jānihai ॥
rādhācarana pradhāna hṛdaya ati sudṛḍha़i upāsī ।
kuṅja kēli daṅpatī tahām̐ kī karata khavāsī ॥
sarbasa mahāprasāda prasidha tākē adhikārī ।
bidhi niṣēdha nahiṅ dāsa anani utkaṭa bratadhārī ॥
byāsasuvana patha anusarē soī bhalē pahicānihai ।
haribaṅsagusāīṅ bhajana kī rīti sukṛta kou jānihai ॥90॥

āsudhīra udyota kara rasika chāpa haridāsakī ॥
jugala nāma soṅ nēma japata nita kuṅjabihārī ।
avalokata rahēṅ kēli sakhī sukha kē adhikārī ॥
gāna kalā gaṅdharba syāma syāmā ko toṣaiṅ ।
uttama bhoga lagāya mora markaṭa timi poṣaiṅ ॥
nṛpati dvāra ṭhāḍha़ē rahēṅ darasana āsā jāsa kī ।
āsudhīra udyota kara rasika chāpa haridāsa kī ॥91॥

utkarṣa tilaka aru dāma ko bhakta iṣṭa ati byāsa kē ॥
kāhū kē ārādhya maccha kacha sūkara narahari ।
bāmana pharasādharana sētubaṅdhana ju sailakarī ॥
ēkana kē yaha rīti nēma navadhā soṅ lāyē ।
sukula sumokhana suvana acyuta gotrī ju laḍa़āyē ॥
nauguna tori nupura guhyo maham̐ta sabhā madhi rāsa kē ।
utkarṣa tilaka aru dāma ko bhakta iṣṭa ati byāsa kē ॥92॥

(śrī)rūpasanātana bhaktijala śrījīva gusāīṅ sara gam̐bhīra ॥
bēlā bhajana supakva kaṣāya na kabahūm̐ lāgī ।
bṛṅdābana dṛḍha़i bāsa jugala caranani anurāgī ॥
pothī lēkhana pāna aghaṭa acchara cita dīno ।
sadgranthana ko sāra sabai hastāmala kīno ॥
saṅdēha granthi chēdana samartha rasa rāsa upāsaka parama dhīra ।
(śrī)rūpasanātana bhaktijala śrījīva gusāīṅ sara gam̐bhīra ॥93॥

bṛṅdāvanakī mādhurī ina mili āsvādana kiyo ॥
sarbasa rādhāramana bhaṭṭa gopāla ujāgara ।
hṛṣīkēsa bhagavāna bipula biṭṭhala rasasāgara ॥
thānēśvarī jaga(nnātha) lokanātha mahāmuni madhu śrīraṅga ।
kṛṣṇadāsa paṅḍita ubhaya adhikārī hari aṅga ॥
ghamaṅḍī jugalakisora bhṛtya bhūgarbha jīva dṛḍha़ivrata liyo ।
bṛṅdāvanakī mādhurī ina mili āsvādana kiyo ॥94॥

rasikamurāri udāra ati matta gajahiṅ upadēsu diyau ॥
tana mana dhana parivāra sahita sēvata saṅtana kaham̐ ।
dibya bhoga āratī adhika harihū tē hiya maham̐ ॥
śrīvṛndābanacaṅdra śyāma śyāmā ram̐ga bhīno ।
magna prēmapīyūṣa payadhi paracai bahu dīno ॥
haripriya śyāmānaṅdavara bhajana bhūmi uddhāra kiyau ॥
rasikamurāri udāra ati matta gajahiṅ upadēsu diyau ॥95॥

bhavaprabāha nisatāra hita avalaṅbana yē jana bhaē ॥
sojhā sīvam̐ adhāra dhīra harinābha trilocana ।
āsādhara dyaurāja nīra sadhanā dukhamocana ॥
kāsīśvara avadhūta kṛṣṇa kiṅkara kaṭahariyā ।
sobhū udārāma nāmaḍuṅgara vrata dhariyā ॥
padama padāratha rāmadāsa bimalānam̐da amṛta sraē ।
bhavaprabāha nistāra hita avalaṅbana yē jana bhaē ॥96॥

karunā chāyā bhaktiphala ē kalijuga pādapa racē ॥
jatī rāmarāvala śyāma khojī sam̐ta sīhā ।
dalhā padama manoratha rākā bām̐kā dyaugū japa jīhā ॥
jāḍa़ā cācā gurū savāī cām̐dā nāpā ।
puruṣottama soṅ sām̐ca catura kītā mana (ko jēhi) mēṭyo āpā ॥
matisuṅdara dhīṅ dhāṅ śrama saṅsāranāca nāhina nacē ।
karunā chāyā bhaktiphala ē kalijuga pādapa racē ॥97॥

para artha parāyana bhakta yē kāmadhēnu kalijugga kē ॥
lakṣmana lapharā laḍū saṅta jodhāpura tyāgī ।
sūraja kuṅbhanadāsa bimānī khēma birāgī ॥
bhāvana birahī bharata naphara harikēsa laṭērā ।
haridāsa ayodhyā cakrapāṇī sarayūtaṭa ḍērā ॥
tiloka pukharadī bījurī uddhava vanacara baṅsa kē ।
para artha parāyana bhakta yē kāmadhēnu kalijugga kē ॥98॥

abhilāṣa adhika pūrana karana yē ciṅtāmaṇi caturadāsa ॥
soma bhīma somanātha biko bisākhā lamadhyānā ।
mahadā mukuṅda ganēsa tribikrama raghu jaga jānā ॥
bālmīka bṛdhabyāsa jagana jhām̐jhū biṭṭhala ācāraja ।
haribhū lālā haridāsa bāhubala rāghava āraja ॥
lākhā chītara uddhava kapūra ghāṭama ghūrī kiyo prakāsa ।
abhilāṣa adhika pūrana karana yē ciṅtāmaṇi caturadāsa ॥99॥

bhaktapāla diggaja bhagata ē thānāita śūra dhīra ॥
dēvānaṅda narahariyānaṅda mukuṅda mahīpati saṅtarāma tammorī ।
khēma śrīraṅga naṅda viṣṇu bīdā bājū suta jorī ॥
chītama dvārikādāsa mādhava māṅḍana rūpā dāmodara ।
bhakta narahari bhagavāna bāla kānhara kēsava sohaiṅ ghara ॥
dāsa prayāga loham̐ga gupāla nāgū suta gṛha bhakta bhīra ।
bhaktapāla diggaja bhagata ē thānāita śūra dhīra ॥100॥

badarīnātha uḍa़īsē dvārikā sēvaka saba haribhajana para ॥
kēsava puni harinātha bhīma khētā gobim̐da brahmacārī ।
bālakṛṣṇa baḍa़bharata acyuta apayā bratadhārī ॥
paṅḍā gopīnātha mukum̐da gajapatī mahājasa ।
gunanidhi jasagopāla diyo bhaktana ko sarabasa ॥
śrīaṅga sadā sānidhi rahaiṅ kṛta punyapuṅja bhala bhāga bhara ।
badarīnātha uḍa़īsē dvārikā sēvaka saba haribhajana para ॥101॥

hari sujasa pracura kara jagatamēṅ yē kabijana atisaya udāra ॥
bidyāpati brahmadāsa bahorana catura bihārī ।
gobinda gaṅgārāma lāla barasaniyām̐ maṅgalakārī ॥
priyadayāla parasarāma bhakta bhāī khāṭīko ।
naṅdasuvana kī chāpa kabitta kēsava ko nīko ॥
āsakarana pūrana nṛpati bhīṣama janadayāla guna nāhina pāra ।
hari sujasa pracura kara jagatamēṅ yē kabijana atisaya udāra ॥102॥

jē basē basata mathurā maṅḍala tē dayā dṛṣṭi mopara karo ॥
raghunātha gopīnātha rāmabhadra dāsū svāmī ।
guṅjāmālī cita uttama biṭṭhala marahaṭha niṣkāmī ॥
yadunaṅdana raghunātha rāmānanda goviṅda muralī sotī ।
haridāsa miśra bhagavāna mukunda kēsava daṅḍautī ॥
caturbhuja caritra viṣṇudāsa bēnī pada mo sira dharo ।
jē basē basata mathurā maṅḍala tē dayā dṛṣṭi mopara karo ॥103॥

kalijuga juvatījana bhaktarāja mahimā saba jānai jagata ॥
sītā jhālī sumati sobhā prabhutā umā bhaṭiyānī ।
gaṅgā gaurī kum̐vari ubīṭhā gopālī ganēsudē rānī ॥
kalā lakhā kṛtagaḍha़au mānamati suci satabhāmā ।
yamunā kolī rāmā mṛgā dēvādē bhaktana biśrāmā ।
juga jīvā kīkī kamalā dēvakī hīrā haricērī poṣai bhagata ।
kalijuga juvatījana bhaktarāja mahimā saba jānai jagata ॥104॥

hari kē saṅmata jē bhagata tina dāsana kē dāsa ॥
narabāhana bāhana barīsa jāpū jaimala bīdāvata ।
jayaṅta dhārā rūpā anubhaī udā rāvata ॥
gaṅbhīrē arjuna janārdana gobim̐da jītā ।
dāmodara sām̐pilē gadā īśvara hēma binītā ॥
mayānaṅda mahimā anaṅta guḍha़īlē tulasīdāsa ।
hari kē saṅmata jē bhagata tina dāsana kē dāsa ॥105॥

