रामं सर्वेश्वरं चाथानन्दभाष्यविधायकम् ।
गुरुं नत्त्वा च कुर्वेऽहं भक्तित्रयनिरूपणम् ॥१॥
भक्तिः —
भक्तिः स राघवे स्नेहः सर्वेभ्यश्चाधिको हि यः ।
तयैव प्राप्यते मोक्षो नान्यथेति सुनिश्चितम् ॥२॥
मानसी कायिकी चाथ वाचिकीति त्रिधा हि सा ।
१- मानसी भक्तिः —
तत्रादिमा च रामस्य स्मरणं यन्निरन्तरम् ॥३॥
पोषणादौ स्वदेहस्यौदासीन्यं समुपागतः ।
आत्मदेहादिकं सर्वं श्रीरामाय समर्पयेत् ॥४॥
मनसा राघवे सख्यं कुर्याच्च श्रद्धया खलु ।
अपहाय तथा सर्वं राममेव समाश्रयेत् ॥५॥
२- कायिकी भक्तिः —
द्वितीया श्रृणुयान्नित्यं श्रोत्राभ्यां रामसत्कथाम् ।
श्रीराम-मन्दिरे कुर्यात् कायेन मार्जनादिकम् ॥६॥
अमोघं पूजनं कुर्याद् रामस्य दर्शनं तथा ।
संसेव्य रामपादौ च साष्टाङ्गं प्रणमेत् सदा ॥७॥
३- वाचिकी भक्तिः —
अहं दासोऽस्मि ते राम ममागतेर्गतिर्भव।
दयासिन्धो दयां कुर्यादनार्ये मयि पामरे ॥८॥
एवं स्तुतिर्गुणानां च वाचां नाम्नश्च कीर्त्तनम्।
अमोघस्तवरामस्य तृतीया भक्तिरुच्यते ॥९॥
श्रीरामानन्दशिष्यश्रीयोगानन्दविनिर्मितम् ।
श्रीरामभक्तिदं भूयाद् भक्तित्रयनिरूपणम् ॥१०॥
॥ इति श्रीयोगानन्दाचार्यविरचितं भक्तित्रयनिरूपणम् सम्पूर्णम् ॥
rāmaṁ sarvēśvaraṁ cāthānandabhāṣyavidhāyakam ।
guruṁ nattvā ca kurvē'haṁ bhaktitrayanirūpaṇam ॥1॥
bhaktiḥ —
bhaktiḥ sa rāghavē snēhaḥ sarvēbhyaścādhikō hi yaḥ ।
tayaiva prāpyatē mōkṣō nānyathēti suniścitam ॥2॥
mānasī kāyikī cātha vācikīti tridhā hi sā ।
1- mānasī bhaktiḥ —
tatrādimā ca rāmasya smaraṇaṁ yannirantaram ॥3॥
pōṣaṇādau svadēhasyaudāsīnyaṁ samupāgataḥ ।
ātmadēhādikaṁ sarvaṁ śrīrāmāya samarpayēt ॥4॥
manasā rāghavē sakhyaṁ kuryācca śraddhayā khalu ।
apahāya tathā sarvaṁ rāmamēva samāśrayēt ॥5॥
2- kāyikī bhaktiḥ —
dvitīyā śrṛṇuyānnityaṁ śrōtrābhyāṁ rāmasatkathām ।
śrīrāma-mandirē kuryāt kāyēna mārjanādikam ॥6॥
amōghaṁ pūjanaṁ kuryād rāmasya darśanaṁ tathā ।
saṁsēvya rāmapādau ca sāṣṭāṅgaṁ praṇamēt sadā ॥7॥
3- vācikī bhaktiḥ —
ahaṁ dāsō'smi tē rāma mamāgatērgatirbhava।
dayāsindhō dayāṁ kuryādanāryē mayi pāmarē ॥8॥
ēvaṁ stutirguṇānāṁ ca vācāṁ nāmnaśca kīrttanam।
amōghastavarāmasya tṛtīyā bhaktirucyatē ॥9॥
śrīrāmānandaśiṣyaśrīyōgānandavinirmitam ।
śrīrāmabhaktidaṁ bhūyād bhaktitrayanirūpaṇam ॥10॥
॥ iti śrīyōgānandācāryaviracitaṁ bhaktitrayanirūpaṇam sampūrṇam ॥