नत्त्वा भाष्यकृतं रामानन्दाचार्यं च राघवम् ।
कल्याणकारकं कुर्वे भागवतानुशासनम् ॥१॥

आत्मीयमथ चात्मानं श्रीरामाय समर्प्यताम् ।
रामे रम्यं ममत्वं च सर्वं त्याक्त्वा विधीयताम् ॥२॥

लाभेऽलाभे तथा दुःखे सुखे मानेऽपमानके ।
द्वन्द्वे मित्रे तथाऽमित्रे सदा साम्यं निरीक्ष्यताम् ॥३॥

लोकद्वयसुखाकांक्षा सर्वथा परिहीयताम् ।
चेतसि च स्थिता सर्वा वासना हि निरस्यताम् ॥४॥

रामनामामृतं पीत्वा निर्भयेनात्र भूयताम् ।
योगिध्यानास्पदं रामः सर्वदाऽथानुचिन्त्यताम् ॥५॥

गर्वं त्यक्त्वा हि रामाग्रे सदा दैन्यमवाप्यताम्।
कायेन रामकैङ्कर्यंप मुक्तिदं सुविधीयताम् ॥६॥

श्रीरामश्चाभिरामो हि सर्वभूतेषु वीक्ष्यताम् ।
चिदचिदीशतत्त्वानां स्वरूपमवबुध्यताम् ॥७॥

सत्यं प्रियं हितं चाथ सर्वदा चाभिधीयताम्।
अधर्ममपहायाथ सद्धर्मश्चावलम्ब्यताम् ॥८॥

तुलसीमालिके धृत्वा चोर्ध्वपुण्ड्रं विधीयताम् ।
श्रीरामचापबाणाभ्यां बाहुद्वयं समङ्क्यताम् ॥९॥

प्रायश्चित्तं हि शास्त्रेषु यस्य क्वापि न दृश्यते ।
गार्हस्थ्यं तद् विरक्तेन सर्वथा परिहीयताम् ॥१०॥

विशिष्टाद्वैतसिद्धान्तो दोषशून्योऽवबुध्यताम्।
प्रस्थानतृतयानन्दभाष्यं नित्यं सुचिन्त्यताम् ॥११॥

विधाय पूजनं रामो दण्डवत् सुप्रणम्यताम् ।
यथा रामस्तथा नित्यं स्वाचार्यः समुपास्यताम् ॥१२॥

रामानन्दार्यशिष्य श्रीयोगानन्दार्यनिर्मितम् ।
कल्याणपरकं भूयाद् भागवतानुशासनम् ॥१३॥

॥ इति श्रीयोगानन्दाचार्यविरचितं भागवतानुशासनम् सम्पूर्णम् ॥

nattvā bhāṣyakṛtaṁ rāmānandācāryaṁ ca rāghavam ।
kalyāṇakārakaṁ kurvē bhāgavatānuśāsanam ॥1॥

ātmīyamatha cātmānaṁ śrīrāmāya samarpyatām ।
rāmē ramyaṁ mamatvaṁ ca sarvaṁ tyāktvā vidhīyatām ॥2॥

lābhē'lābhē tathā duḥkhē sukhē mānē'pamānakē ।
dvandvē mitrē tathā'mitrē sadā sāmyaṁ nirīkṣyatām ॥3॥

lōkadvayasukhākāṁkṣā sarvathā parihīyatām ।
cētasi ca sthitā sarvā vāsanā hi nirasyatām ॥4॥

rāmanāmāmṛtaṁ pītvā nirbhayēnātra bhūyatām ।
yōgidhyānāspadaṁ rāmaḥ sarvadā'thānucintyatām ॥5॥

garvaṁ tyaktvā hi rāmāgrē sadā dainyamavāpyatām।
kāyēna rāmakaiṅkaryaṁpa muktidaṁ suvidhīyatām ॥6॥

śrīrāmaścābhirāmō hi sarvabhūtēṣu vīkṣyatām ।
cidacidīśatattvānāṁ svarūpamavabudhyatām ॥7॥

satyaṁ priyaṁ hitaṁ cātha sarvadā cābhidhīyatām।
adharmamapahāyātha saddharmaścāvalambyatām ॥8॥

tulasīmālikē dhṛtvā cōrdhvapuṇḍraṁ vidhīyatām ।
śrīrāmacāpabāṇābhyāṁ bāhudvayaṁ samaṅkyatām ॥9॥

prāyaścittaṁ hi śāstrēṣu yasya kvāpi na dṛśyatē ।
gārhasthyaṁ tad viraktēna sarvathā parihīyatām ॥10॥

viśiṣṭādvaitasiddhāntō dōṣaśūnyō'vabudhyatām।
prasthānatṛtayānandabhāṣyaṁ nityaṁ sucintyatām ॥11॥

vidhāya pūjanaṁ rāmō daṇḍavat supraṇamyatām ।
yathā rāmastathā nityaṁ svācāryaḥ samupāsyatām ॥12॥

rāmānandāryaśiṣya śrīyōgānandāryanirmitam ।
kalyāṇaparakaṁ bhūyād bhāgavatānuśāsanam ॥13॥

॥ iti śrīyōgānandācāryaviracitaṁ bhāgavatānuśāsanam sampūrṇam ॥