śrīmukha pūjā saṅta kī āpuna tēṅ adhikī kahī ॥
yahai bacana paramāna dāsa gām̐varī jaṭiyānē bhāū ।
būm̐dī baniyārāma mam̐ḍautē mohanabārī dāū ॥
māḍauṭhī jagadīsadāsa lachimana caṭuthāvala bhārī ।
sunapatha mēṅ bhagavāna sabai salakhāna gupāla udhārī ॥
jobanēra gopāla kē bhakta iṣṭatā nirabahī ।
śrīmukha pūjā saṅta kī āpuna tēṅ adhikī kahī ॥106॥

paramahaṅsa baṅsani mēṅ bhayo bibhāgī bānaro ॥
muradhara khaṅḍa nivāsa bhūpa saba ājñākārī ।
rāma nāma biśvāsa bhaktapadarajabratadhārī ॥
jagannātha kē dvāra daṅḍotani prabhu pai dhāyo ।
daī dāsa kī dādi hum̐ḍī kari phēri paṭhāyo ॥
suradhunī ogha saṅsarga tēṅ nāma badala kucchita naro ।
paramahaṅsa baṅsani mēṅ bhayo bibhāgī bānaro ॥107॥

jagata bidita narasī bhagata (jina) gujjara dhara pāvana karī ॥
mahā samārata loga bhakti laulēśa na jānēṅ ।
mālā mudrā dēkhi tāsu kī niṅdā ṭhānēṅ ॥
aisē kula utpanna bhayo bhāgavata śiromani ।
ūsara tēṅ sara kiyo khaṅḍa doṣahi khoyo jini ॥
bahuta ṭhaura paraco diyo rasarīti bhagati hiradai dharī ।
jagata bidita narasī bhagata (jina) gujjara dhara pāvana karī ॥108॥

divadāsabaṅsa yaśodhara sadana bhaī bhakti anapāyinī ॥
suta kalatra saṅmata sabai gobiṅda parāyana ।
sēvata hari haridāsa dravata mukha rāma rasāyana ॥
sītāpati ko sujasa prathama hī gamana bakhānyo ।
dvai suta dījai mohi kabitta saba hī jaga jānyo ॥
girāgadita līlā madhura saṅtani ānam̐dadāyinī ।
divadāsa baṅsa yaśodhara sadana bhaī bhakti anapāyinī ॥109॥

naṅdadāsa ānaṅdanidhi rasika su prabhu hita ram̐gamagē ॥
līlā pada rasa rīti graṅtha racanā mēṅ nāgara ।
sarasa ukti juta jukti bhakti rasa gāna ujāgara ॥
pracura payodhi lauṅ sujasa rāmapura grāma nivāsī ।
sakala sukula saṅbalita bhaktapadarēṇu upāsī ॥
caṅdrahāsa agraja suhṛda parama prēma paya mēṅ pagē ।
naṅdadāsa ānaṅdanidhi rasika su prabhu hita ram̐gamagē ॥110॥

saṅsāra sakala byāpaka bhaī jakarī janagopāla kī ॥
bhakti tēja ati bhāla saṅta maṅḍala ko maṅḍana ।
budhi pravēśa bhāgavata graṅtha saṅsaya ko khaṅḍana ॥
narahaḍa़ grāma nivāsa dēśa bāgaḍa़ nistāryo ।
navadhā bhajana prabodha anani dāsana brata dhāryo ॥
bhakta kṛpā bāṅchī sadā padaraja rādhālāla kī ।
saṅsāra sakala byāpaka bhaī jakarī janagopāla kī ॥111॥

mādhava dṛḍha़i mahi ūparai pracura karī loṭā bhagati ॥
prasidha prēma kī bāta gaḍha़āgaḍha़ paracai dīyo ।
ūm̐cē tēṅ bhayo pāta śyāma sām̐cau pana kīyo ॥
suta nātī puni sadṛśa calata ūhī paripāṭī ।
bhaktana soṅ ati prēma nēma nahiṅ kihum̐ am̐ga ghāṭī ॥
nṛtya karata nahiṅ tana sam̐bhāra samasara janakana kī sakati ।
mādhava dṛḍha़i mahi ūparai pracura karī loṭā bhagati ॥112॥

abhilāṣa bhakta aṅgada ko puruṣottama pūrana karyo ॥
naga amola ika tāhi sabai bhūpati mili jācaiṅ ।
sāma dāma bahu karaiṅ dāsa nāhiṅna mata kācaiṅ ॥
ēka samai saṅkaṭa lai vaha pānī mahiṅ ḍāryo ।
prabhū tihārī bastu badana tēṅ bacana ucāryo ॥
pām̐ca doya sata kosa tēṅ hari hīrā lai ura dharyo ।
abhilāṣa bhakta aṅgada ko puruṣottama pūrana karyo ॥113॥

caturbhuja nṛpati kī bhakti ko kauna bhūpa saravara karaiṅ ॥
bhakta āgamana sunata sanmukha jojana ēka jāī ।
sadana āni satakāra sadṛśa goviṅda baḍa़āī ॥
pāda prachālana suhatha rāya rānī mana sām̐cē ।
dhūpa dīpa naivēdya bahuri tina āgē nācē ॥
yaha rīti karaulīdhīśa kī tana mana dhana āgē dharaiṅ ।
caturbhuja nṛpati kī bhakti ko kauna bhūpa saravara karaiṅ ॥114॥

lokalāja kulaśa‍ṛṅkhalā taji mīrām̐ giridhara bhajī ॥
sadṛśa gopikā prēma pragaṭa kalijugahiṅ dikhāyo ।
nirāṅkuśa ati niḍara rasika jasa rasanā gāyo ॥
duṣṭana doṣa vicāra mṛtyu ko udyama kīyo ।
bāra na bām̐ko bhayo garala amṛta jyoṅ pīyo ॥
bhakti niśāna bajāya kai kāhū tē nāhina lajī ।
lokalāja kulaśa‍ṛṅkhalā taji mīrām̐ giridhara bhajī ॥115॥

āmēra achata kūrama ko dvārakānātha darśana diyo ॥
kṛṣṇadāsa upadēśa parama tattva paricai pāyo ।
nirguṇa saguṇa nirūpi timira agyāna naśāyo ॥
kācha bāca nikalaṅka mano gāṅgēya yudhiṣṭhira ।
haripūjā prahlāda dharmadhvajadhārī jaga para ॥
pṛthīrāja paraco pragaṭa tana śaṅkha cakra maṅḍita kiyo ।
āmēra achata kūrama ko dvārakānātha darśana diyo ॥116॥

bhaktana ko ādara adhika rājabaṅsa mēṅ ina kiyo ॥
laghu mathurā mēḍa़tā bhakta ati jaimala poṣē ।
ṭoḍa़ē bhajana nidhāna rāmacam̐da harijana toṣai ॥
abhayarāma ēka rasahiṅ nēma nīvām̐ kē bhārī ।
karamasīla suratāna bīrama bhūpati bratadhārī ॥
īśvara akhairāja rāyamala kanhara madhukara nṛpa sarvasu diyo ।
bhaktana ko ādara adhika rājabaṅsa mēṅ ina kiyo ॥117॥

khēmāla ratana rāṭhaura kē aṭala bhakti āī sadana ॥
rainā para guna rāma bhajana bhāgavata ujāgara ।
prēmī prēma kiśora udara rājā ratanākara ॥
haridāsana kē dāsa dasā ūm̐cī dhujadhārī ।
nirbhaya anani udāra rasika jasa rasanā bhārī ॥
daśadhā saṅpati saṅta bala sadā rahata praphulita badana ।
khēmāla ratana rāṭhaura kē aṭala bhakti āī sadana ॥118॥

kalijuga bhakti kararī kamāna rāmaraina kaiṅ riju karī ॥
ajara dharma ācaryo lokahita mano nīlakam̐ṭha ।
niṅdaka jaga anirāya kahā (mahimā) jānaigo bhūsaṭha ॥
bidita gam̐dharbī byāha kiyo duṣyaṅta pramānai ।
bharata putra bhāgavata svamukha sukadēva bakhānai ॥
aura bhūpa kou chvai sakai dṛṣṭi jāya nāhiṅna dharī ।
kalijuga bhakti kararī kamāna rāmaraina kaiṅ riju karī ॥119॥

hari guru haridāsana soṅ rāmagharani sām̐cī rahī ॥
āraja ko upadēśa suto ura nīkē dhāryo ।
navadhā daśadhā prīti āna dharma sabai bisāryo ॥
acyuta kula anurāga pragaṭa puruṣāratha jānyo ।
sārāsāra bibēka bāta tīno mana mānyo ॥
dāsatva anani udāratā saṅtana mukha rājā kahī ।
hari guru haridāsana soṅ rāmagharani sām̐cī rahī ॥120॥

abhilāṣa ubhai khēmāla kā tē kisora pūrā kiyā ॥
pām̐yani nūpura bām̐dhi nṛtya nagadhara hita nācyo ।
rāmakalasa mana ralī sīsa tātē nahiṅ bām̐cyo ॥
bānī bimala udāra bhakti mahimā bistārī ।
prēmapuṅja suṭhi sīla binaya saṅtana rucikārī ॥
sṛṣṭi sarāhai rāmasuvana laghu baisa lachana āraja liyā ।
abhilāṣa ubhai khēmāla kā tē kisora pūrā kiyā ॥121॥

khēmāla ratana rāṭhauḍa़ kē suphala bēli mīṭhī phalī ॥
harīdāsa haribhakta bhakti maṅdira ko kalaso ।
bhajanabhāva paripakva hṛdaya bhāgīrathi jala so ॥
tridhā bhām̐ti ati anani rāma kī rīti nibāhī ।
hari guru hari bala bhām̐ti tinahiṅ sēvā dṛḍha़i sāhī ॥
pūrana iṅdu pramudita udadhi tyoṅ dāsa dēkhi bāḍha़ē ralī ।
khēmāla ratana rāṭhauḍa़ kē suphala bēli mīṭhī phalī ॥122॥

haribaṅsacaraṇa bala caturbhuja gauḍadēśa tīratha kiyo ॥
gāyo bhakti pratāpa sabahi dāsatva dṛḍha़iāyo ।
rādhāvallabha bhajana ananitā varaga baḍha़āyo ॥
muralīdhara kī chāpa kabita ati hī nirdūṣaṇa ।
bhaktana kī am̐ghrirēṇu vahai dhārī sirabhūṣaṇa ॥
satasaṅga mahā ānanda mēṅ prēma rahata bhījyo hiyo ।
haribaṅsacaraṇa bala caturbhuja gauḍadēśa tīratha kiyo ॥123॥

cālaka kī caracarī cahūm̐ disi udadhi aṅta loṅ anusarī ॥
sakra kopa suṭhi carita prasidha puni paṅcādhyāī ।
kṛṣna rukminī kēli rucira bhojana bidhi gāī ॥
girirājadharana kī chāpa girā jaladhara jyoṅ gājai ।
saṅta sikhaṅḍī khaṅḍa hṛdaya ānam̐da kē kājai ॥
jāḍa़ā harana jaga jāḍa़tā kṛṣṇadāsa dēhī dharī ।
cālaka kī caracarī cahūm̐ disi udadhi aṅta loṅ anusarī ॥124॥

bimalānanda prabodha baṅsa saṅtadāsa sīvām̐ dharama ॥
gopīnātha padarāga bhoga chappana bhuṅjāē ।
pṛthu padhati anusāra dēva daṅpati dularāē ॥
bhagavata bhakta samāna ṭhaura dvai ko bala gāyo ।
kabita sūra soṅ milata bhēda kachu jāta na pāyo ॥
janma karma līlā jugati rahasi bhakti bhēdī marama ।
bimalānanda prabodha baṅsa saṅtadāsa sīvām̐ dharama ॥125॥

madanamohana sūradāsa kī nāma sṛṅkhalā juri aṭala ॥
gāna kābya guna rāsi suhṛda sahacari avatārī ।
rādhākṛṣṇa upāsya rahasi sukha kē adhikārī ॥
nava rasa mukhya sim̐gāra bibidha bhām̐tina kari gāyo ।
badana ucārata bēra sahasa pām̐yani hvai dhāyo ॥
am̐gīkāra kī avadhi yaha jyoṅ ākhyā bhrātā jamala ।
madanamohana sūradāsa kī nāma sṛṅkhalā juri aṭala ॥126॥

kātyāyani kē prēma kī bāta jāta kāpai kahī ॥
māraga jāta akēla gāna rasanā ju ucārai ।
tāla mṛdaṅgī bṛccha rījhi aṅbara taham̐ ḍārai ॥
gopa nāri anusāri girā gadgada āvēsī ।
jaga prapaṅca tēṅ dūri ajā parasē nahiṅ lēsī ॥
bhagavāna rīti anurāga kī saṅtasākhi mēlī sahī ।
kātyāyani kē prēma kī bāta jāta kāpai kahī ॥127॥

kṛṣṇabiraha kuṅtī sarīra tyoṅ murāri tana tyāgiyo ॥
bidita bilauṅdā gām̐va dēśa muradhara saba jānai ।
mahāmahoccho madhya saṅta pariṣada paravānai ॥
pagani ghūm̐ghurū bām̐dhi rāma ko carita dikhāyo ।
dēsī sāram̐gapāṇi haṅsa tā saṅga paṭhāyo ॥
upamā aura na jagata mēṅ pṛthā vinā nāhiṅna biyo ।
kṛṣṇabiraha kuṅtī sarīra tyoṅ murāri tana tyāgiyo ॥128॥

kali kuṭila jīva nistārahita bālmīki tulasī bhayē ॥
trētā kābya nibaṅdha kiyo sata koṭi ramāyana ।
ika acchara uddharē brahmahatyādi parāyana ॥
aba bhaktana sukha dēna bahuri līlā bistārī ।
rāmacarana rasamatta rahata ahanisi bratadhārī ॥
saṅsāra apāra kē pāra ko sugama rūpa naukā layē ।
kali kuṭila jīva nistārahita bālmīki tulasī bhayē ॥129॥

gopyakēli raghunātha kī mānadāsa paragaṭa karī ॥
karuṇā vīra sim̐gāra ādi ujjvala rasa gāyo ।
para upakāraka dhīra kavita kavijana mana bhāyo ॥
kośalēśa padakamala anani dāsana brata līno ।
jānakijīvana sujasa rahata niśi dina ram̐ga bhīno ॥
rāmāyana nāṭakka kī rahasi ukti bhāṣā dharī ।
gopyakēli raghunātha kī mānadāsa paragaṭa karī ॥130॥

(śrī)ballabhajūkē baṅsa mēṅ surataru giridhara bhrājamāna ॥
artha dharma kāma mokṣa bhakti anapāyani dātā ।
hastāmala śruti jñāna sabahī śāstrana ko jñātā ॥
paricaryā brajarāja kum̐vara kē mana ko karṣē ।
darśana parama punīta sabhā tana amṛtavarṣē ॥
biṭṭhalēśanaṅdana subhāva jaga koū nahiṅ tā samāna ।
(śrī)ballabhajūkē baṅsa mēṅ surataru giridhara bhrājamāna ॥131॥

(śrī)ballabha jū kē baṅsa mēṅ guṇanidhi gokulanātha ati ॥
udadhi sadā acchobha sahaja suṅdara mitabhāṣī ।
guru vara tana girirāja bhalappana saba jaga sākhī ॥
biṭṭhalēśa kī bhakti bhayo bēlā dṛḍha़i tākē ।
bhagavata tēja pratāpa namita narabara pada jākē ॥
nirbyalīka āśaya udāra bhajana puṅja giridharana rati ।
(śrī)ballabha jū kē baṅsa mēṅ guṇanidhi gokulanātha ati ॥132॥

rasika ram̐gīlo bhajana puṅja suṭhi banavārī syāma ko ॥
bāta kabita baḍa़ catura cokha caukasa ati jānē ।
sārāsāra bibēka paramahaṅsani paravānē ॥
sadācāra saṅtoṣa bhūta saba ko hitakārī ।
āraja guna tana amita bhakti dasadhā bratadhārī ॥
darśana punīta āśaya udāra ālāpa rucira sukhadhāma ko ।
rasika ram̐gīlo bhajana puṅja suṭhi banavārī syāma ko ॥133॥

bhāgavata bhalī bidhi kathana ko dhani jananī ēkai janyo ॥
nāma narāyana miśra baṅsa navalā ju ujāgara ।
bhaktana kī ati bhīra bhakti dasadhā ko āgara ॥
āgama nigama purāna sāra sāstrana saba dēkhē ।
suraguru suka sanakādi byāsa nārada ju viśēṣē ॥
sudhā bodha mukha suradhunī jasa bitāna jaga mēṅ tanyo ।
bhāgavata bhalī bidhi kathana ko dhani jananī ēkai janyo ॥134॥

kalikāla kaṭhina jaga jīti yoṅ rāghava kī pūrī parī ॥
kāma krodha mada moha lobha kī lahara na lāgī ।
sūraja jyoṅ jala grahai bahurī tāhī jyoṅ tyāgī ॥
suṅdara sīla svabhāva sadā saṅtana sēvābrata ।
guru dharma nikaṣa nirbahyo viśva mēṅ bidita baḍa़o bhṛta ॥
alharāma rāvala kṛpā ādi aṅta dhukatī dharī ।
kalikāla kaṭhina jaga jīti yoṅ rāghava kī pūrī parī ॥135॥

haridāsa bhalappana bhajana bala bāvana jyoṅ baḍha़yo bāvano ॥
acyutakula soṅ doṣa sapanēhum̐ ura nahiṅ ānai ।
tilaka dāma anurāga sabana gurujana kari mānai ॥
sadana mām̐hi bairāgya bidēhana kī sī bhām̐tī ।
rāmacarana makaraṅda rahata manasā madamātī ॥
jogānaṅda ujāgara baṅsa kari nisidina hariguna gāvano ।
haridāsa bhalappana bhajanabala bāvana jyoṅ baḍha़yo bāvano ॥136॥

jaṅgalī dēśa kē loga saba parasurāma kiē pāraṣada ॥
jyoṅ caṅdana ko pavana niṅba puni caṅdana karaī ।
bahuta kāla tama nibḍa़i udaya dīpaka jimi haraī ॥
śrībhaṭa puni haribyāsa saṅta māraga anusaraī ।
kathā kīratana nēma rasana hariguna uccaraī ॥
gobiṅda bhakti gada roga gati tilaka dāma sadvaidya hada ।
jaṅgalī dēśa kē loga saba parasurāma kiē pāraṣada ॥137॥

gunanikara gadādhara bhaṭṭa ati sabahī ko lāgē sukhada ॥
sajjana suhṛda susīla bacana āraja pratipālaya ।
nirmatsara nihakāma kṛpā karunā ko ālaya ॥
anani bhajana dṛḍha़i karana dharyo bapu bhaktana kājai ।
parama dharama ko sētu bidita bṛṅdāvana gājai ॥
bhāgavata sudhā baraṣai badana kāhū ko nāhiṅna dukhada ।
gunanikara gadādhara bhaṭṭa ati sabahī ko lāgē sukhada ॥138॥

carana sarana cārana bhagata harigāyaka ētā huā ॥
caumukha caurā caṅḍa jagata īśvara guna jānē ।
karmānam̐da au kolha alha acchara paravānē ॥
mādhava mathurā madhya sādhu jīvānam̐da sīṅvā ।
udā narāyanadāsa nāma mām̐ḍana nata grīvā ॥
caurāsī rūpaka catura baranata bānī jūjuvā ।
carana sarana cārana bhagata harigāyaka ētā huā ॥139॥

naradēva ubhaya bhāṣā nipuna pṛthvīrāja kabirāja huva ॥
savaiyā gīta śloka bēli dohā guna navarasa ।
piṅgala kābya pramāna bibidha bidhi gāyo harijasa ॥
paradukha biduṣa śalāghya bacana racanā ju bicārai ।
artha bitta nirmola sabai sāram̐ga ura dhārai ॥
rukminī latā baranana anūpa bāgīśa badana kalyāna suva ।
naradēva ubhaya bhāṣā nipuna pṛthvīrāja kabirāja huva ॥140॥

dvārakā dēkhi pālaṅṭatī acaḍha़ sīṅvai kīdhī aṭala ॥
asura ajīja anīti agini mēṅ haripura kīdho ।
sām̐gana suta nayasāda rāya ranachorai dīdho ॥
dharā dhāma dhana kāja marana bījāhūm̐ mām̐ḍa़āi ।
kamadhuja kuṭako huvau cauka caturabhujanī cām̐ḍa़āi ॥
bāḍha़ēla bāḍha़ kīvī kaṭaka cām̐da nāma cām̐ḍa़āi sabala ।
dvārakā dēkhi pālaṅṭatī acaḍha़ sīṅvai kīdhī aṭala ॥141॥

pṛthvīrāja nṛpa kulabadhū bhakta bhūpa ratanāvatī ॥
kathā kīratana prīti bhīra bhaktana kī bhāvai ।
mahā mahocho mudita nitya nam̐dalāla laḍāvai ॥
mukum̐dacarana ciṅtavana bhakti mahimā dhvaja dhārī ।
pati para lobha na kiyo ṭēka apanī nahiṅ ṭārī ॥
bhalapana sabai biśēṣahī āmēra sadana sunakhā jitī ।
pṛthvīrāja nṛpa kulabadhū bhakta bhūpa ratanāvatī ॥142॥

pārīṣa prasidha kula kām̐thaḍa़yā jagannātha sīvām̐ dharama ॥
rāmānuja kī rīti prīti pana hiradai dhāryo ।
saṅsakāra sama tattva haṅsa jyo buddhi vicāryo ॥
sadācāra muni bṛtti iṅdirā padhati ujāgara ।
rāmadāsa suta saṅta anani dasadhā ko āgara ॥
puruṣottama parasāda tēṅ ubhai aṅga pahiryo barama ।
pārīṣa prasidha kula kām̐thaḍa़yā jagannātha sīvām̐ dharama ॥143॥

kīratana karata kara sapanēhūm̐ mathurādāsa na maṅḍyo ॥
sadācāra saṅtoṣa suhṛda suṭhi sīla subhāsai ।
hastaka dīpaka udaya mēṭi tama bastu prakāsai ॥
hari ko hiya biśvāsa naṅdanaṅdana bala bhārī ।
kṛṣṇakalasa soṅ nēma jagata jānē sira dhārī ॥
bardhamāna gurubacana rati so saṅgraha nahiṅ chaṅḍyo ।
kīratana karata kara sapanēhūm̐ mathurādāsa na maṅḍyo ॥144॥

nṛtaka narāyanadāsa ko prēmapuṅja āgē baḍha़yo ॥
pada līno parasiddha prīti jāmēṅ dṛḍha़i nāto ।
acchara tanamaya bhayo madanamohana ram̐ga rāto ॥
nācata saba kou āhi kāhi pai yaha bani āvai ।
citralikhita so rahyo tribham̐ga dēsī ju dikhāvai ॥
ham̐ḍa़aiyā sarāya dēkhata dunī haripura padavīko kaḍha़yo ।
nṛtaka narāyanadāsa ko prēmapuṅja āgē baḍha़yo ॥145॥

gunagana biśada gopāla kē ētē jana bhaē bhūridā ॥
bohita rāmagupāla kum̐varabara gobim̐da mām̐ḍila ।
chītasvāmī jasavaṅta gadādhara anam̐tānam̐da bhala ॥
harinābhamiśra dīnadāsa bachapāla kanhara jasa gāyana ।
gosū rāmadāsa nārada syāma puni harinārāyana ॥
kṛṣṇajīvana bhagavānajana syāmadāsa bihārī amṛtadā ।
gunagana biśada gopāla kē ētē jana bhaē bhūridā ॥146॥

nirabartta bhaē saṅsāra tēṅ tē mērē jajamāna saba ॥
uddhava rāmarēnu parasarāma gaṅgā dhrūkhētanivāsī ।
acyutakula brahmadāsa biśrāma sēṣasāi kē bāsī ॥
kiṅkara kuṅḍā kṛṣṇadāsa khēma soṭhā gopānam̐da ।
jayadēva rāghava bidura dayāla dāmodara mohana paramānam̐da ॥
uddhava raghunāthī caturonagana kuṅja oka jē basata aba ।
nirabartta bhaē saṅsāra tēṅ tē mērē jajamāna saba ॥147॥

śrīsvāmī caturonagana magana rainadina bhajana hita ॥
sadā jukta anurakta bhaktamaṅḍala ko poṣata ।
pura mathurā brajabhūmi ramata sabahī ko toṣata ॥
parama dharama dṛḍha़i karana dēva śrīguru ārādhyo ।
madhura baina suṭhi ṭhaura ṭhaura harijana sukha sādhyo ॥
saṅta mahaṅta anaṅta jana jasa bistārata jāsu nita ।
śrīsvāmī caturonagana magana rainadina bhajanahita ॥148॥

madhukarī mām̐gi sēvaiṅ bhagata tinapara hauṅ balihāra kiyo ॥
gomā paramānam̐da pradhāna dvārikā mathurā khorā ।
kāluṣa sām̐gānēra bhalo bhagavāna ko jorā ॥
biṭṭhala ṭoḍa़ē khēma pam̐ḍā gūnorai gājaiṅ ।
syāma sēna kē baṅsa cīdhara pīpāra birājaiṅ ॥
jaitārana gopāla ko kēvala kūbai mola liyo ।
madhukarī mām̐gi sēvaiṅ bhagata tinapara hauṅ balihāra kiyo ॥149॥

(śrī)agra anugraha tēṅ bhaē siṣya sabai dharma kī dhvajā ॥
jaṅgī prasidha prayāga binodi pūrana banavārī ।
narasiṅha bhakta bhagavāna divākara dṛḍha़i bratadhārī ॥
komala hṛdaya kisora jagata jaganātha salūdhau ।
aurau anuga udāra khēma khīcī dharmadhīra laghu ūdhau ॥
tribidha tāpamocana sabai saurabha prabhu jina sira bhujā ।
(śrī)agra anugraha tēṅ bhaē siṣya sabai dharma kī dhvajā ॥150॥

bharatakhaṅḍa bhūdhara sumēru ṭīlā lāhā(kī) paddhati pragaṭa ॥
aṅgaja paramānaṅdadāsa jogī jaga jāgai ।
kharatara khēma udāra dhyāna kēso harijana anurāgai ॥
sasphuṭa tyolā śabda lohakara baṅsa ujāgara ।
harīdāsa kapiprēma sabai navadhā kē āgara ॥
acyuta kula sēvaiṅ sadā dāsana tana dasadhā aghaṭa ।
bharatakhaṅḍa bhūdhara sumēru ṭīlā lāhā(kī) paddhati pragaṭa ॥151॥

madhupurī mahochau maṅgalarūpa kānhara kaisau ko karai ॥
cāri barana āśrama raṅka rājā ana pāvai ।
bhaktana ko bahumāna bimukha koū nahiṅ jāvai ॥
bīrī caṅdana basana kṛṣṇa kīraṅtana baraṣai ।
prabhu kē bhūṣana dēya mahāmana atisaya haraṣai ॥
biṭṭhalasuta bimalyo phirai dāsa caranaraja sira dharai ।
madhupurī mahochau maṅgalarūpa kānhara kaisau ko karai ॥152॥

bhaktana soṅ kalijuga bhalē nibahī nīvā khētasī ॥
āvahiṅ dāsa anēka ūṭhi ādara kari lījai ।
carana dhoya daṅḍavata sadana mēṅ ḍērā dījai ॥
ṭhaura ṭhaura harikathā hṛdaya ati harijana bhāvaiṅ ।
madhura bacana mum̐ha lāya bibidha bhām̐tina ju laḍa़āvaiṅ ॥
sāvadhāna sēvā karai nirdūṣaṇa rati cētasī ।
bhaktana soṅ kalijuga bhalē nibahī nīvā khētasī ॥153॥

basana baḍha़yo kuṅtībadhū tyoṅ tūm̐bara bhagavāna kē ॥
yaha acaraja bhayo ēka khām̐ḍa ghṛta maidā baraṣai ।
rajata rukma kī rēla sṛṣṭi sabahī mana haraṣai ॥
bhojana rāsa bilāsa kṛṣṇa kīraṅtana kīno ।
bhaktana ko bahumāna dāna sabahī ko dīno ॥
kīrati kīnī bhīmasuta suni bhūpa manoratha āna kē ।
basana baḍha़yo kuṅtībadhū tyoṅ tūm̐bara bhagavāna kē ॥154॥

jasavaṅta bhakta jaimāla kī rūḍa़ā rākhī rāṭhavaḍa़ ॥
bhaktana soṅ atibhāva niraṅtara aṅtara nāhīṅ ।
kara jorē ika pām̐ya mudita mana ājñā māhīṅ ॥
śrībṛṅdābana bāsa kuṅja krīḍā ruci bhāvai ।
rādhāballabha lāla nitya prati tāhi laḍa़āvai ॥
parama dharma navadhā pradhāna sadana sām̐canidhi prēma jaḍa़ ।
jasavaṅta bhakta jaimāla kī rūḍa़ā rākhī rāṭhavaḍa़ ॥155॥

harīdāsa bhaktani hita dhani jananī ēkai janyo ॥
amita mahāguna gopya sāravita soī jānai ।
dēkhata ko tulādhāra dūra āsai unamānai ॥
dēya damāmau paija bidita bṛṅdābana pāyo ।
rādhāballabha bhajana pragaṭa paratāpa dikhāyo ॥
parama dharma sādhana sudṛḍha़i kāmadhēnu kalijuga(mēṅ) ganyo ।
harīdāsa bhaktani hita dhani jananī ēkai janyo ॥156॥

bhakti bhāva jūḍa़āiṅ jugala dharmadhuraṅdhara jaga bidita ॥
bām̐bolī gopāla gunani gaṅbhīra gunāraṭa ।
dacchina disi viṣṇudāsa gām̐va kāsīra bhajana bhaṭa ॥
bhaktani soṅ yaha bhāva bhajai guru gobim̐da jaisē ।
tilaka dāma ādhīna subara saṅtani prati taisē ॥
acyuta kula pana ēka rasa nibahyo jyauṅ śrīmukhagadita ।
bhakti bhāva jūḍa़āiṅ jugala dharmadhuraṅdhara jaga bidita ॥157॥

kīlha kṛpā kīrati bisada parama pāraṣada śiṣa pragaṭa ॥
āsakarana riṣirāja rūpa bhagavāna bhakti gura ।
caturadāsa jaga abhai chāpa chītara ju catura bara ॥
lākhai adbhuta rāyamala khēma manasā krama bācā ।
rasika rāyamala gaura dēvā dāmodara hari ram̐ga rācā ॥
sabai sumaṅgala dāsa dṛḍha़i dharmadhuraṅdhara bhajana bhaṭa ।
kīlha kṛpā kīrati bisada parama pāraṣada śiṣa pragaṭa ॥158॥

rasa rāsa upāsaka bhaktarāja nātha bhaṭṭa nirmala bayana ॥
āgama nigama purāna sāra sāstrana ju bicāryo ।
jyoṅ pāro dai puṭahiṅ sabani ko sāra udhāryo ॥
rūpa sanātana jīva bhaṭṭa nārāyana bhākhyo ।
so sarvasa ura sām̐ca jatana kari nīkē rākhyo ॥
phanī baṅsa gopāla suva rāgā anugā ko ayana ।
rasa rāsa upāsaka bhaktarāja nātha bhaṭṭa nirmala bayana ॥159॥

kaṭhina kāla kalijugga mēṅ karamaitī nikalam̐ka rahī ॥
naśvarapati rati tyāgi kṛṣṇapada soṅ rati jorī ।
sabai jagata kī phām̐si taraki tinukā jyoṅ torī ॥
nirmala kula kām̐thaḍa़yā dhanya parasā jihiṅ jāī ।
bidita bṛm̐dābana bāsa saṅta mukha karata baḍa़āī ॥
saṅsāra svāda sukha bāṅta kari phēra nahīṅ tina tana cahī ।
kaṭhina kāla kalijugga mēṅ karamaitī nikalam̐ka rahī ॥160॥

gobiṅdacaṅdra guna grathana ko khaḍgasēna bānī bisada ॥
go'pi gvāla pitu mātu nāma niranaya kiya bhārī ।
dāna kēli dīpaka pracura ati buddhi bicārī ॥
sakhā sakhī gopāla kāla līlā mēṅ bitayo ।
kāyatha kula uddhāra bhakti dṛḍha़i anata na citayo ॥
gautamī taṅtra ura dhyāna dhari tana tyāgyo maṅḍala sarada ।
gobiṅdacaṅdra guna grathana ko khaḍgasēna bānī bisada ॥161॥

sakhā syāma mana bhāvato gaṅga gvāla gaṅbhīramati ॥
syāmājū kī sakhī nāma āgama bidhi pāyo ।
gvāla gāya braja gām̐va pṛthaka nīkē kari gāyo ॥
kṛṣṇakēli sukha siṅdhu aghaṭa ura aṅtara dharaī ।
tā rasamēṅ nita magana asada ālāpa na karaī ॥
braja bāsa āsa brajanātha guru bhaktacarana ati anani gati ।
sakhā syāma mana bhāvato gaṅga gvāla gaṅbhīramati ॥162॥

soti ślāghya saṅtani sabhā dvitiya divākara jāniyo ॥
parama bhakti paratāpa dharamadhvaja nējādhārī ।
sītāpati ko sujasa badana sobhita ati bhārī ॥
jānakijīvana carana sarana thātī thira pāī ।
narahari guru parasāda pūta potē cali āī ॥
rāma upāsaka chāpa dṛḍha़i aura na kachu ura āniyo ।
soti ślāghya saṅtani sabhā dvitiya divākara jāniyo ॥163॥

jīvata jasa puni paramapada lāladāsa donoṅ lahī ॥
hṛdaya harīguna khāna sadā satasam̐ga anurāgī ।
padmapatra jyoṅ rahyo lobha kī lahara na lāgī ॥
viṣṇurāta sama rīti baghērē tyoṅ tana tyājyo ।
bhakta barātī bṛṅda madhya dūlaha jyoṅ rājyo ॥
kharī bhakti hariṣām̐purai guru pratāpa gāḍha़ī rahī ।
jīvata jasa puni paramapada lāladāsa donoṅ lahī ॥164॥

bhaktana hita bhagavata racī dēhī mādhava gvāla kī ॥
nisidina yahai vicāra dāsa jēhiṅ bidhi sukha pāvaiṅ ।
tilaka dāma soṅ prīti hṛdaya ati harijana bhāvaiṅ ॥
paramāratha soṅ kāja hiē svāratha nahiṅ jānai ।
dasadhā matta marāla sadā līlā guna gānai ॥
ārata hariguna sīla sama prīti rīti pratipāla kī ।
bhaktana hita bhagavata racī dēhī mādhava gvāla kī ॥165॥

śrīagara suguru paratāpa tēṅ pūrī parī prayāga kī ॥
mānasa bācaka kāya rāmacaranana cita dīno ।
bhaktana soṅ ati prēma bhāvanā kari sira līno ॥
rāsa madhya nirjāna dēha duti dasā dikhāī ।
āḍa़o baliyo aṅka mahocho pūrī pāī ॥
kyārē kalasa aulī dhvajā biduṣaślāghā bhāga kī ।
śrīagara suguru paratāpa tēṅ pūrī parī prayāga kī ॥166॥

pragaṭa amita guna prēmanidhi dhanya bipra jēhiṅ nāma dharyo ॥
suṅdara sīla svabhāva madhura bānī maṅgalakaru ।
bhaktana ko sukha dēna phalyo bahudhā dasadhā taru ॥
sadana basata nirbēda sārabhuka jagata asaṅgī ।
sadācāra ūdāra nēma harikathā prasaṅgī ॥
dayādṛṣṭi basi āgarē kathā loka pābana karyo ।
pragaṭa amita guna prēmanidhi dhanya bipra jēhiṅ nāma dharyo ॥167॥

dūbaro jāhi duniyām̐ kahai so bhakta bhajana moṭo mahaṅta ॥
sadācāra guru siṣya tyāgabidhi pragaṭa dikhāī ।
bāhira bhītara bisada lagī nahiṅ kalijuga kāī ॥
rāghava rucira svabhāva asada ālāpa na bhāvai ।
kathā kīratana nēma milē saṅtana guna gāvai ॥
tāpa toli pūro nikaṣa jyoṅ ghana aharani hīro sahaṅta ।
dūbaro jāhi duniyām̐ kahai so bhakta bhajana moṭo mahaṅta ॥168॥

dāsana kē dāsatva ko caukasa caukī ē maḍa़ī ॥
harinārāyana nṛpati padama bērachai birājai ।
gām̐va husaṅgābāda aṭala uddhava bhala chājai ॥
bhēlai tulasīdāsa khyāta bhaṭa dēva kalyāno ।
bohitha bīrā rāmadāsa suhēlai parama sujāno ॥
aulī paramānaṅda kē sabala dharma ki dhvajā gaḍa़ī ।
dāsana kē dāsatva ko caukasa caukī ē maḍa़ī ॥169॥

abalā sarīra sādhana sabala ē bāī haribhajanabala ॥
damā pragaṭa saba dunī rāmabāī (bīrā) hīrāmani ।
lālī nīrā lacchi jugala pārbatī jagata dhani ॥
khīcani kēsī dhanā gomatī bhakta upāsini ।
bādararānī bidita gaṅga jamunā raidāsini ॥
jēvā hariṣā joisini kuvam̐rirāya kīrati amala ।
abalā sarīra sādhana sabala ē bāī haribhajanabala ॥170॥

kānharadāsa saṅtani kṛpā hari hiradai lāho lahyo ॥
śrīguru saranai āya bhakti māraga sata jānyo ।
saṅsārī dharmahi chām̐ḍa़ai jhūm̐ṭha aru sām̐ca pichānyo ॥
jyoṅ sākhādruma caṅdra jagata soṅ yahi bidhi nyāro ।
sarvabhūta samadṛṣṭi gunani gam̐bhīra ati bhāro ॥
bhakta bhalāī badata nita kubacana kabahūm̐ nahiṅ kahyo ।
kānharadāsa saṅtani kṛpā hari hiradai lāho lahyo ॥171॥

laṭyo laṭērā āna bidhi parama dharama ati pīna tana ॥
kahanī rahanī ēka ēka haripada anurāgī ।
jasa bitāna jaga tanyo saṅtasammata baḍa़bhāgī ॥
taisoi pūta sapūta nūta phala jaisoi parasā ।
hari haridāsani ṭahala kavita racanā puni sarasā ॥
surasurānam̐da saṅpradāya dṛḍha़i kēsava adhika udāra mana ।
laṭyo laṭērā āna bidhi parama dharama ati pīna tana ॥172॥

kēvalarāma kalijuga kē patita jīva pāvana kiyā ॥
bhakti bhāgavata bimukha jagata guru nāma na jānaiṅ ।
aisē loga anēka aiṅci sanmāraga ānē ॥
nirmala rati nihakāma ajā tēṅ sahaja udāsī ।
tattvadarasi tamaharana sīla karunā kī rāsī ॥
tilaka dāma navadhā ratana kṛṣṇa kṛpā kari dṛḍha़i diyā ।
kēvalarāma kalijuga kē patita jīva pāvana kiyā ॥173॥

mohana miśrita padakamala āsakarana jasa bistaryo ॥
dharma sīla gunasīṅva mahābhāgavata rājariṣi ।
pṛthīrāja kuladīpa bhīmasuta bidita kīlha siṣi ॥
sadācāra ati catura bimala bānī racanāpada ।
sūra dhīra uddāra binaya bhalapana bhaktani hada ॥
sītāpati rādhāsubara bhajana nēma kūrama dharyo ।
mohana miśrita padakamala āsakarana jasa bistaryo ॥174॥

niṣkiṅcana bhaktani bhajai hari pratīti haribaṅsa kē ॥
kathā kīratana prīti saṅtasēvā anurāgī ।
khariyā khurapā rīti tāhi jyoṅ sarbasu tyāgī ॥
saṅtoṣī suṭhi sīla asada ālāpa na bhāvai ।
kāla bṛthā nahiṅ jāya niraṅtara gobim̐da gāvai ॥
siṣa sapūta śrīraṅga ko udita pāraṣada aṅsa kē ।
niṣkiṅcana bhaktani bhajai hari pratīti haribaṅsa kē ॥175॥

haribhakti bhalāi guna gam̐bhīra bām̐ṭē parī kalyāna kē ॥
navakisora dṛḍha़i brata anani māraga ika dhārā ।
madhura bacana manaharana sukhada jānai saṅsārā ॥
para upakāra bicāra sadā karunā kī rāsī ।
mana baca sarbasa rūpa bhakta padarēnu upāsī ॥
dharmadāsasuta sīla suṭhi mana mānyo kṛṣṇa sujāna kē ।
haribhakti bhalāi guna gam̐bhīra bām̐ṭē parī kalyāna kē ॥176॥

biṭhaladāsa haribhakti kē duhūm̐ hātha lāḍū liyā ॥
ādi aṅta nirbāha bhaktapadarajabratadhārī ।
rahyo jagata soṅ aiṅḍa़ tuccha jānē saṅsārī ॥
prabhutā pati kī padhati pragaṭa kuladīpa prakāsī ।
mahata sabhā mēṅ māna jagata jānai raidāsī ॥
pada paḍha़ta bhaī paraloka gati guru gobim̐da juga phala diyā ।
biṭhaladāsa haribhakti kē duhūm̐ hātha lāḍū liyā ॥177॥

bhagavaṅta racē bhārī bhagata bhaktani kē sanmāna ko ॥
kvāhaba śrīram̐ga sumati sadānam̐da sarbasa tyāgī ।
syāmadāsa laghulaṅba anani lākhai anurāgī ॥
māru mudita kalyāna parasa baṅsī nārāyana ।
cētā gvāla gupāla sam̐kara līlā pārāyana ॥
saṅta sēya kāraja kiyā toṣata syāma sujāna ko ।
bhagavaṅta racē bhārī bhagata bhaktani kē sanmāna ko ॥178॥

tilaka dāma parakāsa ko harīdāsa hari nirmayo ॥
saranāgata ko śibira dāna dadhīca ṭēka bali ।
parama dharma prahlāda sīsa jagadēva dēna kali ॥
bīkāvata bānaita bhaktipana dharmadhuraṅdhara ।
tūm̐vara kula dīpakka saṅtasēvā nita anusara ॥
pārthapīṭha acaraja kauna sakala jagata mēṅ jasa layo ।
tilaka dāma parakāsa ko harīdāsa hari nirmayo ॥179॥

naṅdakum̐vara kṛṣṇadāsa ko nija paga tēṅ nūpura diyo ॥
tāna māna sura tāla sulaya suṅdara suṭhi sohai ।
sudhā aṅga bhrūbhaṅga gāna upamā ko ko hai ॥
ratnākara saṅgīta rāgamālā ram̐garāsī ।
rijhayē rādhālāla bhaktapadarēnu upāsī ॥
svarnakāra kharagū suvana bhakta bhajana dṛḍha़i brata liyo ।
naṅdakum̐vara kṛṣṇadāsa ko nija paga tēṅ nūpura diyo ॥180॥

paramadharma pratipoṣa ko saṅnyāsī ē mukuṭamani ॥
citsukha ṭīkākāra bhakti sarbopari rākhī ।
śrīdāmodaratīrtha rāma arcana bidhi bhākhī ॥
caṅdrodaya haribhakti narasiṅhāranya kīnhī ।
mādhava madhusūdana (sarasvatī) paramaham̐sa kīrati līnhī ॥
prabodhānaṅda rāmabhadra jagadānaṅda kalijuga dhani ।
paramadharma pratipoṣa ko saṅnyāsī ē mukuṭamani ॥181॥

aṣṭāṅga joga tana tyāgiyo dvārikādāsa jānē dunī ॥
saritā kūkasa gām̐va salila mēṅ dhyāna dharyo mana ।
rāmacarana anurāga sudṛḍha़ jākē sām̐co pana ॥
suta kalatra dhana dhāma tāhi soṅ sadā udāsī ।
kaṭhina moha ko phaṅda taraki torī kula phām̐sī ॥
kīlha kṛpā bala bhajana kē gyānakhaḍga māyā hanī ।
aṣṭāṅga joga tana tyāgiyo dvārikādāsa jānē dunī ॥182॥

pūrana pragaṭa mahimā anam̐ta karihai kauna bakhāna ॥
udaya asta parabatta gahira madhi saritā bhārī ।
joga jugati biśvāsa tahām̐ dṛḍha़i āsana dhārī ॥
byāghra siṅha guṅjai kharā kachu saṅka na mānai ।
arddha na jātē pavana ulaṭi ūradha ko ānai ॥
sākhi sabda nirmala kahā kathiyā pada nirbāna ।
pūrana pragaṭa mahimā anam̐ta karihai kauna bakhāna ॥183॥

(śrī)rāmānuja paddhati pratāpa bhaṭṭa lacchamana anusaryo ॥
sadācāra munibṛtti bhajana bhāgavata ujāgara ।
bhaktana soṅ atiprīti bhakti dasadhā ko āgara ॥
saṅtoṣī suṭhi sīla hṛdaya svāratha nahiṅ lēsī ।
paramadharma pratipāla saṅta māraga upadēsī ॥
śrībhāgavata bakhāni kai nīra kṣīra bibarana karyo ।
(śrī)rāmānuja paddhati pratāpa bhaṭṭa lacchamana anusaryo ॥184॥

dadhīci pāchē dūjī karī kṛṣṇadāsa kali jīti ॥
kṛṣṇadāsa kali jīti nyoti nāhara pala dīyo ।
atithidharma pratipāla pragaṭa jasa jaga mēṅ līyo ॥
udāsīnatā avadhi kanaka kāmini nahiṅ rāto ।
rāmacaranamakaraṅda rahata nisidina madamāto ।
galatē galita amita guna sadācāra suṭhi nīti ।
dadhīci pāchē dūjī karī kṛṣṇadāsa kali jīti ॥185॥

bhalī bhām̐ti nibahī bhagati sadā gadādharadāsa kī ॥
lālabihārī japata rahata nisibāsara phūlyo ।
sēvā sahaja sanēha sadā ānam̐darasa jhūlyo ॥
bhaktana soṅ ati prīti rīti sabahī mana bhāī ।
āsaya adhika udāra rasana hari kīrati gāī ॥
hari biśvāsa hiya āni kai sapanēhum̐ anya na āsa kī ।
bhalī bhām̐ti nibahī bhagati sadā gadādharadāsa kī ॥186॥

haribhajana sīṅva svāmī sarasa śrīnārāyanadāsa ati ॥
bhakti joga juta sudṛḍha़i dēha nijabala kari rākhī ।
hiyē sarūpānaṅda lāla jasa rasanā bhākhī ॥
paricai pracura pratāpa jānamani rahasa sahāyaka ।
śrīnārāyana pragaṭa mano logani sukhadāyaka ॥
nita sēvata saṅtani sahita dātā uttaradēsa gati ।
haribhajana sīṅva svāmī sarasa śrīnārāyanadāsa ati ॥187॥

bhagavānadāsa śrīsahita nita suhṛda sīla sajjana sarasa ॥
bhajanabhāva ārūḍha़ gūḍha़ guna balita lalita jasa ।
śrotā śrībhāgavata rahasi gyātā acchara rasa ॥
mathurāpurī nivāsa āsa pada saṅtani ikacita ।
śrījuta khojī syāma dhāma sukhakara anucarahita ॥
ati gaṅbhīra sudhīra mati hulasata mana jākē darasa ।
bhagavānadāsa śrīsahita nita suhṛda sīla sajjana sarasa ॥188॥

bhaktapaccha ūdāratā yaha nibahī kalyāna kī ॥
jagannātha ko dāsa nipuna ati prabhu mana bhāyo ।
parama pāraṣada samujhi jāni priya nikaṭa bulāyo ॥
prāna payāno karata nēha raghupati soṅ joryo ।
suta dārā dhana dhāma moha tinakā jyoṅ toryo ॥
kauṅdhanī dhyāna ura mēṅ lasyo rāmanāma mukha jānakī ।
bhaktapaccha ūdāratā yaha nibahī kalyāna kī ॥189॥

sodara sobhūrāma kē sunau saṅta tinakī kathā ॥
saṅtadāsa sadabṛtti jagata choī kari ḍāryo ।
mahimā mahā prabīna bhaktivita dharma vicāryo ॥
bahuryo mādhavadāsa bhajanabala paricai dīno ।
kari jogini soṅ bāda basana pāvaka prati līno ॥
paramadharma bistāra hita pragaṭa bhaē nāhiṅna tathā ।
sodara sobhūrāma kē sunau saṅta tinakī kathā ॥190॥

būḍa़aiyē bidita kānhara kṛpālu ātmārāma āgamadarasī ॥
kṛṣṇabhakti ko thaṅbha brahmakula parama ujāgara ।
chamāsīla gaṅbhīra sabai lacchana ko āgara ॥
sarbasu harijana jāni hṛdaya anurāga prakāsai ।
asana basana sanmāna karata ati ujjvala āsai ॥
sobhūrāma prasāda tēṅ kṛpādṛṣṭi sabapara basī ।
būḍa़aiyē bidita kānhara kṛpālu ātmārāma āgamadarasī ॥191॥

bhaktaratanamālā sudhana gobim̐da kaṅṭha bikāsa kiya ॥
rucirasīla ghananīla līla ruci sumati saritapati ।
bibidha bhakta anurakta byakta bahu carita catura ati ॥
laghu dīragha svara suddha bacana abiruddha ucārana ।
biśvabāsa biśvāsa dāsa paricaya bistārana ॥
jāni jagatahita saba gunani susama narāyanadāsa diya ।
bhaktaratanamālā sudhana gobim̐da kaṅṭha bikāsa kiya ॥192॥

bhaktēsa bhakta bhava toṣakara saṅta nṛpati bāso kum̐vara ॥
śrījuta nṛpamani jagatasiṅha dṛḍha़i bhakti parāyana ।
paramaprīti kiē subasa sīla lakṣmīnārāyana ॥
jāsu sujasa sahajahīṅ kuṭila kali kalpa ju ghāyaka ।
ājñā aṭala supragaṭa subhaṭa kaṭakani sukhadāyaka ॥
ati pracaṅḍa mārtaṅḍa sama tamakhaṅḍana dordaṅḍa bara ।
bhaktēsa bhakta bhava toṣakara saṅta nṛpati bāso kum̐vara ॥193॥

giridharana gvāla gopāla ko sakhā sām̐ca lau saṅgako ॥
prēmī bhakta prasiddha gāna ati gadgada bānī ।
aṅtara prabhu soṅ prīti pragaṭa raha nāhiṅna chānī ॥
nitya karata āmoda bipina tana basana bisārai ।
hāṭaka paṭa hita dāna rījhi tatkāla utārai ॥
mālapurai maṅgalakarana rāsa racyo rasa raṅgako ।
giridharana gvāla gopāla ko sakhā sām̐ca lau saṅgako ॥194॥

gopālī janapoṣa ko jagata jasodā avatarī ॥
pragaṭa aṅga mēṅ prēma nēma soṅ mohana sēvā ।
kalijuga kaluṣa na lagyo dāsa tēṅ kabahum̐ na chēvā ॥
bānī sītala sukhada sahaja gobim̐dadhuni lāgī ।
lacchana kalā gam̐bhīra dhīra saṅtani anurāgī ॥
aṅtara suddha sadā rahai rasika bhakti nija ura dharī ।
gopālī janapoṣa ko jagata jasodā avatarī ॥195॥

śrīrāmadāsa rasa rīti soṅ bhalī bhām̐ti sēvata bhagata ॥
sītala parama susīla bacana komala mukha nikasai ।
bhakta udita rabi dēkhi hṛdaya bārija jimi bikasai ॥
ati ānam̐da mana umagi saṅta paricaryā karaī ।
carana dhoi daṅḍavata bibidha bhojana bistaraī ॥
bachavana nibāsa biśvāsa hari jugala carana ura jagamagata ।
śrīrāmadāsa rasa rīti soṅ bhalī bhām̐ti sēvata bhagata ॥196॥

bipra sārasuta ghara janama rāmarāya hari rati karī ॥
bhakti gyāna bairāgya joga aṅtara gati pāgyo ।
kāma krodha mada lobha moha matsara saba tyāgyo ॥
kathā kīratana magana sadā ānam̐da rasa jhūlyo ।
saṅta nirakhi mana mudita udita rabi paṅkaja phūlyo ॥
vaira bhāva jina droha kiya tāsu pāga khasi bhvaiṅ pari ।
bipra sārasuta ghara janama rāmarāya hari rati karī ॥197॥

bhagavam̐ta mudita udāra jasa rasa rasanā āsvāda kiya ॥
kuṅjabihārī kēli sadā abhyaṅtara bhāsai ।
daṅpati sahaja sanēha prīti parimiti parakāsai ॥
anani bhajana rasarīti puṣṭimāraga kari dēkhī ।
bidhi niṣēdha bala tyāgi pāgi rati hṛdaya viśēṣī ॥
mādhava suta saṅmata rasika tilaka dāma dhari sēva liya ।
bhagavam̐ta mudita udāra jasa rasa rasanā āsvāda kiya ॥198॥

durlabha mānuṣadēha ko lālamatī lāho liyo ॥
gaurasyāma soṅ prīti prīti jamunākuṅjana soṅ ।
baṅsībaṭa soṅ prīti prīti brajarajapuṅjana soṅ ॥
gokula gurujana prīti prīti ghana bāraha bana soṅ ।
pura mathurā soṅ prīti prīti giri gobardhana soṅ ॥
bāsa aṭala bṛṅdā bipina dṛḍha़i kari so nāgari kiyo ।
durlabha mānuṣadēha ko lālamatī lāho liyo ॥199॥

agra kahaiṅ trailoka mēṅ hari ura dharaiṅ tēī baḍa़ē ॥
kabijana karata bicāra baḍa़o ko tāhi bhanijjai ।
kou kaha avanī baḍa़ī jagata ādhāra phanijjai ॥
so dhārī sira śēṣa tāhi siva bhūṣana kīno ।
siva āsana kailāsa bhujā bhari rāvana līno ॥
rāvana jītyo bāli bāli rāghava ika sāyaka dam̐ḍa़ē ।
agra kahaiṅ trailoka mēṅ hari ura dharaiṅ tēī baḍa़ē ॥200॥

hari sujasa prīti haridāsa kai tyoṅ bhāvai haridāsa jasa ॥
nēha parasapara aghaṭa nibahi cāroṅ juga āyo ।
anucara ko utkarṣa syāma apanē mukha gāyo ॥
otaprota anurāga prīti sabahī jaga jānai ।
pura pravēsa raghuvīra bhṛtya kīrati ju bakhānai ॥
agra anuga guna barana tēṅ sītāpati nita hota basa ।
hari sujasa prīti haridāsa kai tyoṅ bhāvai haridāsa jasa ॥201॥

utkarṣa sunata saṅtana ko acaraja koū jina karau ॥
durvāsā prati syāma dāsabasatā hari bhākhī ।
dhruva gaja puni prahlāda rāma sabarī phala sākhī ॥
rājasūya jadunātha carana dhoya jūm̐ṭha uṭhāī ।
pāṅḍava bipati nivāri diē biṣa biṣayā pāī ॥
kali bisēṣa paracau pragaṭa āstika hvai kai cita dharau ।
utkarṣa sunata saṅtana ko acaraja koū jina karau ॥202॥

pādapa pēḍa़hiṅ sīṅcatē pāvai am̐ga am̐ga poṣa ।
pūrabajā jyoṅ barana tēṅ suni māniyo sam̐toṣa ॥203॥

bhakta jitē bhūloka mēṅ kathē kauna pai jāya ।
samum̐dapāna śraddhā karai kaham̐ ciri pēṭa samāya ॥204॥

śrīmūrati saba vaiṣṇava laghu baḍa़ gunani agādha ।
āgē pīchē barana tēṅ jini mānau aparādha ॥205॥

phala kī śobhā lābha taru taru śobhā phala hoya ।
gurū śiṣya kī kīrti mēṅ acaraja nāhīṅ koya ॥206॥

cāri jugana mēṅ bhagata jē tinakē pada kī dhūri ।
sarvasu sira dhari rākhihauṅ mērī jīvana mūri ॥207॥

jaga kīrati maṅgala udaya tīnoṅ tāpa naśāya ।
harijana kē guna barana tēṅ hari hṛdi aṭala basāya ॥208॥

harijana kē guna baranatē (jo) karai asūyā āya ।
ihām̐ udara bāḍha़āi bithā aru paraloka nasāya ॥209॥

(jo) hariprāpati kī āsa hai to harijana guna gāva ।
nataru sukṛta bhum̐jē bīja lauṅ janama janama pachitāva ॥210॥

bhaktadāma saṅgraha karaiṅ kathana śravana anumoda ।
so prabhu pyāro putra jyoṅ baiṭhē hari kī goda ॥211॥

acyutakula jasa ika bērahūm̐ jinakī mati anurāgi ।
tinakī bhagati sukṛta mēṅ niścai hoya bibhāgi ॥212॥

bhaktadāma jina jina kahē tinakī jūm̐ṭhani pāya ।
mo mati sāra acchara dvai kīnauṅ silau banāya ॥213॥

kāhū kē bala joga jaga kula karanī kī āsa ।
bhaktanāmamālā agara (ura) basau narāyanadāsa ॥214॥

॥ iti śrīnārāyaṇadāsanābhākṛta śrībhaktamāla ॥